1 Samuel 2 - Baibuli I Leb Kumam 2013

Ilega ka Aana

¹ Aana oko lego be, “Cunya yom twatwal i kom Rwot; Rubanga omia teko. Ango anyero jokwor na, pien ango alelo pi kite kame ilaka kede.

² “Likame tie Ngat Kacil bala Rwot, likame tie ngat acal kede, likame tie ngagwok moro acal kede Rubanga wa.

³ Jikunu yamo me ewaka, kur doko kope me ewaka wok ki dogu; pien Rwot obedo Rubanga atie kede ngec, doko en engolo kop i kom tice dedede kame jo timo.

⁴ En etuturo imalia me jo atek yi, do emio jo agoro doko tek.

⁵ Jo koudo camo di kiko yeng kiber nan olokere ot pakaso cam, do jo kame lem kec neko tie kede cam kame bwono gi. Dako alem obedo adonge onywalo idwe kanyaare, do dako koudo tie kede idwe atot odong nono.

⁶ Rwot neko, doko da edwoko kuo; en ecwao jo i kabedo me jo oto, doko da edwoko gi ki kuno.

⁷ Rwot mio jo doko jocan, doko da en emio jo baro; en edwoko dano i ruom ka piny, doko da en etingo dano i ruom ka malo.

⁸ En ekwanyo jocan ki can gi, kede jo apiny olo ki peko gi. Emio gi kidonyo bedo kede jopug; keto gi i kabedo me wor. Pien ipirin kame lobo cungo iye obedo me ka Rwot; en etieko cibo piny ocungo i wi gi.

⁹ “En egwoko jo agenere, do jo areco en emio gi kito kakacol; pien dano likame lo kede teko mere kene.

¹⁰ Rwot bino muducaro jokwor mege; Ngamalo Twal bino mwoc i malo i kom gi bala kot. Rwot bino ngolo kop ne lobo lung, en ebino mino abaka mere teko, ebino mino abaka mere me kowiro twer.”

¹¹ Elikana di do oko dok paco mere i bomba me Rama, do wode Samuel oko dong Silo i loc ka ngasaseredoti Eli pi tic ne Rwot.

Awobe ka Eli

¹² Aso, awobe ka Eli oudo obedo jo areco. Gin oudo likame kiparo pi Rwot

¹³ arabo pi tice kame josaseredoti poore timo but jo. Ka ngatamoro oudo omio giayala, ngatic me ngasaseredoti oudo bino kede ijiko alake okakarun kidek di ringo pwodi tie i keno,

¹⁴ di en eko cobe i yi sepula arabo i agulu me tedo. Ringo dedede me ijiko woto, ngasaseredoti oudo tero bedo mege. Manoni en gikame gin oudo kibedo timo i Silo ne jo dedede me Isirael koudo bino kuno.

¹⁵ Medo i wi mano da, di pwodi likame kowango kakamio me ringo, ngatic me ngasaseredoti oudo bino di eko waco ne ngat koudo tie mino giayala be, “Mia ringo moro me abula ne ngasaseredoti; likame en ebino yei gamo ringo me kotedo kibutu, do kenekene ringo anumu.”

¹⁶ Ka dano no oko dwoko be, “Ber kong ogeunu wango kakamio bala kame mitere, di do in iko tero gikame cunyi mito,” en oudo eko dwoko ne be, “Li akadi acel, in miango nan, aso ka li, ayaro kwanyo tetek.”

¹⁷ Manoni oko mino dub me awobe ka Eli obedo dwong twatwal i nyim Rwot, pien likame gin kibedo kede wor i kom giamia but Rwot.

Bedo ka Samuel Silo

¹⁸ I kare nono Samuel oko donyo tic ne Rwot di en atin awobi kame rwao esuka.

¹⁹ Toto mere oudo kuo ne ekanso atitidi mwaka acelacel di eko tero ne kame eupere kede cware pi ot mino giayala me buli mwaka.

²⁰ Eli oudo ko lamo ne Elikana kede dako mere winyo di ewaco ne Elikana be, “Akwao Rwot emi inywal idwe ace kede dako noni pi lunyo giamia kame en emio Rwot.” Ingei manono, gin oudo kiko dok paco.

²¹ Di Rwot oko mino Aana winyo, di en eko bobo nywalo awobe adek kede anyira are. Di Samuel oko dongo di etimo tic ka Rwot.

Eli kede Awobe mege

²² I kare nono, Eli oudo otieko ti twatwal. En oudo ebedo winyo gi dedede kame awobe mege oudo tie timo ne jo me Isirael, kede epone kame oudo kidonyo buto kede mon kame oudo tio i ekeko me eema kame Rwot tie iye.

²³ En eko waco negi be, “Pinyo komio itimunu gikame cal kamago? Pien jo dedede tie waco na kop i kom tice wu areco.

²⁴ Idwe na, manono rac; kop kame ango abedo winyo jo ka Rwot tie yamo i komu likame ber.

²⁵ Ka dano moro odubo but dano ace, Rubanga twero bedo ngat arucakino gi; do ka dano moro odubo but Rwot, likame tie ngat kame karuno konye.” Do gin likame kiko yei winyo dwan papa gi, pien Rwot oudo otieko moko tam mere pi neko gi.

²⁶ Awobi Samuel oko meede dongo i kome, di Rwot karacel kede jo di mare.

Ikwenyar me Enabi Owaco i kom Jo me Ot ka Eli

²⁷ Enabi oko ot but Eli di eko waco ne be, “Rwot owaco be, ‘Ango bin anyutere but kwaru ni Aaron kede jo me ode di oudo kitie ipasoi ka Parao, en abaka me Misiri.

²⁸ Ango bin ayere kikom atekerin tomon kiwie are me Isirael pi bedo ngasaseredoti na, pi ot i alutari na, pi wango odok angwe kur, kede pi tingo epod i nyima. Doko ako mino jo me ot ka kwaru wu iner i kom giamia awanga dedede kame wok kibut jo me Isirael.

²⁹ Pinyo do komio itienu kede ingobel i kom giayala kede giamia kame ango aciko be poore jo mia, di do in iko lokere bedo kede wor but awobe ni kalamo ango, di imio gi kicwe kede adulion kinyus me ringo me jo na me Isirael yala kede?’

³⁰ Pi mano Rwot Rubanga me Isirael waco be, ‘Ango oudo acikere be jo me odi kede jo me ot ka kwaru ni bino tic na bala josaseredoti nakanaka’; do nan Rwot waco be, ‘Likame abino timo kamanono; do ango abino mino wor but jo kame mia wor, kede abino mino lewic mako jo kame tie kede acae buta.

³¹ Neningo, kare tie bino kame ango abino mino koneko kede awobe me odi kede me ot ka kwaru ni, tetekeny kur ngatamoro me odi bed kuo tuno i tio.

³² Di do i can ni, in iko bino neno kede ingobel mulem dedede kame kobino mino jo me Isirael, do likame tie ngatamoro me odi kame bino bedo kuo tuno i tio.

³³ Akwari acel kame abino weko dong kuo pi timo tic i alutari na wange bino to, doko ebino bedo kede cwercuny. Do ikwae ni apat bino totoun to me lito.

³⁴ Ka awobe ni are, Kopuni kede Pinekasi, orote to ceng acel, manoni bino nyuto ni be gi dedede kame ango awaco bino cobere.

³⁵ Ango abino yero ngasaseredoti na agenere buta, kame bino timo gi dedede kame cunya kede tam nango mito. Ango abino mino diakal mere cungo di tek, di ikwae mege tio i nyim abaka na kame ayero.

³⁶ Akwari moro odong di kuo bino ot kwano sente amoto cam but ngasaseredoti nono, di ebako doge be mie tic me konyo ngasaseredoti, tetekeny eud gimoro me acama.’ ”