1 Samuel 28 - Baibuli I Leb Kumam 2013

¹ I kare nono jo me Pilistia oudo oko coko isirikalen gi pi ot yi kede jo me Isirael. Akis oko waco ne Daudi be, “In ingeo kiber be, in karacel kede jo ni iyarunu upere keda ot yi.”

² Daudi oko waco ne Akis be, “Mano ber twatwal, pi mano, in ibino ngeno gikame ango akaruno timo.” Akis oko waco ne Daudi be, “Mano ber twatwal, ango abino mini ibedo ngagwoka pi kare me kuo na lung.”

Saulo Openyo Emuron

³ Kakame Samuel oto kede, jo me Isirael dedede oko koke di kiko yike Rama, bomba me turgi. Saulo oudo otieko riamo imuroko kede jojwogi dedede i Isirael.

⁴ Isirikalen me Pilistia bin oko cokere, di kiko gero kimere gi Sunem. Saulo da oko coko jo me Isirael dedede, di kiko gero kimere gi Gilboa.

⁵ Kakame Saulo oko neno kede isirikalen me Pilistia, lworo oko make di cunye oko miel kitek.

⁶ Saulo oko penyo Rwot gi me atima, do Rwot likame oko dwoko ne kop moro, akadi i lek arabo Urim amoto kibut inabin.

⁷ Di do Saulo oko waco ne jotic mege be, “Mounu nango amuron moro, tetekeny aot bute di ako penye.” Jotic mege oko waco ne be, “Amuron acel tie Enedor.”

⁸ Aso, Saulo oko ngapo igoen apat tetekeny kur jo twer ngene, en eko ot kuno kede cuo ace are. Gin bin kiko ot but dako nono iwor. Di eko waco ne be, “Ango akwai ipeny na tipo moro, doko lwong na tipo me ngat kame ango ayaro waco ni.”

⁹ Dako nono oko waco ne be, “Ateteni in ingeo gikame Saulo otieko timo, epone kame en eriamo kede imuroko kede jojwogi i Isirael. Pinyo do komio in itie ciko na owic kame bino kelo na to?”

¹⁰ Do Saulo oko kwongere bute i nying Rwot be, “Alairo i nying Rwot kakuo, likame tie alola kame kobino mini pi timo gini.”

¹¹ Di do dako nono oko penye be, “Ngai kame in imito be ango alwong ni?” En eko dwoko ne be, “Lwong nango tipo ka Samuel.”

¹² Kakame dako nono oko neno kede Samuel, en eko dwilao kitek di eko penyo Saulo be, “Pinyo bo komio ingala? Kom in Saulo!”

¹³ Abaka oko waco ne be, “Kur ibed kede lworo; nyo kame itie ineno?” Dako nono oko dwoko ne Saulo be, “Atie neno tipo moro tie wok ki piny.”

¹⁴ En eko penye be, “Ecal benyo?” Dako nono oko waco ne be, “Icuo oti inonono atie wok malo; en engapo ekanso.” Di do Saulo oko niang be Samuel oudo inonono, di en eko riebere piny pi mine wor.

¹⁵ Samuel oko Penyo Saulo be, “Pinyo kara komio in ilola kede lwonga wok ooko?” Saulo oko gamo be, “Ango atie i peko adwong twatwal, pien jo Pilistia otieko bino pi yi keda, doko Rubanga otieko weka. En likame bobo edwoko kop na moro akadi acel, akadi kibut inabin arabo i lek; en komio ango alwongi pi waco na gikame apoore timo.”

¹⁶ Samuel oko penye be, “Pinyo komio ipenya di Rwot otieko weki eko doko ngakwor ni?

¹⁷ Rwot otieko timo ni gikame oudo emia awaco ni; pien Rwot otieko kwanyo ajakanut ki cingi, di eko mino Daudi.

¹⁸ Pien in bin likame itimo gikame oudo Rwot owaco, piento likame iko mino lilo mere atek oko cobere i kom jo Amalek. Kop nono en komio Rwot tin otieko timo nin gi noni.

¹⁹ Medo i wi manono, Rwot bino mino jo me Isirael karacel kede in i cing jo me Pilistia; doko diki in kede idwe ni awobe iyarunu bino nywako keda bedo kan; Rwot bino da mino isirikalen me Isirael i cing jo Pilistia.”

²⁰ Oyotoyot di Saulo latakin piny kede lworo atek pi kope kame Samuel owaco; doko teko oudo otiek i kome pien cenge nono oudo en ebedo piny yuluyul kede iwor da kiakia abongo camo gimoro.

²¹ Dako nono oko ot but Saulo, kakame en eko neno kede be oudo lworo atek omake, en eko waco ne be, “Neningo, ango awinyo kop nin; ango oudo ajalo kuo na di ako timo gikame in oudo iwaco na.

²² Pi mano, nataman mito ida iwiny kop me ngatic ni; wek kong akel ni cam moro atitidi. Cami, tetekeny iud teko me ot.”

²³ Saulo oko dagi di ewaco be, “Ango likame ayaro cam.” Do jotic mege karacel kede dako nono oko dine; di en eko winyo kop gi. Di eko yai ki piny eko bedo i kabuto.

²⁴ Oudo dako nono tie kede roya kocwe i ot. Awakawaka di en eko ngole, eko juko moko alos, eko nyongo, di eko tedo mugati kame arup li kiye.

²⁵ En eko keto gi i nyim Saulo kede jotic mege, di gin kiko camo. Di do gin kiko yai di kiko ot iwor nono.