1 Samuel 17 - Baibuli I Leb Kumam 2013

Daudi kede Goliat

¹ Isirikalen me Pilistia oko cokere pi yi; gin oudo kicokere Soko, bomba kame tie Yuda. Gin kiko gero kimere gi i kabedo kame kolwongo be Epes Damim, kame tie dierediere me Soko kede Aseka.

² Saulo kede jo me Isirael oko cokere di kiko gero kimere gi i aditot me Ela, di kiko teere pi yi kede jo me Pilistia.

³ Jo me Pilistia oko cungo i wi moru tetucel, kede jo me Isirael da oko cungo i wi moru ace tetucel, di aditot oudo opoko diere gi.

⁴ Di do twon dano me alwora kame nyinge Goliat, me bomba me Gat, oko wokun ki bad me jo Pilistia; oudo edongo boro mere kalamo puti kanyangon.

⁵ Oudo engapo ocoro kame gwoko wie, kame kotimo kede nyonyo buronsi, kede di engapo ekoti kame kotimo kede nyonyo buronsi kame peko mere wao bala kilo ot kanyape.

⁶ Iloton mege oudo engapo iye nyonyo buronsi pi gwoko gi, di ekodo tong kame kotimo kede buronsi tie ledo i epepet mere.

⁷ Tir me tong mere oudo ibimirir bala lilim kame jo kudo me kokodo ausi me cweno egoe, doko leb tong mere oudo kotimo kede nyonyo ayon di epek ewao bala kilo kanyaare. Oudo dano kame mako ebuku mere telo ne anyim.

⁸ Goliat oko cungo di eko lelemo ne isirikalen koteere me Isirael be, “Pinyo komio ibinunu ikounu teere pi yi? Mam ango abedo dano me Pilistia? Mam wun ibedunu jotic ka Saulo? Yerunu icuo acel kibutu di eko bino piny kan yi keda.

⁹ Ka en eko twero yi keda di eko neka, wan obino doko ipasoi wu; do ka ango abwone di ako neke, wun ibinunu doko ipasoi wan di ikounu donyo tic ne wan.”

¹⁰ Icuo me Pilistia nono oko meede kede yamo be, “Tin ango acao isirikalen me Isirael! Kong mianu icuo acel ebin wan oyi kede.”

¹¹ Kakame Saulo kede jo mege owinyo kede kope nogi, lworo oko mako gi adikinicel.

Daudi Ooto kakame Isirikalen ka Saulo Ogero iye Kimere

¹² Daudi oudo obedo wot ka Yese, ngat koudo obedo dano me Epurata, kame bedo i bomba me Betelem i piny me Yuda. Yese oudo tie kede awobe kanyauni; i kare kame Saulo oudo tie kede abaka en oudo do etieko ti.

¹³ Awobe ka Yese adek adongo mege oudo oupere kede Saulo ot yi. Nying awobe nogo oudo obedo Eliab awobi adwong, Abinadab ngalube, kede Sama ngat kobedo nywal me adek.

¹⁴ Daudi oudo obedo ngorit. Awobe adongo adek oudo odong karacel kede Saulo,

¹⁵ do Daudi oudo bedo wire awira dok Betelem pi kwano romini ka papa mere.

¹⁶ Goliat dano me Pilistia oko bedo wire bino cungo i nyim jo me Isirael di elwongo gi pi yi odiko acelacel kede otieno pi ceng ot ongwon.

¹⁷ Ceng acel Yese oko waco ne Daudi be, “Kwanyi edebe me engano kame kocelo ni karacel kede mugati tomon di iko susunyo tero ne imiegu ni i kimere me isirikalen kuca.

¹⁸ Ter da cak komakakin tomon ne ngadwong gi me isirikalen. Nen kame kitie kiber di iko kelo gimoro kibut gi kame nyuto.

¹⁹ Abaka Saulo, imiegu ni, kede jo me Isirael apat dedede tie i aditot me Ela yi kede jo me Pilistia.”

²⁰ Oru mere Daudi oko dilo yai odiko eko weko romini kede ngadaro gi, eko kwanyo cam etero bala kame Yese oudo owaco ne. En eko tuno i kimere me isirikalen esawa kame isirikalen oudo tie ot riere kede pi cako yi, di kitie celakino kede dwan me yi.

²¹ Jo me Isirael kede me Pilistia oko teere pi cako yi, di nyim gi opimere.

²² Daudi oko weko jame kame etero kede ngagwok jamini me isirikalen, di eko ringo kakame isirikalen oteere iye pi yi, di eko moto imiegu mege.

²³ Kakame oudo etie yamo kede imiegu mege, twon dano me alwora me Pilistia, kowok ki bomba me Gat, kame nyinge Goliat, oko wokun kikom isirikalen me Pilistia kotieko teere. En eko nyogao waco kope kame lem ebedo waco sek, di Daudi oko winyo di etie yamo.

²⁴ Kakame jo me Isirael oneno kede Goliat, gin dedede kiko bwangere ringo tenge kede twon lworo.

²⁵ Jo me Isirael oko donyo waco be, “Mam inenunu icuo kobino no? Ateteni en ebino pi kelo acae i wi jo me Isirael. Abaka otieko cikere pi mino ngat kame bino neke twon giamia adwong; doko da ebino mino ngat nono nyare pi bedo dako mere, kede eko weko jo turgi dano nono likame donyo culo esolo.”

²⁶ Daudi oko penyo jo kame oudo tie cungo i ngete be, “Nyo kame kobino timo ne ngat kame bino neko dano me Pilistia no, di eko kwanyo lewic ki wi jo me Isirael? Dano me Pilistia kalikame kokepo noni obedo ngai komio en ecao isirikalen ka Rubanga akuo?”

²⁷ Jo oko waco ne gikame kobino mino ngat kame bino neko Goliat.

²⁸ Eliab, omin me Daudi adwong, oko winyo di Daudi tie yamo kede jo. Eliab oko doko ger ne Daudi di ewaco ne be, “Nyo komio in ibino kan? Ngai kame in iweko daro romini anonok ka i wi tim? Ango angeo woo nin, in kom ibino kan pi neno kite kame jo tie yi kede.”

²⁹ Daudi oko waco be, “Do nan ango atimo nyo? Ada oudo apenyo apenya.”

³⁰ Daudi doko oko lokere tenge eoto yamo kede dano ace di epenyo kop acel aoki nono. Jo dedede kame en epenyo oudo dwoko ne kop acel nono.

³¹ Jo mogo oudo owinyo kop kame Daudi owaco, di kiko ot waco ne Saulo; Saulo oko mino kolwongo Daudi bute.

³² Daudi oko waco ne Saulo be, “Adwong, kur cuny ngatamoro poti pi dano me Pilistia no! Ango ngatic ni ayaro ot yi kede.”

³³ Saulo oko waco ne Daudi be, “In likame itwero ot yi kede lono; pien in pwodi ibedo atin awobi, do en ebedo yi cako di pwodi en eponga.”

³⁴ Do Daudi oko waco ne Saulo be, “Ango oudo abedo kwano romini ka papa na, do tek ka engu arabo edubu oudo obino di eko mako atin oromo i diere me romini,

³⁵ ango oudo alube ako sure ako lako atin oromo nono. Do ka en oudo eko lokere nango, ango oudo amako itinyo mere di ako jujuto en paka to.

³⁶ Ango atieko neko inguon kede idubun; abino neko dano me Pilistia kalikame kokepo noni da kamanono, piento en etieko bedo kede acae i kom isirikalen ka Rubanga akuo.”

³⁷ Daudi oko waco be, “Rwot ngat kolaka ki lak engu kede ki lak edubu, bino laka da ki cing icuo me Pilistia noni.” Aso, Saulo oko waco ne Daudi be, “Oti, akwao Rwot bed tie kedi.”

³⁸ Saulo oko mino Daudi ongapo jamini mege me yi, ocoro aumo wic kame kotimo kede buronsi, kede ekoti me lilime kame okokodun.

³⁹ Daudi oko tweno epima ka Saulo i piere, i kom angapito mere me yi, do ot kede gi oko bwone, pien oudo pwodi lem likame enao ngapo gi. Daudi oko waco ne Saulo be, “Likame atwero ot kede gi nogi, pien lem likame anao ngapo gi.” Aso, Daudi oko gonyo gi.

⁴⁰ Di do en eko mako ebela mere i cinge, di eko depo ingaroi kany apwot ki dud pii me ecilet, di eko keto gi i yi ikapu mere me kwat. En eko ot enoko Goliat di aporocet mere tie i cinge cuto.

Daudi Obwono Goliat

⁴¹ Di icuo me Pilistia nono oko cako nyiko but Daudi, di ngat kame mako ebuku mere telo ne anyim.

⁴² Kakame dano me Pilistia nono oneno kede Daudi, en eko bedo kede acae i kome, pien Daudi oudo obedo atin atina moro acil.

⁴³ Ngapilistia nono oko penyo Daudi be, “Iparo be ango abedo ogwok en amio ibino na kede ibelai?” Di eko lwongo ilam i kom Daudi kibut rubangan mege.

⁴⁴ Di eko waco ne Daudi be, “Ka itek bia paka buta; abino nyinyilo in di ako mino winy me wi yamo kede leini me obar ringo me komi pi gin camo.”

⁴⁵ Daudi oko dwoko ne be, “In itie bino buta kede epima kede tong kede macar, do ango atie bino buti i nying Rwot me jo yi, Rubanga me isirikalen me Isirael, en ngat kame in itieko bedo kede acae bute.

⁴⁶ I ceng atin noni Rwot bino mini i cinga; abino reti piny di ako ngolo wii, di ako bino mino kom isirikalen oto me Pilistia but winy me wi yamo kede but leini me obar. Manoni bino mino jo dedede me wi lobo ngeo be Rubanga tie i Isirael,

⁴⁷ doko jo dedede kame tie kan ko bino ngeno be Rwot likame lako jo kede epima kede tong. Rwot bino bwono yi noni, en ebino mino wu i cing wan.”

⁴⁸ Kakame Goliat oudo tie bino kede pi riamo kede Daudi, Daudi oko ringo awakawaka tetu kakame isirikalen me Pilistia oudo oriere iye pi en ot yi kede Goliat.

⁴⁹ Daudi oko rwako cinge i yi ikapu mere, eko kwanyo engaro di eko pworoso en kede aporocet, di eko dipo Goliat i nyime; engaro nono oko lwiny i nyime di eko poto piny ariebacuny.

⁵⁰ Aso, Daudi oko bwono Goliat kede aporocet kede engaro kenekene; en edipe paka poto piny di eko neke; Daudi oudo likame tie kede epima moro i cinge.

⁵¹ Daudi oko ringo bute di oko cungo i kome, di eko mako epima ka Goliat eko wote ki akularu mere, di eko ngolo kede wi Goliat tenge eko neke. Kakame jo me Pilistia oneno kede be dano gi kame kouro otieko to, gin kiko ringo tenge.

⁵² Cuo me Isirael kede me Yuda oko bwangere kede ilelem cako riamo jo me Pilistia paka tuno Gat kede i erute me Ekuron. Jo me Pilistia kame kowawano oko popoto i yongayo me Saraim, kipopoto paka tuno Gat kede Ekuron.

⁵³ Jo me Isirael oko dwogo ki riamere kede jo me Pilistia di kiko yako jame kame oudo tie i kimere gi.

⁵⁴ Daudi oko tero wi Goliat Yerusalem, do jame ka Goliat me yi en eko weko odong i eema meren.

Kotero Daudi i Nyim Saulo

⁵⁵ Kakame Saulo oudo oneno kede di Daudi tie ot yi kede Goliat, en oudo eko penyo Abuneri, ngadwong me isirikalen mege be, “Abuneri, awobi no obedo wot ka ngai?” Abuneri oko dwoko ne be, “I ateni likame angeo, Okwe abaka.”

⁵⁶ Abaka oko waco ne be, “Oti ipepenyo pi ngeno wot ka ngai inonono.”

⁵⁷ Kakame Daudi odwogo kede ki kaneko Goliat, Abuneri oko tere i nyim Saulo, di wi Goliat oudo tie i cinge.

⁵⁸ Saulo oko penye be, “Awobi, in ibedo wot ka ngai?” Daudi oko dwoko ne be, “Ango abedo wot ka ngatic ni Yese, dano me Betelem.”