1 Samuel 30 - Baibuli I Leb Kumam 2013

Daudi Oyi kede Jo Amalek

¹ Nataman do kakame Daudi kede jo mege oko tuno kede Sikilag i ceng me adek mere, kiko udo jo Amalek otieko yako adul kame oudo tie tetu piny me Yuda kede Sikilag. Oudo kitieko suro Sikilag di kiko wange dopodop,

² doko kiko mako mon kede jo dedede kame oudo tie i bomba kitero, jo me ruom apiny kede jo me ruom amalo; gin likame kineko gi, do kitero gi kioto kede gi.

³ Kakame Daudi kede jo mege oko tuno kede i bomba, kiko udo kowange dopodop, doko oudo kotieko mako mon gi, idwe awobe gi, kede anyira gi kotero.

⁴ Di do Daudi kede jo kame oudo en etie kede oko cako koko tuno teko gi me koko oko tiek.

⁵ Mon ka Daudi are da oudo komako oko tero, Akinoam me Jeserel, kede Abigail apuserut ka Nabal me Kamel.

⁶ Daudi oudo tie i peko adwong twatwal; pien jo dedede oudo cuny gi owang pi kei idwe awobe kede anyira gi, omio oudo kitie waco kop me didipo en kede kide. Do Rwot Rubanga mere oko mine nwangcuny.

⁷ Daudi oko waco ne Abiata ngasaseredoti wot ka Akimelek be, “Kel na epod.” Abiata di oko tero ne Daudi epod.

⁸ Daudi di oko penyo Rwot be, “Benyo, awap joyak gi? Abino mako gi i yongayo?” Rwot oko dwoko ne be, “Wap gi; pien ateteni in ibino mako gi i yongayo di iko lako jo kame gin kimako.”

⁹ Aso, Daudi oko yai, en kede cuo tol kanyape (600) kame oudo tie kede. Gin bin kiko tuno i atapar me Besor, kakame kiko weko jo mogo odong iye.

¹⁰ Do Daudi oko meede kede iwapan, en kede cuo tol ongwon (400); cuo icegun tol are oudo oko dong cen, pien gin oudo kiol twatwal likame kikaruno ngolo atapar me Besor.

¹¹ Cuo kame oudo tie upere kede Daudi oko udo dano moro me Misiri i ebar, di gin kiko kele but Daudi. Gin kiko mine cam di eko camo, doko kiko mine pii da di eko mato;

¹² gin bobo da kiko mine anyakini kotuo me epigi, kame kolulungo kede abungeta are me olok kotuo. Kakame en eko tieko kede cam, di do eko udo teko; piento en oudo etieko ceng adek di likame ecamo gimoro akadi mato pii.

¹³ Daudi oko penye be, “Ngadwong nin en ngai, doko in iwok ki tuai?” En di eko dwoko be, “Ango awobi me Misiri, abedo ngatic me dano me Amalek. Ngadwong na oweka cen nataman otieko ceng adek, pien oudo tuwo omaka.

¹⁴ Wan oudo ooto yak i adul me jo Keret kede i adul kame tie i bad tetu piny me Yuda kede i adul me jo me ekeko ka Kaleb, doko da oko wango Sikilag dopodop.”

¹⁵ Daudi oko penye be, “Benyo, ikaruno tera kakame joyak nogo tie iye?” En eko waco ne be, “Kwongere buta i nying Rubanga be likame ibino neka, arabo mina i cing ngadwong na, di ango ako bino teri but gi.”

¹⁶ Kakame en eko tero kede Daudi, joyak nogo oudo osasarun kuno atatai di kitie cam kede amata kede miel, pien jamini kame gin oudo kiyako ki lobo me Pilistia kede Yuda oudo tot twatwal.

¹⁷ Daudi oko yi kede gi cako obai tuno otieno. Likame tie dano moro kame oko bwot kikom gi, kwanyo kenekene awobe tol ongwon (400), kame oudo oko yito ingei asigiran di kiko ringo.

¹⁸ Daudi oko dwoko jo dedede kede jamini da dedede kame oudo jo Amalek otero, kiton mon mege are da.

¹⁹ Likame tie gimoro kame oudo oko rwenyo akadi acel, jo me ruom amalo amoto ruom apiny, idwe awobe arabo anyira, jamini dedede kame oudo koyako; Daudi bin oko dwoko gi dedede kiton leini gi da.

²⁰ Daudi bin oko mano da romini kede doke kame jo Amalek oudo tie kede, di oko poko magonogi tenge kikom leini apat. Jo dedede bin oko waco be magonogo bino bedo cul ka Daudi.

²¹ Di do Daudi oko dok but cuo tol are (200) kame bin ool twatwal di likame kiko karuno meede ot kede en, di bin oko weko gi i atapar me Besor. Cuo nogo bin oko ot siramo Daudi kede jo kame bin tie upere kede. Kakame Daudi oko noko gi kede, en eko moto gi kede yomcuny.

²² Di do cuo acuny gi reco doko di kony gi li kikom cuo kame oudo ooto kede Daudi oko waco be, “Piento gin oudo likame kiko ot kede wa, wan likame oyaro mino gi gimoro kikom jamini kame wan odwoko, kwanyo kenekene ngat acelacel bino tero dako mere kede idwe mege di eko ot.”

²³ Do Daudi oko waco be, “Imiegu na, likame iyarunu timo kamano kede gikame Rwot omio wa; en egwoko wa di eko mino joyak kame oudo osuro wa i cing wa.

²⁴ Likame tie ngat kame twero yei kop wu no. Pien iner me dano kame oto i yi miero bed rom aroma kede me dano kame dong cen daro jamini; gin kipoore nywako di rorom.”

²⁵ Cako cenge nono en eko mino kop nono odoko iswil kame kolubo i Isirael; pwodi etie kamanono tuno tin.

²⁶ Kakame Daudi oko tuno kede Sikilag, en eko poko jamini mogo kame oudo gin kimao di eko cwano ne adiereson mege, gin en joadongo me Yuda, di ewaco negi be, “Magi en giamia kame ango acwao ne wu, kame kopoko kikom jamini kame koyako kibut jokwor ka Rwot.”

²⁷ En bin ecwao giamia nogo but jotel kame bin tie i bomba me Betel, i bomba me Rama kame oudo tie tetu piny me Yuda, i bomba me Yatir,

²⁸ i bomba me Aroer, i bomba me Sipimot, i bomba me Esitemoa,

²⁹ kede Rakal, i bomba me jo Yeramel, i bomba me jo Ken

³⁰ kede da but jotel kame oudo tie i bomban me Koroma, Borasan, Atak,

³¹ kede Keburon. En bin eko cwano giamia kabedere dedede kame en kede jo mege oudo kibedo bebeo iye.