1 Samuel 27 - Baibuli I Leb Kumam 2013

Daudi bobo Oringo Gwokere but Jo Pilistia

¹ Daudi oko waco i cunye be, “Ceng moro acel Saulo bino neka; likame tie gimoro ace aber kalamo ango lwi ot i piny me jo Pilistia; di do cuny Saulo ko bino kwanyere tenge ki mona i Isirael, di ango ako bino bwot ki cinge.”

² Aso, Daudi oko yai kede jo tol kanyape kame oudo en etie kede di eko ot but Abaka Akis wot ka Maok me Gat.

³ Daudi oko bedo Gat kede Akis, en kede isirikalen mege, dano acelacel kede jo me ode. Daudi oudo tie kuno kede mon mege are, Akinoam me Jeserel kede Abigail me Kamel, apuserut ka Nabal.

⁴ Kakame oko waco ne kede Saulo be Daudi oudo otieko ringo Gat, en do eko weko mone.

⁵ Di do Daudi oko waco ne Akis be, “Ka cunyi yom keda, mia bomba katitidi abed iye; pien pinyo kamio ango ngatic nin anywako bedo kedi i bomba me abaka?”

⁶ Aso, cenge nono Akis oko mine Sikilag; manono en komio bomba me Sikilag oko bedo me ka abakai me Yuda tuno tin.

⁷ Daudi bin oko tieko mwaka acel kede dwete ongwon i piny me Pilistia.

⁸ I kare nono Daudi kede jo mege oko donyo ot suro jo me Gesur, Girisi kede Amalek; pien kabedere nogo en kame oudo jo bedo i yi gi, cako ki Telam i yongayo aoto Sur tuno i piny me Misiri.

⁹ Daudi oudo suro kabedere nogo di eko neko cuo kede mon dedede, do romini, doke, pundan, aguraguran kede igoen en oudo etero edok kede gi but Akis.

¹⁰ Kame Akis oko penye be, “Alu kame in oudo ioto suro i ceng atin?” Daudi oudo waco ne be, “Ango oudo aoto Yuda, i bad tetu piny mere,” arabo be, “Ango oudo aoto ne jo Jaramel,” amoto be, “Ango oudo aoto ne jo Ken.”

¹¹ Daudi oudo likame weko ngatamoro dong kuo, dako akadi icuo, kame koto oudo komako di oko tero Gat, piento en oudo eparo be, “Cengemogo kiko bino waco be, ‘Daudi otimo gikacal kaman.’ ” Manono en gikame en ebedo timo pi kare dedede kame en ebedo kede i piny me jo Pilistia.

¹² Akis oudo oketo gen mere i kom Daudi di eparo be, “En etieko mino cuny jo mege me Isirael otieko dage kitek; pi mano, en do ebino bedo ngatic na nakanaka.”