1 Samuel 22 - Baibuli I Leb Kumam 2013

Saulo Omio Koneko Josaseredoti

¹ Daudi oko yai ki bomba me Gat, di eko lwi ot bedo i abo kiyapiyapi kede bomba katitidi kame kolwongo be Adulam. Kakame imiegu mege kede jo me ot ka papa mere dedede oko winyo kede be en oudo etie kunono, gin kiko ot bute.

² Jo dedede kame oudo tie i peko, jo dedede kame oudo tie kede banyi, karacel kede jo kame oudo winyo rem i kuo gi, oko cokere bute. Cuo kame oudo romo jo tol ongwon; di en eko doko ngatel gi.

³ Daudi oko yai ki kuno di eko ot Misipe me Moab. En eko waco ne abaka me Moab be, “Ango akwai iyei ne papa na kede toto na bino bedo kedi, tuno kame ango angeo gikame Rubanga bino timo na.”

⁴ Aso, en eko weko jonywal mege but abaka me Moab, di gin kiko bedo kede pi kare lung kame Daudi oudo bedo kede i kapwono mere.

⁵ Di do Enabi Gad oko bino but Daudi di eko waco ne be, “Kur idong bedo kan; yai iko ot i lobo me Yuda.” Aso, Daudi oko yai di eko ot i abum me Keret.

⁶ Ceng moro acel, Saulo oudo tie bedo i dud cwaya i wi emukura i Gibea, di emako tong mere i cinge, jotic mege di cungo rimaro en. Oko waco ne be oudo kotieko ngeno kakame Daudi karacel kede jo mege oudo tie iye.

⁷ Saulo oko waco ne jotic mege be, “Nataman winyunu, wun jo me ekeko ka Benjamin; iparunu be Daudi bino mino wun dedede poti me apura kede poti me olok? Iparunu be en ebino mino wu ibedunu jotel me isirikalen mege?

⁸ Benyo, kop nono en komio wun iribunu kop i koma? Likame tie ngatamoro kikomu oko tuco na be woda oudo oribere kede Daudi i koma. Likame tie ngatamoro aparo pira arabo kame tuco na be woda otieko supo ngatic na i koma, pi kina, bala kame nataman etie timo.”

⁹ Doeg dano me Edom, kame oudo tie cungo karacel kede jotic ka Saulo oko waco be, “Ango aneno Daudi kakame oudo eoto kede Nob but Akimelek wot ka Akitub.

¹⁰ Akimelek bin oko penyo Rwot pire, di eko mine cam kede epima ka Goliat dano me Pilistia.”

¹¹ Manono oko mino abaka ocwao dano ot lwongo ngasaseredoti Akimelek wot ka Akitub kede jo me ot ka papa mere dedede, gin josaseredoti kame bin tie Nob; di gin dedede kiko bino but abaka.

¹² Saulo oko waco ne Akimelek be, “Nataman winyi, wot ka Akitub.” En di eko gamo be, “Ango ine, adwong na.”

¹³ Saulo oko penye be, “Pinyo komio in kede Daudi iribunu kop i koma? Pinyo komio in imie cam kede epima, di doko iko penyo Rubanga pire? Pinyo komio in isupe i koma pi en donyo kina bala kame nataman etie timo?”

¹⁴ Di Akimelek oko gamo dog abaka be, “Ngai kikom isirikalen nin dedede kame genere bala Daudi? En cwar nyari, doko ebedo ngatel me isirikalen agwoki; en dano me awora i odi.

¹⁵ Iparo be manono en tien me agege me ango penyo Rubanga pire? Li gire! Kur abaka bed kede tam moro i koma arabo i kom ngatamoro me ot ka papa na pi kop nono, pien ango gira likame angeo gimoro akadi atitidi iye.”

¹⁶ Abaka oko waco be, “Akimelek, in ateteni ibino to, in karacel kede jo me ot ka papa ni.”

¹⁷ Abaka oko waco ne isirikalen adare kame oudo tie cungo i ngete be, “Nekunu josaseredoti ka Rwot, pien gin kiribere kede Daudi. Pien gin oudo kingeo be Daudi olwi oringo di likame kiko waco na.” Do isirikalen adaro abaka oko dagi neko josaseredoti ka Rwot.

¹⁸ Di do abaka oko waco ne Doeg be, “In ot inek gi.” Deog dano me Edom oko ot di eko neneko josaseredoti. Cenge nono eko neko josaseredoti 85, gin dedede oudo kingapo igoen gi me tic kame kolwongo be epod.

¹⁹ Saulo oko mino koneko jo dedede kame bin bedo Nob, bomba me josaseredoti; cuo kede mon, idwe kede imukerun, dok, pundan, kede romini, gin dedede koneko gi kede epima.

²⁰ Do awobi acel kikom awobe ka Akimelek wot ka Akitub, kame nyinge oudo Abiata, oko bwot di eko ringo but Daudi.

²¹ Abiata oko tatamo ne Daudi epone kame oudo Saulo oneko kede josaseredoti ka Rwot.

²² Daudi oko waco ne be, “Cenge nono kakame ango bin aneno kede Doeg dano me Edom kuno, ango oudo angeo be en eyaro waco ne Saulo. Ango en kame akelo ne jo me ot ka papa ni dedede to.

²³ Bed kan keda, doko kur ibed kede lworo moro, pien ngat amito neki, mito kong egei neka; in ibino bedo buta kan abongo peko moro.”