1 Samuel 3 - Baibuli I Leb Kumam 2013

Rwot Oneeno ne Samuel

¹ I kare nono awobi Samuel oudo timo tic ka Rwot di etie i loc ka Eli. Kop ka Rwot oudo likame singo winyere i kare nono, doko da gianyuta oudo nonok.

² Iwor moro acel Eli, ngat kame wange oudo tie do mito to, oudo tie buto i agola mere;

³ Samuel oudo tie buto i kabedo kacil ka Rwot kakame Sanduku me Isikan oudo tie iye, doko etala ka Rubanga da oudo pwodi tie liel.

⁴ Di Rwot oko lwongere be, “Samuel! Samuel!” En eko gamo be, “Atie, adwong!”

⁵ Di eko ringo but Eli di eko waco ne be, “Ango ine, oudo ilwonga.” Do Eli oko dwoko ne be, “Ango likame alwongi, doki ioti ibuti.” Aso, Samuel oko dok buto.

⁶ Rwot bobo oko lwongo Samuel. Samuel oko bobo yai di eko ot but Eli di eko waco ne be, “Ango ine, oudo ilwonga.” Do Eli oko waco ne be, “Woda, ango likame alwongi, doki ioti ibuti.”

⁷ I kare nono Samuel oudo pwodi likame obilo riamakin kede Rubanga i kuo mere, pien oudo pwodi likame Rubanga oyamo kede.

⁸ Rwot bobo oko lwongo Samuel tien me adek; en eko yai eko ot but Eli di eko waco ne be, “Ango ine, oudo ilwonga.” Eli di do oko niang be Rwot en koudo tie lwongo Samuel.

⁹ Pi manono, Eli oko waco ne Samuel be, “Dok ioti ibuti, do ka elwongi bobo, in wace be, ‘Yami, Rwot, ngatic ni tie winyo.’ ” Aso, Samuel oko dok buto.

¹⁰ Rwot oko bino di eko cungo kunono di eko lwongere bala kite kame oudo elwongere kede sek be, “Samuel! Samuel!” Samuel oko gamo be, “Yami, ngatic ni tie winyo.”

¹¹ Di Rwot oko waco ne Samuel be, “Neningo, ango ayapuno timo gimoro ne jo me Isirael, kame bino mino jo dedede kame bino winyo kom gi to.

¹² I ceng nono ango abino cobo timo can dedede kame oudo ango awaco be bino poto i ot ka Eli, cako ki agege tuno i ajikini mere.

¹³ Pien ango atieko waco ne be, ango ayapuno mino alola kame bedo nakanaka i ode, pi gikarac kame en engeo; pien awobe mege otimo na gikarac do en likame eko gengo gi.

¹⁴ Pi mano, ango akwongere but jo me ot ka Eli be, likame tie giayala arabo giamia moro kame bino twero weno tenge gikarac noni.”

¹⁵ Samuel oko buto paka piny ru; odiko en eko yabo ekeko me ot ka Rwot. En oudo etie kede lworo me waco ne Eli kop me gianyuta nono.

¹⁶ Do Eli oko lwongo Samuel di eko waco ne be, “Samuel, woda!” Samuel oko dwoko be, “Atie.”

¹⁷ Eli oko penye be, “Kop nyo kame Rwot owaco ni? Kur imung na. Rubanga bino mini alola ka likame in iwaco na gi dedede kame en ewaco.”

¹⁸ Aso, Samuel oko waco ne kop dedede; likame emungo ne gimoro. Eli oko waco be, “En ebedo Rwot, en etim gikame ber kibute.”

¹⁹ Samuel oko dongo, Rwot oudo tie kede en, di eko mino gi dedede kame Samuel owaco ocobere kakare.

²⁰ Di jo dedede me Isirael, cako ki Dan tuno Beereseba oko ngeno be Samuel oudo obedo enabi agenere ka Rwot.

²¹ Rwot oko meede nyutere i Silo, kakame en oudo enyutere ne Samuel kiye di eko yamo kede. Samuel oko donyo yamo kede jo me Isirael dedede.