1 Samuel 21 - Baibuli I Leb Kumam 2013

Daudi Oringo pi Lworo Saulo

¹ Daudi oko bin tuno Nob but Akimelek ngasaseredoti. Akimelek oko bino pi riamo kede Daudi di kome oudo miel amiela, di eko penye be, “Pinyo komio in ibino kane keni, abongo ngatamoro kame iupere kede?”

² Daudi oko waco ne Akimelek Ngasaseredoti be, “Abaka otieko mina kop di ecika be kur ami ngatamoro ngei gikame en ecwa timo. Ango atieko cikere kede isirikalen na pi gin riamo keda karamoro.

³ Aso, nataman nyo kame in itie kede? Mia mugati kany arabo gimoroni kame in itie kede.”

⁴ Ngasaseredoti di oko gamo dog Daudi be, “Ango nataman ali kede mugati kame jo singo camo ceng dedede, kwanyo kenekene mugati kacil. Ango atwero mini ka awobe ni likame oudo obuto kede mon i kare kiyapiyapi.”

⁵ Daudi di oko gamo dog ngasaseredoti be, “Ateteni kotwono wan mon bala lem sek ka wan ooto i sapali; kom awobe na bedo cil akadi koto di sapali me ceng dedede; do miero kom gi bed cil benyo i sapali me tin noni!”

⁶ Pi mano, ngasaseredoti oko mine mugati kacil, pien oudo mugati apat li, kwanyo kenekene mugati kame oudo obedo giayala but Rubanga, kame oudo kotieko kwanyo tenge ki wi emesa kacil di oko keto ace aliet kawang gi.

⁷ Aso, icuo moro anyinge Doeg, anywali me Edom oudo cenge nono tie kunono pien iswil oudo mito ne cobo lonyere; en oudo ebedo ngatel me jokwat ka Saulo.

⁸ Daudi oko penyo Akimelek be, “Itie kede tong moro arabo epima kan? Ango likame oudo abino kede epima arabo jamini me yi na, pien oudo miero atim awakawaka gikame abaka owaco.”

⁹ Akimelek oko gamo be, “Epima ka Goliat dano me Pilistia angoce in ineko i aditot me Ela en atie kane, koboe i egoe etie ingei epod. Ka in imite, tere, pien likame bobo tie apat, kwanyo en kenekene.” Daudi oko waco ne be, “Mia manono; likame tie epima moro aber kalamo en!”

¹⁰ Daudi oko yai cenge nono di eko ringo tenge pi lworo Saulo; eko ot but Abaka Akis me Gat.

¹¹ Jotic ka Akis oko waco ne be, “Mam Daudi ngat kobedo abaka i piny mere ine? Mam en kame jo oudo mielo di kiwero be, ‘Saulo otieko neko tutumia, do Daudi oneko tutumian kede tutumian’?”

¹² Kope kame kiwaco oko donyo i cuny Daudi, omio eko bedo kede lworo but Abaka Akis me Gat.

¹³ Di do eko loko ikiteso mege; ka oudo etie kede gi, oudo ecuko poi, di eko donyo gigiro ikekon me erute me bomba, doko oudo eweko lau mol ki doge di loto kiton i yer me tike.

¹⁴ Akis oko waco ne jotic mege be, “Nenunu! Icuo no tie amang! Pinyo komio ikelenu buta?

¹⁵ Mam ango ali kede jomang en komio ikelunu dano noni timo mingo mere i nyima? Kur ikelenu i oda.”