1 Samuel 23 - Baibuli I Leb Kumam 2013

Daudi Olako Bomba me Keila

¹ Ceng moro acel jo mogo oko waco ne Daudi be, “Jo me Pilistia tie yi kede jo me bomba me Keila, doko kitie yako engano kame komoo i diakale me canyo.”

² Daudi oko penyo Rwot be, “Benyo, aot di ako suro jo me Pilistia nogi?” Rwot oko waco ne Daudi be, “Oti di iko suro gi tetekeny ilak bomba me Keila.”

³ Do jo ka Daudi oko waco ne be, “Neningo, wan olworunu i Yuda kan; do ka ootunu Keila yi kede isirikalen me Pilistia, obinunu bedo lwor benyo?”

⁴ Di Daudi bobo oko penyo Rwot. Rwot oko dwoko ne be, “Ebo, ot isur bomba me Keila; pien ango ayaro mino jo me Pilistia i cingi.”

⁵ Aso, Daudi kede jo mege oko ot i bomba me Keila di kiko yi kede jo me Pilistia; kineneko jo atot kikom gi di kiko tero doke gi. Epone no en kame Daudi bin olako kede jo me Keila.

⁶ I kare kame bin Abiata wot ka Akimelek olwi kede di eko ringo but Daudi i Keila, oudo emako epod eoto kede.

⁷ Oko bin waco ne Saulo be Daudi oudo ooto Keila. Saulo oko waco be, “Rubanga otieko mine i cinga; piento en edonyo i bomba kame kocelo doko di etie kede irutei kame kocego, manono otieko mine egolorokin kene.”

⁸ Saulo oko lwongo isirikalen mege dedede pi ot Keila yi, pi gin lukaro Daudi kede jo mege.

⁹ Kakame Daudi oko winyo kede be Saulo oudo tie iikere pi sure, en eko waco ne Abiata ngasaseredoti be, “Kel epod kan.”

¹⁰ Di do Daudi oko waco be, “Okwe Rwot Rubanga me Isirael, ango atieko winyo be Saulo tie iikere pi bino Keila di eko tuturo en pi ango ngatic ni.

¹¹ Benyo, Saulo oyaro bino bala kame ango atieko winyo? Okwe Rwot Rubanga me Isirael, ango akwai iyama, ango ngatic ni.” Rwot oko waco ne be, “En eyaro bino.”

¹² Di Daudi bobo oko penye be, “Benyo, jopiny me Keila bino mino ango kede jo na i cing Saulo?” Rwot oko dwoko ne be, “Gin kibino mino wu i cinge.”

¹³ Aso, Daudi kede jo mege kame oudo romo bala 600 oko yai di kiko weko bomba me Keila; gin kiko bedo ot aota. Kakame Saulo oko winyo kede be Daudi oudo otieko lwi ki Keila, en eko do weko ot kunono.

Daudi i Piny kobedo Mori Mori

¹⁴ Daudi oko dong bedo kakopwono mere i piny kobedo mori mori, i wi tim kiyapiyapi kede bomba me Sip. Saulo oko bedo mone ceng dedede, do Rwot likame oko mine i cinge.

¹⁵ Di Daudi oudo tie Kores i wi tim kiyapiyapi kede Sip, en eko ngeno be Saulo oudo obino tie mito neke.

¹⁶ Jonasan, wot ka Saulo oko yai di eko ot Kores but Daudi; en eko mine nwangcuny di ewaco ne be Rwot bino gwoke.

¹⁷ En ewaco ne be, “Kur ibed kede lworo; pien Saulo papa nango likame bino muli; in ibino bedo abaka me Isirael, di ango ako bino bedo ngat alubo tieni; papa nango Saulo ngeo be manoni en gikame bino timere.”

¹⁸ Di do gin jo are nogi kiko timo isikan i nyim Rwot; Daudi oko dong bedo Kores, di Jonasan oko dok paco.

¹⁹ Di jo mogo me Sip oko ot Gibea but Saulo di kiko waco ne be, “Daudi tie pwono i adul wa i kakopwono mere i Kores, i moru me Kakila, kame tie tetu piny me Jesimon.

²⁰ Nataman, Okwe abaka, esawa moroni kenekene kame in imito bino kede, in bia; di wan oko bino make oko mine i cingi.”

²¹ Saulo oko waco be, “Akwao Rwot emi wu winyo pi tim me kisa kame inyutunu na!

²² Otunu kong bobo imedunu niang kiber; udunu kakame en etie iye kikokome, kede ngai kotieko nene kunono; pien kotieko waco na be en eriek twatwal.

²³ Morenu di ikounu ngeno kabedo dedede kame en epwono iye, di ikounu dwoko na kop me ateni. Di do ango ako bino ot karacel kede wu; di ka en pwodi etie i adul nono, ango abino mone i kabedere dedede me Yuda.”

²⁴ Di do jo me Sip nogo oko yai di kiko dok Sip kiweko Saulo cen. I kare nono Daudi kede jo mege oudo tie i wi tim me Maon, i aditot kame tie tetu piny me Jesimon.

²⁵ Saulo kede jo mege oko ot mone. Kakame oko waco ne kede Daudi, en eko ot i lela kame bin tie i wi tim me Maon di eko donyo bedo iye. Kakame Saulo oko winyo kede be Daudi oudo tie kunono, en eko wape i wi tim me Maon kunono.

²⁶ Saulo kede jo mege oko ot i nget lela tetucel, di Daudi kede jo mege oudo tie tetu ocelu me lela. Daudi kede jo mege oudo tie susunyo ot tenge wek kirweny kibut Saulo kede jo mege kame oudo tie noko gi pi mako gi.

²⁷ Di do ngaor oko bino but Saulo di ewaco ne be, “Susunyo dok, pien jo Pilistia otieko suro piny wa.”

²⁸ Saulo oko weko do wapo Daudi di eko dok yi kede jo Pilistia. Manono en komio oko do lwongo kabedo nono be Lela me Bwot.

²⁹ Daudi oko do yai ki kunono di eko donyo pwono i adul me Engedi.