1 Samuel 16 - Baibuli I Leb Kumam 2013

Kowiro Daudi pi doko Abaka

¹ Rwot oko waco ne Samuel be, “In iyaro parere pi Saulo pi kare arom amene? Ango atieko dage pi bedo abaka me Isirael. Ket mo me olibeti i tung diang di iko yai ot Betelem, but icuo moro anyinge Yese, pien ango atieko yero wode acel pi doko abaka.”

² Samuel oko waco be, “Ango atwero ot benyo benyo? Ka Saulo owinyo kop no ebino neka!” Rwot oko waco be, “In ter atakit me diang di iko waco be itie ot mino giayala.

³ Lwong Yese da kakame iyaro mino kiye giayala, di ango ako bino nyuto ni gikame ipoore timo; in iko bino wiro nango ngat kame ango abino nyuto ni pi doko abaka.”

⁴ Samuel oko timo gikame Rwot owaco ne di eko ot Betelem. Joadongo me bomba oko ot pi siramo en di kom gi miel di kipenye be, “Bino ni noni tie me mulem?”

⁵ En eko dwoko be, “Ebo, etie me mulem. Ango abino kan pi mino Rwot giayala; lonyerenu ikounu upere keda ot mino giayala.” En eko lonyo Yese kede awobe mege di eko lwongo gi pi ot kede mino giayala.

⁶ Kakame gin kituno kede, Samuel oko neno Eliab wot ka Yese di eko waco kene be, “Ateteni icuo kame nan tie cungo i nyim Rwot noni en obedo dano kame en eyero.”

⁷ Do Rwot oko waco ne Samuel be, “Kur inen kite kame ecil kede arabo boro mere, pien ango atieko dage; pien likame ango aneno bala kame jo neno kede, gin kineno kom dano ooko, do ango aneno cunye.”

⁸ Di Yese oko lwongo Abinadab di eko mine ebeo i nyim Samuel. Samuel oko waco be, “Manoni da likame Rwot oyero.”

⁹ Yese oko kelo Sama. Samuel oko waco be, “Manoni da likame Rwot oyero.”

¹⁰ Yese oko mino awobe kanyaare obeo acelacel i nyim Samuel iepone noni, do Samuel oko waco ne Yese be, “Likame tie moro kame Rwot oyero kikom magi.”

¹¹ Samuel oko penyo Yese be, “Awobe ni dedede tie kan?” En eko dwoko be, “Odong pwodi awobi atidi, do en etie kwano romini.” Samuel oko waco ne be, “Cwai dano ot ome, pien likame wan obino mino giayala tuno di en etieko bino.”

¹² Aso, Yese oko cwano kolwonge. En oudo ebedo awobi acil di kome yot, wange oudo milimili. Rwot oko waco ne Samuel be, “Yai iwire, piento en inononi.”

¹³ Di Samuel oko kwanyo tung diang kame mo me olibeti oudo tie iye, di eko wiro Daudi i nyim imiegu mege; tipo ka Rwot kede twer mere oko donyo i kom Daudi cako ceng nono ot anyim. Samuel oko yai eoto Rama.

Daudi Odoko Ngatic ka Saulo

¹⁴ Kikano, tipo ka Rwot oko yai kibut Saulo, di tipo arac kame Rwot ocwao oko donyo lole.

¹⁵ Di jotic ka Saulo oko waco ne be, “Neningo, nan tipo arac kame Rubanga ocwao tie loli.

¹⁶ Adwong, nan wac ne wan jotic ni kame gwoki omoi ngatamoro kame ngeo gono arigirigi kiber; di do ka tipo arac kame Rubanga ocwao obino i komi, en ebino gono arigirigi di in iko doko ber.”

¹⁷ Aso, Saulo oko waco ne jotic mege be, “Mounu na ngatamoro kame ngeo goc kiber di ikounu kele buta.”

¹⁸ Ngatic acel oko waco be, “Ango atieko neno awobi wot ka Yese me Betelem, kame ngeo goc twatwal. En ebedo dano kame okuko, ngayi, etie kede diru me yamo, doko ecil; Rwot tie kede.”

¹⁹ Aso, Saulo oko cwano jo but Yese di ewaco ne be, “Cwai nango Daudi, wodi kame kwao romini.”

²⁰ Yese oko cwano Daudi but Saulo kede atin diel, kede punda kame yeo mugati, kede isau me lau kame bwini opong iye.

²¹ Daudi oko bino but Saulo di eko doko ngatic mere. Saulo oudo mare twatwal, di Daudi oko doko dano kame mako jame mege me yi.

²² Saulo oko cwano ne Yese kop be, “Wek Daudi dong bedo ngatic nango, pien cunya omare twatwal.”

²³ Cako i kare nono, tek kame tipo arac kame Rubanga ocwao oudo obino ne Saulo, Daudi oudo kwanyo arigirigi mere di eko donyo gono, di Saulo ko doko ber, di tipo arac nono ko weke.