1 Samuel 6 - Baibuli I Leb Kumam 2013

Kodwoko Sanduku me Isikan Isirael

¹ Sanduku me Isikan ka Rwot oko bedo Pilistia pi dwete kanyaare.

² Di do jo me Pilistia oko lwongo josaseredoti gi karacel kede jo kame tuco gi komungere, di kiko penyo gi be, “Otim nyo kede Sanduku me Isikan ka Rwot? Wacenu wa gikame opoore dwoke kede i kabedo mere.”

³ Gin kiko waco negi be, “Ka iyarunu dwoko Sanduku me Isikan ka Rwot kabedo mere, kur idwokenu abongo gimoro, do dwokenu kede giamia me kwanyo dub. Manoni bino mino icangunu di ikounu ngeno gikame omio en ebedo mino wu alola.”

⁴ Jo oko penyere be, “Ocwai ne giamia nyo?” Gin kiko dwoko be, “Cwaunu cal kany me giakwoti kame kotimo kede saabu, kede da cal me iyoono kany kame kotimo kede saabu da, di lubere kede wel me jopug me Pilistia. Pien tuwo nono omako wu karacel kede jopug wu da.

⁵ Aso, poore wun itimunu cal me giakwoti wu kede me iyoono kame tie dudubo lobo wu, di ikounu mino Rubanga me Isirael deyo; cengemogo ebino weko mino wu alola, wun karacel kede rubangan wu kede lobo wu.

⁶ Pinyo komio imitunu bedo kede epali bala kame bin jo me Misiri kede Parao otimo kede? I kare kame Rubanga otimo negi kede anywar, mam kiko yei ne jo me Isirael pi yai?

⁷ Aso, udunu cabala anyen di ikounu iiko doke amon are kalikame pwodi kotweo i ayoko; tweunu negi ayoko di ikounu kodo negi cabala, do ikounu dwoko roce gi paco kur upere kede gi.

⁸ Di do ikounu kwanyo Sanduku me Isikan ka Rwot di ikounu kete i cabala, di ikounu keto sanduku ace i nget manono kame tie iye cal kame kotimo kede saabu, en giamia kame itienu cwano me kwanyo dub wu. Ikounu kolo doke nogo kicak wano cabala di ikounu weko gi kiot ken gi.

⁹ Di do wun ikounu neno kakame kiyaro tere iye; ka kitere tetu bomba me Bet Semes, udo dwong mere be Rubanga me jo me Isirael en kocwao ne wa peko noni; do ka li, wan obino ngeno be likame Rubanga nono en kocwao ne wa peko noni, do engole angola bino kene.”

¹⁰ Jo oko timo kamanono; gin kitweo ne dok amon are ayoko di kiko kodo negi cabala, di kiko cego roce gi i awi.

¹¹ Di do kiko keto Sanduku me Isikan ka Rwot i cabala, karacel kede sanduku kame cal me giakwoti kede cal me iyoono kame kotimo kede saabu tie iye.

¹² Doke nogo oko tiro atira yongayo ot tetu Bet Semes di kilubo yongayo acel adwong abongo parao. Gin oudo kikok di kioto. Jopug kany me Pilistia oko lubo gi paka tuno i ikor me Bet Semes.

¹³ Aso, jo me Bet Semes oudo tie nyaro engano gi i aditot. Kakame kitingo kede wang gi malo di kiko neno Sanduku me Isikan, gin kiko ot pi riamo kede di kilelo.

¹⁴ Doke oko wano cabala paka i poto me icuo moro anyinge Yosua, kame oudo tie Bet Semes, di kiko cungo i nget kidi ati. Gin kiko bebelo ibaon kame oudo kotimo kede cabala di kiko wango kede doke nogo bala giayala awanga but Rwot.

¹⁵ Jolebi oko tingo Sanduku me Isikan ka Rwot kede sanduku kame oudo tie iye cal kame kotimo kede saabu, di kiko keto gi i wi kidi ati. Di do jo me Bet Semes oko mino giayala awanga kede giayala ace apat but Rwot.

¹⁶ Jopug kany me Pilistia oneno gi di kitimo kamanono di kiko dok Ekuron cenge nono.

¹⁷ Jo me Pilistia ocwao cal me giakwoti kany me kotimo kede saabu but Rwot bala giamia pi culo dub gi; acel pi bomba me Asidod, acel pi bomba me Gasa, acel pi bomba me Asikelon, acel pi bomba me Gat, kede acel pi bomba me Ekuron.

¹⁸ Doko da kicwao cal me iyoono kany me kotimo kede saabu, di lubere kede wel me bomban kany me Pilistia kame jopug kany pugo, bomban kame kocelo kede apama ribo kede calere kalikame kocelo. Kidi ati kame oudo tie i poto ka Yosua i Bet Semes, kame gin kiketo Sanduku me Isikan ka Rwot i ngete, pwodi tie cungo tuno tin bala mujura me gikame otimere.

¹⁹ Rwot oko neko cuo ot kanyaare me Bet Semes pien gin kingio yi Sanduku me Isikan ka Rwot. Jo oko bedo kede iturur pien Rwot oneko jo atot kikom gi.

Sanduku me Isikan i Kiriat Yearim

²⁰ Di jo me Bet Semes oko waco be, “Ngai kame sobolo cungo i nyim Rwot, Rubanga kacil noni? Tuai kame eoti iye tetekeny ewek wan odong ken wa?”

²¹ Aso, gin kiko oro jo but jo me Kiriat Yearim pi waco negi be, “Jo me Pilistia otieko dwoko Sanduku me Isikan ka Rwot. Bia iomenu.”