1 Samuel 20 - Baibuli I Leb Kumam 2013

Awotin ka Daudi kede Jonasan

¹ Daudi oko ringo eyai ki Nayot adul katie i bomba me Rama. En eko ot but Jonasan di eko penye be, “Nyo kara kame ango atimo? Raco na nyo? Doko dub nyo kame ango atimo but papa ni komio emito neka?”

² Jonasan oko waco ne be, “Mano likame bino timere! In likame ibino to. Likame tie gimoro adwong amoto atitidi kame papa nango timo abongo en waco na; nyo amio eromo mungo nango kop noni? Mano kop me abe!”

³ Do Daudi oko gamo be, “Papa nin ngeo kiber epone kame in imita kede; manono mie likame eko yei ne in ngeno kop no, pien engeo be ebino dubo cunyi. Do ateteni ango akwongere buti i nying Rwot be, odong kakatitidi di ango ato.”

⁴ Di Jonasan oko waco ne Daudi be, “Ango abino timo ni gimoroni kenekene kame in iwaco.”

⁵ Daudi oko waco ne Jonasan be, “Diki kobino tedo Ebaga me Por Duwe, ango miero acam kede abaka; do in yei nango ot pwono obar tuno otieno me ceng alubo diki.

⁶ Ka papa ni oneno di ali i kacam di eko penyere, in wace be ango oudo angangao in pi yei na ot Betelem bomba me turwa, pi ot nywako kede jo me ot wa mino giayala awanga kame kotimo buli mwaka, pien kare mere inononi.

⁷ Ka en ewaco be, ‘Mano ber,’ cunya bino kwei; do ka kop nono oko wango cunye, in do ibino ngeno be en etieko keto cunye pi mito timo na gikarac.

⁸ Pi mano, ango akwai itera kiber, pien in itieko timo keda isikan me awotin i nyim Rwot. Do ka oudo atimo raco moro, neka in kikomi; pinyo amio itera but papa ni?”

⁹ Jonasan oko waco ne be, “Kur iparo kop kacal kamano! Ka koto di oudo ango angeo be papa na otieko moko tam mere pi mito timo ne in raco, iparo be koto ango likame awaco ni?”

¹⁰ Di Daudi oko penyo Jonasan be, “Ngai kame bino mina angeo ka papa ni ogamo dogi kede gero?”

¹¹ Jonasan oko waco ne be, “Bia ooti i poto kuca.” Aso, gin kiko yai di kiko ot.

¹² Di Jonasan oko waco ne Daudi be, “Rwot Rubanga me Isirael bed mujura wa! Diki i esawa noni, arabo i ceng kame lubo mere udo ango atieko penyo tam kame papa na tie kede i komi, ka etie kede tam kaber i komi, ango abino cwano nin kop.

¹³ Do ka aniang be en emito timo ne in raco, di likame ango ako mini ingeo, doko likame ako cwani ioto tenge kede mulem, ango akwao be Rwot miango alola. Akwao be Rwot bed kedi bala kame lem en ebedo kede papa na.

¹⁴ Ka ango pwodi akuo, akwai inyut na amara kalikame lokere bala me ka Rubanga; do ka ato,

¹⁵ kur ijik nyuto but jo me oda amara ni kalikame lokere, akadi Rwot muducaro jokwor ni dedede ki wi lobo.”

¹⁶ Epone no en kame Jonasan oko timo kede isikan kede jo me ot ka Daudi, di ewaco be, “Akwao Rwot emi alola but ikwae ka Daudi ka gin kituro isikan noni.”

¹⁷ Jonasan bobo oko mino Daudi okwongere pi mare; piento en oudo emaro Daudi bala kame emaro kede kuo mere kene.

¹⁸ Jonasan oko waco ne be, “Diki obedo ceng me Ebaga me Por Duwe; kobino ngeno be in ili pi kabedo nin bino dong twolo.

¹⁹ Aso, i ceng kame lubo diki, in ibino ot piny kuno; ot kakame ngoce ipwono iye ca, di iko pwono ingei atukit me ingaroi atie kuno.

²⁰ Ango abino gweno tongini me emal adek i ngete, di ineno bala atie gweno gimoro.

²¹ Di ango ako bino cwano atin awobi, di awaco ne be, ‘Oti imoi tongini me emal go.’ Ka ango awaco ne atin awobi nono be, ‘Neningo, tongini me emal nogo tie i ngeti tetuni, kwany gi,’ di do in iko bino pien udo kop moro li. Ango akwongere i nying Rwot kakuo be udo likame tie gimoro arac kame bino timere ni.

²² Do ka ango awaco ne atin awobi nono be, ‘Neningo, tongini me emal nogo tie i nyimi kuca,’ in do oti; pien udo Rwot do otieko cwani be iot tenge.

²³ Do i kom kop kame wan otieko yamo, Rwot en mujura kame tie i diere wa nakanaka.”

²⁴ Aso, Daudi bin oko pwono obar. Kakame Ebaga me Por Duwe oko tuno kede, abaka oko bino pi cam

²⁵ di eko bedo kabedo mere bala lem sek, eloko ngee i apama. Abuneri oko bedo i ngete, di Jonasan oko cungo acunga; do kabedo ka Daudi oudo twolo.

²⁶ Saulo likame oko yamo kop moro i cenge nono; pien oudo eparo i cunye be, “Gimoro otieko timere ne Daudi; en likame ecil bala kame iswil mito, ateteni en likame ecil.”

²⁷ Do i ceng me are mere, en ceng kame lubo ceng me Ebaga me Por Duwe, kabedo ka Daudi oudo pwodi odong twolo. Di Saulo oko penyo wode Jonasan be, “Pinyo komio Daudi wot ka Yese likame obino i ebaga, nyoro kede tin da?”

²⁸ Jonasan oko dwoko be, “Daudi ongangao ango pi yei ne ot Betelem.

²⁹ En ekwa be, ‘Okwe yei na ot; pien jo me paco wa oyaro mino giayala but Rubanga i bomba me turwa, doko omina otieko cika be miero abed tie kuno. Aso ka cunyi yom keda, wek aoti di ako neno imiegu na.’ Manono en gi komie likame ebino cam karacel kedi.”

³⁰ Di do cuny Saulo oko wang kitek i kom Jonasan di eko waco ne be, “In wot ka dako acar, kame ngajemo! Iparo be ango likame angeo be in itieko yero wot ka Yese pi kelo ni lewic karacel kede toto ni?

³¹ Pien tek di pwodi wot ka Yese tie kuo i wi lobo, in likame ibino bedo abaka me piny noni. Cwai dano ot kele buta, piento en miero etoi.”

³² Jonasan oko penyo papa mere Saulo be, “Pinyo kamio poore neke? Nyo kame en etimo?”

³³ Saulo oko late kede tong pi koto cobe; manono oko mino Jonasan oko ngeno be papa mere oudo otieko moko tam mere pi neko Daudi.

³⁴ Jonasan oko yai ki emesa kede wangcuny atek di likame eko camo gimoro i ceng me are me ebaga nono. Pien par oudo dwong i cunye pi Daudi, kede pi kite kame papa mere oudo omie kede lewic.

³⁵ Oru mere odiko, Jonasan oko ot obar pi riamo kede Daudi, bala kame oudo gin kitieko cikere kede; eupere kede atin awobi.

³⁶ En eko waco ne atin awobi nono be, “Ring iot ikwany tong me emal kame ango ayaro gweno.” Di awobi nono oudo tie ringo en eko gweno tong me emal oko ot poto anyim mere.

³⁷ Kakame atin awobi nono oko tuno kede kakame tong me emal ka Jonasan oudo opoto iye, Jonasan oko lwonge di eko waco ne be, “Tong me emal opoto anyim kuno.

³⁸ Susunyo, kur igali.” Aso, awobi nono oko kwanyo tong me emal di eko dok but ngadwong mere.

³⁹ Do awobi nono likame oko ngeno gimoro; kenekene Jonasan kede Daudi en kame oudo ngeo iik nono.

⁴⁰ Jonasan oko mino jamini mege me yi but awobi nono di eko waco ne be, “Dwok gi i bomba.”

⁴¹ Oyotoyot di atin awobi nono oudo otieko kato, Daudi oko yai ki nget atukit me engaro di eko riondiko i nyim Jonasan, di eko kudo wie piny tien adek. Gin dedede kiko donyo koko di kinotere; Daudi oko kok kalamo.

⁴² Di do Jonasan oko waco ne Daudi be, “Ot kede mulem, pien wan jo are nogi otieko kwongere i nying Rwot di owaco be, ‘Rwot bino bedo i diere nango kedi, kede i diere me ikwae na kede megi, ikar kede ikar.’ ” Daudi oko yai di eko ot; di Jonasan oko dok i bomba.