1 Samuel 19 - Baibuli I Leb Kumam 2013

Saulo Otamo Neko Daudi

¹ Saulo oko yamo kede wode Jonasan karacel kede jotic mege kop amako neko Daudi. Do Jonasan wot ka Saulo oudo maro Daudi twatwal.

² Jonasan oko waco ne Daudi be, “Papa na Saulo tie mito neki, pi mano, bed di igwokere diki odiko iko pwono karamoro.

³ Ango abino ot cungo i nget papa na i lum kakame in itie pwono iye di ako yamo kede kop i komi, ka aniang kop moro ace ango abino waco ni.”

⁴ Jonasan oko waco ne papa mere kope abeco i kom Daudi di ewaco be, “Adwong, kur itim ne Daudi gimoro arac, pien likame tie gimoro arac kame en etimo ni, doko da gikame en ebedo timo obedo kony adwong buti.

⁵ Piento en ejalo kuo mere eko yi kede Goliat paka neko, di Rwot oko mino jo me Isirael obwono yi. In ineno manono kede wangi, di iko lelo da; pinyo kara bobo komio imito neko Daudi abongo tien kop, en dano ali kede raco moro?”

⁶ Saulo oko yei winyo kop ka Jonasan, di eko kwongere i nying Rwot be likame ebino neko Daudi.

⁷ Jonasan oko lwongo Daudi di eko waco ne kope nogi dedede; di do eko tero Daudi but Saulo, di Daudi oko meede timo ne abaka tic bala lem sek.

⁸ Yi kede jo me Pilistia doko oko poto, di Daudi oko ot pi yi kede gi; en eko suro gi di eko yi kede gi kitek paka gin ringo.

⁹ Ceng acel tipo arac kowok kibut Rubanga oko donyo ne Saulo. En oudo etie bedo i ode di emako tong mere i cinge, di Daudi oudo tie gono arigirigi mere.

¹⁰ Saulo oko tamo cobo Daudi dingiding i kor apama kede tong, do Daudi oko pange omio eko cobo apama. Iwor nono Daudi oko ringo tenge eko bwot.

¹¹ Saulo oko cwano cuo mogo i ot ka Daudi pi kine, di oudo kitie kede iik me neke odiko. Mikal dako ka Daudi oko waco ne be, “Ka likame imarao kuo ni iwor atin, diki kobino neki.”

¹² Aso, Mikal oko rwako Daudi ki dirisa di Daudi oko ringo obwot.

¹³ Mikal oko kwanyo caljwogi di eko piele i kabuto, eko keto yer me diegi kame kocweo i wie di eko ume kede egoe.

¹⁴ Kakame Saulo ocwao kede jo pi tero Daudi, Mikal oko waco be kome lit.

¹⁵ Saulo doko oko cwano jo mege pi gin neno Daudi kede wang gi. En ewaco negi be, “Tingenu kede itanda ikelenu kan, me wek aneke.”

¹⁶ Kakame jo kame eoro otuno kede, gin kiko udo caljwogi en atie i kabuto di yer me diegi kame kocweo tie i wie.

¹⁷ Saulo oko penyo Mikal be, “Pinyo komio ingala kamano di iko mino ngakwor na obwot?” Mikal oko dwoko ne be, “En ewaco na be, ‘Wek aoti, aso ka li abino neki.’ ”

¹⁸ Daudi oko bwot eko ringo Rama but Samuel. En eko tatamo ne Samuel gi dedede kame Saulo otimo ne. Di do en karacel kede Samuel kiko ot Nayot kiko donyo bedo kuno.

¹⁹ Jo oko waco ne Saulo be, “Daudi tie Nayot i Rama.”

²⁰ Saulo oko cwano jo pi ot omo Daudi. Kakame gin kineno kede ekodet me inabin kame oudo otapaun tie miel di kilelemo, di Samuel en kame oudo telo gi, tipo ka Rubanga oko donyo ne jo kame Saulo oudo ooro nogo da, di gida kiko donyo i tim me inabin nogo.

²¹ Kakame kowaco ne kede Saulo kop nono, en bobo eko cwano jo ace. Magonogo da oko donyo i tim acel nono. Saulo doko oko cwano jo tien me adek, magonogo da oko donyo i tim me inabin nogo. Di do Saulo kikome oko ot Rama.

²² En eko tuno i atan adwong me Seku di eko penyo be, “Samuel kede Daudi tie tuai?” Ngatamoro oko dwoko ne be, “Gin kitie Nayot i Rama.”

²³ En eko cako ot Nayot i Rama. Kakame oudo etie ot kede kuno, tipo ka Rubanga oko donyo ne eda, eko cako timere bala enabi paka en ot tuno Nayot i Rama.

²⁴ En eko gonyo igoen mege di eko cako miel di elelemo bala enabi i nyim Samuel. Di eko buto piny nono abongo igoen i kome i ceng kede iwor nono lung. Manono en oko mino jo openyere be, “Benyo, Saulo da odoko enabi?”