1 Samuel 25 - Baibuli I Leb Kumam 2013

To ka Samuel

¹ Samuel bin oko to di jo dedede me Isirael oko cokere karacel pi koke. Gin bin kiko yike Rama i paco mere. I cen mere Daudi oko yai di eko ot i wi tim me Paran.

Daudi kede Dako ka Nabal

² Oudo tie icuo moro Maon, kame jamini mege oudo tie i bomba me Kamel. En oudo ebaro twatwal; oudo etie kede romini tutumia adek kede diegi tutumia acel. I Kare nono en oudo etie Kamel nyaro yer me romini.

³ Nying icuo nono oudo Nabal, kede nying dako mere oudo Abigail. Dako nono oudo riek doko ecil, do icuo oudo cunye kec doko engaworo; en oudo dano me ot ka Kaleb.

⁴ Daudi oko winyo i wi tim kuno be Nabal oudo tie nyaro yer me romini mege.

⁵ Aso, Daudi oko cwano awobe tomon pi gin ot Kamel but Nabal pi tero ne amot mere.

⁶ En ewaco negi be kimote be, “Mulem bed buti, but jo me odi kede i kom gi dedede kame in itie kede.

⁷ Ango awinyo be jo ni tie nyaro romini; aso jokwai romini nin oudo tie kede wan, di wan likame oko timo negi raco moro, doko i kare dedede kame gin oudo kitie kede i Kamel, likame tie gimoro kame gin kiko rwenyo.

⁸ In peny gin, kibino yamo ni. Pi mano, ango akwai ibed kede cuny aber but awobe na, pien wan tin otie i ceng me ebaga. Ango akwai imi gimoro kenekene kame in itie kede but jotic ni kede but wodi Daudi.”

⁹ Kakame jo ka Daudi oko tuno kede but Nabal, gin kiko waco ne kop noni dedede i nying Daudi; di gin kiko bedo daro.

¹⁰ Do Nabal oko gamo dog jotic ka Daudi be, “Daudi en ngai? Wot ka Yese nono en ngai? I kare noni tie ipasoi atot kame tie ringo tenge kibut jodongo gi.

¹¹ Benyo, ango akwany mugati na kede pii na kede ringo me leini kame angolo ne jonyar yer me romini na, di ako mino but jo kalikame ango angeo kakame kiwok kiye?”

¹² Jo ka Daudi oko dok di kiko tatamo ne kop kame Nabal owaco.

¹³ Daudi oko waco ne jo mege be, “Ngat acelacel kwany epima mere!” Di ngat acelacel oko rwako epima mere i piere; Daudi da oko ngapo mere; di jo aromo tol ongwon oko lubo Daudi, do jo tol are en oko dong daro jame.

¹⁴ Ngat acel kikom jotic ka Nabal oko waco ne Abigail dako ka Nabal be, “Daudi oudo ooro jo obino i wi tim pi kelo amot but ngadwong wa, do en eko yeyeto gi.

¹⁵ Aso di gin oudo kitimo wan ber twatwal, di wan likame oko udo peko moro, doko likame oko rwenyo gimoro i kare dedede kame wan obedo kede gin obar.

¹⁶ Gin oudo kibedo gwoko wan iwor kede i ceng, i kare dedede kame wan oudo obedo kede gin di okwao romini wa.

¹⁷ Nataman mito in ingei di iko neno gikame ipoore timo; pien kotieko iikere pi timo can ne ngadwong wa kede jo me ode dedede; en ikiteso mege reco, omio likame tie dano kame karuno yamo kede.”

¹⁸ Di do awakawaka Abigail oko kwanyo mugati tol are, isaun are me lau kopong kede bwini, ringo me romini kany kame kotieko iiko, ideben kany me mawele kame kocelo, abungeta tol acel me olok kotuo, kede anyakini tol are kotuo me epigi kame kolulungo. En eko tweno gi ingei pundan

¹⁹ di eko waco ne jotic mege be, “Wun telunu nango yongayo; ango atie lubo wu.” Do en likame eko waco ne cware Nabal.

²⁰ Di bin en ebedo ingei punda mere etie ot di eko tuno kakame moru ogalao, en eko riamo kede Daudi kede jo mege di oudo kitie bino.

²¹ Daudi oudo pwodi inonono inonono owaco be, “Ateteni ango oudo kom abedo gwoko jamini me dano ni i wi tim me nono nono, di likame tie gire moro oko rwenyo; do en eko cula kede raco pi bero kame ango atimo ne.

²² Ango akwao Rubanga emia alola ka odiko otuno di pwodi ango aweko icuo acel kikom jo mege likame aneko.”

²³ Kakame Abigail oneno kede Daudi, awakawaka di en ewok piny ki ngei punda, eko riebere piny i nyim Daudi.

²⁴ En eriebere piny katiene di eko waco ne be, “Adwong na, wek raco nono bed i wi ango kena, akwai iyei na yamo kedi, di iko winyo kope me ngatic ni.

²⁵ Ngadwong na, ango akwai be kur iket cunyi i kom Nabal, dano kame ikiteso mege reco nono; pien bala kame nyinge nyuto, en cal mere inonono; nyinge dwong mere en ngamingo, doko tim me mingo tie ne; do ngadwong, ango ngatic nin, likame oudo aneno awobe kame in icwao.

²⁶ “Ngadwong na, nataman do bala kame Rwot otieko gengi kede ki onyo remo kede ki timo onyanga i kom jokwor ni, ango alairo buti i nying Rwot kakuo be jokwor ni kede jo amito timo nin raco bino udo alola bala Nabal.

²⁷ Aso, ango akwai iyei gamo giamia kame ngatic nin okelo ni, tetekeny imi awobe nin kame tie upere kedi.

²⁸ Ango akwai isasiro raco kame ango ngatic ni atimo; pien ateteni Rwot bino mino ajakanut bedo i ekeko ni nakanaka, pien in itie yi ne Rwot; doko in likame ibino timo gimoro arac i kare me kuo ni.

²⁹ Ka ngatamoro oko suri di emito kwanyo kuo ni, Rwot Rubanga ni bino gwoko kuo ni; do kuo me jokwor nin en ebino lwomo tenge bala kame dano lwomo kede engaro kede aporocet.

³⁰ Kame do Rwot otieko timo nin gi dedede abeco kame en etieko yamo i komi, di eko keti bedo ngapug me Isirael,

³¹ likame tie gimoro bobo kame bino mini ibedo kede iturur, arabo kame bino ramo cunyi, pien udo likame ionyo remo moro abongo tien kop, arabo itimo onyanga. Kame Rwot otieko timo ne in bero, akwai iyutuno ada.”

³² Daudi oko waco ne Abigail be, “Pak bed but Rwot, Rubanga me Isirael, ngat kocwai pi bino riamo kede ango i ceng atin!

³³ Pwoc bed but Rubanga pi rieko kame in inyuto, doko apwoyo ida ngat kame tin igenga ki timo raco me onyo remo kede ki timo onyanga ango kikoma!

³⁴ Pien ango alairo i nying Rwot Rubanga akuo me Isirael ngat kogenga timo ne wu raco be, ka koto oudo in likame isusunyo bino riamo keda, ateteni tuno diki odiko oudo koto likame Nabal odong kede akadi icuo acel.”

³⁵ Di do Daudi oko gamo gikame en oudo ekelo ne, di eko waco ne be, “Dok paco ni kede mulem; neni, ango atieko winyo dwani, doko atieko yei timo gikame ikwao.”

³⁶ Kakame Abigail oko tuno kede but Nabal, eko ude etie i ot i ebaga kame cal bala me abaka. Cuny Nabal oudo yom twatwal, pien oudo etieko mer kitek; en likame eko yamo ne kop moro tuno odiko di ceng owok.

³⁷ Odiko di do bwini otiek ki wi Nabal, dako mere oko tatamo ne gi dedede kotimere; cunye oko poto di kome lung oko to.

³⁸ Ingei ceng aromo bala tomon Rwot oko kwanyo kuo ka Nabal.

³⁹ Kakame Daudi oko winyo kede be Nabal oto, en eko waco be, “Pak bed but Rwot ngat kongolo kop i wi Nabal pi ayet kame eyeta kede, doko da en etieko genga ango ngatic mere ki timo gikarac; Rwot otieko dwoko ne Nabal raco mere i wie kene.” Di do Daudi oko cwano kop ne Abigail me supe doko dako mere.

⁴⁰ Kakame jotic ka Daudi oko tuno kede but Abigail i Kamel, gin kiko waco ne be, “Daudi ocwao wan be oteri ot bedo dako mere.”

⁴¹ Abigail oko yai di eko kudo wie piny eko waco be, “Ango apasoit mere kame bino lwoko tien jotic me ngadwong na.”

⁴² En eko yai awakawaka di eko yito ingei punda di eko ot; anyira jotic mege kany oko nyamaro en. En bin eko lubo jo kame Daudi oudo ooro di eko doko dako mere.

⁴³ Daudi oudo otieko nyomo Akinoam me Jeserel, nataman di Abigail da oko doko dako mere.

⁴⁴ Do Saulo oudo otieko mino nyare kame nyinge Mikal, kame oudo obedo dako ka Daudi, but Palati wot ka Lais, kame oudo wok ki bomba me Galim.