1 Samuel 18 - Baibuli I Leb Kumam 2013

Jonasan Otimo Isikan kede Daudi

¹ Kakame Daudi otieko yamo kede Saulo, cuny Jonasan oko tingere i kom Daudi, di eko maro Daudi bala kame emarere kede kene.

² Ceng nono Saulo oko tero Daudi di likame eko yei ne dok turgi but papa mere.

³ Jonasan oko timo isikan me bedo awotino kede Daudi, piento en oudo emaro Daudi bala kame emarere kede kene.

⁴ Jonasan oko gonyo ekanso mere kame oudo etie ngapo di eko mino Daudi, karacel kede engape mere me yi, kede epima mere, kede emal mere, kede rakoba mere.

⁵ Saulo oko donyo cwano Daudi i yi apapat, do en eko bedo bwono jokwor i yi dedede kame Saulo ocwae iye; manono oko mino Saulo oko mine edoko ngadwong me isirikalen. Jo dedede, kiton jotic ka Saulo da, oko moko kop nono.

Nyeko Omako Saulo i kom Daudi

⁶ Kakame Daudi otieko neko kede Goliat di do isirikalen oudo tie dwogo, mon oko wokun ki bomban dedede me Isirael pi riamo kede Saulo. Gin oudo kitie wer kede yomcuny di kimielo, di kiyango ayekeyeke kede di kigoo adungu.

⁷ Gin oudo kilelo di kiwero ken gi ken gi be, “Saulo oneko mege jo tutumia, do Daudi oneko mege jo tutumian kede tutumian.”

⁸ Kop noni likame oko yomo cuny Saulo, omio eko doko ger. En ewaco be, “Kom kotie waco be Daudi oneko tutumian kede tutumian, do be ango aneko tutumia kenekene; nan nyo bobo kodong ne, mam do doko abaka?”

⁹ Cako ceng nono cuny Saulo oko cako popoto i kom Daudi.

¹⁰ Ceng alubo mere, tipo arac kowok kibut Rubanga oko sutakino Saulo di en eko poi edonyo lelemo i ode. Daudi oudo tie gono arigirigi bala kame etimo ceng dedede, di Saulo oudo tie kede tong i cinge.

¹¹ Saulo oko waco kene be, “Ayaro cobo Daudi paka tong moko dingiding i kor apama.” En eko lato Daudi tien are, do Daudi oko pango.

¹² Saulo oudo tie kede lworo i kom Daudi pien Rwot oudo tie kede Daudi, do en Rwot oudo otieko weke.

¹³ Manono oko mino Saulo okwanye ki nyime, di eko cwane tenge telo wi isirikalen tutumia acel. Daudi oko bedo telo jo mege ot yi

¹⁴ di eko bedo lono yi dedede me eoto iye, pien Rwot oudo tie kede.

¹⁵ Kakame Saulo oneno kede be Daudi oudo tie bwono yi dedede, en eko bedo kede lworo bute.

¹⁶ Do jo dedede me Isirael kede me Yuda oudo maro Daudi, piento en oudo ebedo telo gi ot yi.

Daudi Onyomo Nyar ka Saulo

¹⁷ Saulo oko waco ne Daudi be, “Nyara adwong Merab ine; ango abino mine buti bala dako ni, kenekene in tim na tic kede teko di iko yi yi ka Rwot.” Pien Saulo oudo otamo be iepone nono jo me Pilistia bino neko Daudi abongo cingen tuno iye.

¹⁸ Daudi oko dwoko ne Saulo be, “Ango abedo ngai, doko joawade na kede jo me ot ka papa na obedo alu i Isirael, miango atwero bedo or ka abaka?”

¹⁹ Do i kare kame oudo kopoore mino kede Daudi Merab nyar ka abaka, oko lokere mine but icuo moro anyinge Adiriel me Mekola.

²⁰ Aso, Mikal nyar ka Saulo ace oko mitere kede Daudi. Kakame Saulo owinyo kede kop nono, manono oko yomo cunye.

²¹ Saulo oudo owaco kene be, “Abino mino Mikal but Daudi tetekeny ebed ne bala gi me cike me wek jo me Pilistia neke.” Pi manono, Saulo oko waco ne Daudi tien me are be, “Nan in do ibino bedo ora.”

²² Saulo oko waco ne jotic mege pi yamo kede Daudi i mung be, “Neningo, abaka cunye yom kedi, doko da jotic mege dedede mari; nan in do nyom nyare.”

²³ Aso, jotic ka Saulo oko waco ne Daudi kop noni i mung. Daudi oko waco be, “Wun iparunu be ebedo gi ayoyot me nyomo nyar ka abaka, doko di inenunu be ango angacan, doko pira likame tek?”

²⁴ Jotic ka Saulo oko waco ne gikame Daudi owaco.

²⁵ Saulo oko waco be, “Kenekene gikame abaka mito kibuti bala cul me nyom en kelo kibut jo me Pilistia del me kom gi me cuo tol acel, bala onyanga i kom jokwor mege.” Saulo oudo tie timo iik me mito be jo me Pilistia nek Daudi.

²⁶ Kakame jotic mege owaco ne kede Daudi kope nogi, cuny Daudi oko bedo yom pi bedo or ka abaka. Di pwodi kare likame okato,

²⁷ Daudi oko yai di eko ot kede jo mege di kiko neko cuo tol are me Pilistia, di Daudi oko kelo kibut gi del me kom gi me cuo, di eko mino gi but abaka abongo moro rem, me wek enyom nyare. Saulo oko mino nyare Mikal but Daudi pi doko dako mere.

²⁸ Saulo oko niang kiber be Rwot oudo tie kede Daudi, kede da be nyare Mikal oudo maro Daudi.

²⁹ Manono oko mino Saulo omedo bedo kede lworo i kom Daudi, di do eko doko ngakwor ka Daudi cako i kare nono.

³⁰ Di do isirikalen me Pilistia oko donyo bino yi kede jo me Isirael, do Daudi en kame oudo bwono gi kalamo jotic ka abaka ace. Manono oko mino nying Daudi oko doko iruo kalamo.