1 Samuel 26 - Baibuli I Leb Kumam 2013

Daudi Odagi Neko Saulo Bobo

¹ Jo mogo me Sip bobo oko bino Gibea but Saulo di kiko waco ne be, “Daudi tie pwono i wi moru me Kakila, kame pimere kede Jesimon.”

² Di Saulo oko yai eko ot i wi tim me Sip kede cuo 3,000 kame koyero i Isirael, pi mono Daudi.

³ Saulo kede jo mege oko gero kimere gi i nget yongayo, i wi moru me Kakila, kame pimere kede Jesimon. Do Daudi oudo pwodi tie i wi tim. Kakame en eko niang kede be Saulo oudo otieko bino mone i wi tim,

⁴ en eko cwano jo pi begao, di oko mine engeo be ateteni Saulo oudo otieko tuno.

⁵ Di do Daudi oko yai ot di eko tuno kakame Saulo oudo tie iye; di eko neno kakame Saulo oudo tie buto iye kede Abuneri wot ka Ner, ngatel me isirikalen. Saulo oudo tie buto i diere me isirikalen, di isirikalen oluke.

⁶ Di Daudi oko waco ne Akimelek dano me Kiti, kede ne Abisai omin me Joab (toto gin oudo Seruya) be, “Ngai kikom wun kame bino ot keda kakame Saulo tie iye kede jo mege?” Abisai oko gamo be, “Ango abino ot kedi.”

⁷ Aso, iwor nono Daudi kede Abisai oko ot kakame isirikalen ka Saulo oudo tie iye, di kiko udo Saulo tie nino i diere me isirikalen di esipo tong mere kawie; doko oudo Abuneri kede isirikalen obuto kiluke diere.

⁸ Abisai oko waco ne Daudi be, “Tin do Rubanga otieko mino ngakwor ni i cingi; nataman do wek ango acobe kede tong tien acel kiton tong pelao moko piny; likame abino cobe tien are akadi acel.”

⁹ Do Daudi oko waco ne Abisai be, “Kur ineke; pien ngai kame karuno tingo cinge timo ne dano kame Rwot owiro raco, di en eko bedo abongo raco?”

¹⁰ Daudi oko waco be, “Alairo i nying Rwot kakuo be, Rwot bino neko Saulo; arabo ceng mere bino tuno di eko to; amoto ebino ot i yi di eko to iye.

¹¹ Rwot likame yei be ating cinga pi timo raco ne dano mere kame kowiro; in kwany tong mere kame tie kawie, kede opoko me pii mere, di wan oko ot.”

¹² Aso, Daudi oko kwanyo tong kame oudo tie kawic ka Saulo kede opoko me pii, di gin girgi kiko yai kioto. Likame bin tie ngatamoro oko neno, arabo ngeno gi kotimere arabo akadi cei da; jo dedede oudo onino pien Rwot oudo omio nino atek omako gi.

¹³ Di do Daudi oko ngolo aditot tetuca eko ot cungo i wi emukura kame oudo tie kakabor; dierediere me kakame en oudo etie iye kede kakame Saulo gini oudo tie iye oudo lac twatwal.

¹⁴ Daudi di oko lelemo but isirikalen ka Saulo kede Abuneri wot ka Ner, di elwongere be, “Abuneri! Benyo, likame iyaro gamo doga?” Di do Abuneri oko gamo be, “Ngai ino kame tie lolo abaka di etie nino?”

¹⁵ Daudi oko penyo Abuneri be, “Mam in icuo? Ngai kacal bala in i Isirael? Pinyo bo komio in likame iko gwoko ngadwong ni abaka? Pien ngatamoro oudo odonyo kakame wun itienu iye pi neko ngadwong ni abaka.

¹⁶ Gikame in itimo noni likame ber. Alairo i nying Rwot kakuo, in ipoore to, pien in likame iko gwoko ngadwong ni, dano kame Rwot owiro. Neningo do nan, tong ka abaka tie tuai, arabo opoko me pii kame oudo tie kawie?”

¹⁷ Saulo oko ngeno dwan Daudi, di eko penyere be, “Daudi woda, mam dwani ine?” Daudi oko gamo be, “Ebo, dwanango inonono, ngadwong na abaka.”

¹⁸ Di eko medo be, “Pinyo kara komio in adwong na itie wapa? Nyo kame atimo? Raco na nyo?

¹⁹ Nataman do adwong na abaka miero iwiny kop na, ango ngatic ni. Ka Rwot en kosupi i koma, akwae eyei gamo giayala; do ka jo en kotimo, akwao ilam ka Rwot mak gi, pien gin kitieko riamango tenge ki iner na me lobo ka Rwot di kiwaco na be aot awor rubangan apat.

²⁰ Aso nataman kur imi remo na ony piny kakame Rwot li kiye; pien abaka me Isirael otieko bino pi mono abulolo acel, bala dano adwaro etakura i wi mori.”

²¹ Di do Saulo oko waco be, “Ango atimo rac; dwog do okwe, Daudi woda, pien ango likame bobo abino timo ni rac, pi kuo nango tin oudo obedo gikame pire tek kibuti. Ango abedo timo gi me mingo, doko atimo gikarac twatwal.”

²² Daudi oko dwoko be, “Tong ine, Okwe abaka! Cwai ngat acel kikom awobe ni bin gami.

²³ Rwot timo bero but jo dedede pi gi kopoore kame kitimo, kede pi genere gi; pien Rwot oudo omi i cinga i ceng katin, do ango likame ako tingo cinga pi timo can i kom dano ka Rwot kame ewiro.

²⁴ Bala kame tin kuo nin obedo kede gikame pire tek kibuta, ango akwao be kuo nango da bed kamanono but Rwot, doko akwae elaka ki peko dedede.”

²⁵ Di do Saulo oko waco ne Daudi be, “Rubanga mi winyo, Daudi woda! In ibino timo jamini atot doko gi dedede kame in itimo bino cobere.” Aso, Daudi gire oko ot, di Saulo da oko dok paco.