1 Samuel 24 - Baibuli I Leb Kumam 2013

Daudi Odagi Neko Saulo

¹ Kakame Saulo odwogo kede i wapo jo Pilistia, oko waco ne be Daudi oudo tie i wi tim me Engedi.

² Di Saulo oko tero isirikalen 3,000 kame koyero ayera, di eko ot kede gi tetu lela kame kolwongo be Lela me Diegi me Obar pi mono Daudi kede jo mege.

³ En eko tuno i abo kame bin kio kede anok me romini kame oudo tie i nget yongayo; di en eko donyo iye pi konyere. Aso, Daudi kede jo mege oudo tie pwono i tielo me abo nono.

⁴ Jo ka Daudi oko waco ne be, “Tin en ceng kame Rwot oudo owaco ni be, ‘Abino mino ngakwor ni i cingi, di in iko bino timo ne bala kame imito.’ ” Di do Daudi oko yai di eko cede eko ngolo lak ekanso ka Saulo.

⁵ I cen mere Daudi oko bedo kede cwercuny piento en oudo engolo lak ekanso ka Saulo.

⁶ En eko waco ne jo mege be, “Ango akwao Rwot kur emia atim ne ngadwong na gikame cal kamano, me ango tingo cinga pi timo raco ne dano mere kame kowiro; piento en etie dano kame Rwot oyero.”

⁷ Aso, Daudi oko dagi kede tam ka jo mege di likame eko yei negi suro Saulo. Di do Saulo oko yai malo eko donyo ooko me abo, di eko meede kede ot mere.

⁸ I cen mere Daudi da oko yai di eko donyo ooko me abo nono di eko lwongo Saulo be, “Abaka ngadwong na!” Saulo oko lokere di eko neno cen, Daudi oko luro wie piny pi mine wor.

⁹ Daudi oko waco ne Saulo be, “Pinyo komio in iwinyo kop me jo awaco be ango amito timo nin raco?

¹⁰ Neningo, tin noni in itieko neno kede wangi epone kame Rwot omi kede i cinga i abo; jo mogo oudo osupa be aneki, do ango ako weki. Ango awaco i cunya be, ‘Ango likame abino tingo cinga keto i kom ngadwong na; piento en etie dano kame kowiro me ka Rwot.’

¹¹ Nen kong, papa na, nen lak ekanso ni ine i cinga; pien kite kame ateteni ango angolo kede lak ekanso nin di likame ako neki, in iromo do ngeno be ateteni ango ali kede raco moro arabo mit me jemo nin. Ango oudo likame atimo dub moro buti bed bala in itie dwara pi mito kwanyo kuo na.

¹² Ango akwao Rwot epok i diere nango kedi ngat kame tie kede raco! Akwae eniang gikame in itimo na; do ango likame abino keto cinga i komi.

¹³ Bala kame agole kariki sek waco kede be, ‘Jo areco en kame timo tim areco’; do ango likame abino keto cinga i komi.

¹⁴ Ngai kame abaka me Isirael obino pi mono? Ngai kame in itie wapo? Ogwok oto? Abulolo acel?

¹⁵ Pi mano, ango akwao Rwot engol kop i diere nango kedi. Ango akwae enen kop nono, di eko pido pira, di eko laka ki cingi.”

¹⁶ Kakame Daudi bin otieko yamo ne kede Saulo kope nogi, Saulo oko penye be, “Mam dwani ine, atin na Daudi?” Saulo oko donyo boroboro koko.

¹⁷ Di do eko waco ne Daudi be, “In itimo gi kopoore kalamo ango; pien in itimo nango bero, aso di ango atimo ni raco.

¹⁸ Ceng atin in itieko nyuto nango epone kame in itieko timo na kede bero, pien in likame iko neka kakame Rwot omia kede i cingi.

¹⁹ Pien ngai kame ngakwor mere otieko poto i cinge di eko weke likame etimo ne can? Ango akwao Rwot etim ni bero pi gikame in itimo nango i ceng atin.

²⁰ Nataman ango angeo do ateteni be in ibino bedo abaka, doko in en ibino mino ajakanut me Isirael cungo.

²¹ Pi mano, ango amito in ikwongere i nying Rwot be in likame ibino neneko ikwae na, kede be in likame ibino mino nyinga rwenyo i ot ka papa na.”

²² Aso, Daudi oko kwongere but Saulo. Di do Saulo oko ot paco; do Daudi kede jo mege oko dok kapwono gi.