1 Samuel 15 - Baibuli I Leb Kumam 2013

Yi Kotimere kede Jo Amalek

¹ Samuel oko waco ne Saulo be, “Rwot en kame bin ocwaa pi wiri doko abaka me jo me Isirael, pi mano, nan winy kop ka Rwot.

² Rwot me jo yi waco be, ‘Abino mino jo Amalek alola pi gikame kitimo, pien joakwari gi bin osurere kede jo me Isirael i kare kame kiwok kede ki Misiri.

³ Nan oti isur jo Amalek di iko dudubo atwal atwala gi dedede kame kitie kede. Kur iwekunu gimoro dong kuo, do nekunu cuo kede mon, idwe adito kede imukerun, twonin kede romini, asigiran kede aguraguran.’ ”

⁴ Aso, Saulo oko lwongo isirikalen mege dedede karacel di eko maro gi i Telem. Isrikalen me tien me Isirael oudo tie tutumia tol are (200,000), kede me Yuda tutumia tomon (10,000).

⁵ Saulo oko ot i bomba me jo Amalek di eko pwono i aditot kino gi.

⁶ Saulo oko waco ne jo Keni be, “Yaunu tenge! Yaunu tenge kibut jo Amalek, aso ka li ango abino muducaro wu karacel kede gin; pien bin wun inyutunu cuny me kisa but jo dedede me Isirael i kare kame kiwok kede ki Misiri.” Aso, jo Keni oko yai tenge kibut jo Amalek.

⁷ Saulo oko yi kede jo Amalek cako ki Kabila tuno Sur, kame tie tetu kide me Misiri, di eko bwono gi.

⁸ En eko mako Abaka Agag me jo Amalek di eko tere di ekuo, do eko neko jo apat dedede kede epima bala kame oudo mitere.

⁹ Do Saulo kede jo mege oko weko Agag likame kineko, doko da kiweko romini abeco, kede doke abeco, kede leini kocwe, kede idwe romini, kede jame dedede apat abeco, likame gin kiko muducaro gi; do gin kiko muducaro jame ace apat kame kony gi li kame gin kidagi, bala kame oudo mitere kede.

Rubanga Odagi Saulo bala Abaka

¹⁰ Rwot oko waco ne Samuel be,

¹¹ “Likame cunya yom pi mino Saulo doko abaka, piento en etieko lokere tenge kibuta di eko weko lubo cik na.” Cuny Samuel oko wang di eko donyo koko but Rwot iwor kiakia.

¹² Samuel oko dilo yai odiko sek oru mere pi ot riamo kede Saulo, do oko waco ne be Saulo oudo ooto i bomba me Kamel, kakame egero iye kidi moro me yutuno en, di do eko yai ki kuno eko beno Giligal.

¹³ Kakame Samuel otuno kede but Saulo, Saulo oko waco ne be, “Akwao Rwot emi winyo; ango atieko timo gikame Rwot ociko na timo.”

¹⁴ Do Samuel oko penye be, “Do romini kede doke kame tie koko go kono?”

¹⁵ Saulo oko dwoko be, “Isirikalen na okelo gi kibut jo Amalek. Gin kiweko romini kede doke abeco pi yalo ne Rwot Rubanga ni; do apat mege wan oneneko.”

¹⁶ Di Samuel oko waco ne Saulo be, “Lingi! Ayaro waco ni gikame Rwot owaco na iwor aoki.” Saulo oko dwoko be, “Wac na.”

¹⁷ Samuel oko waco be, “Bed bala in itamo be kony ni li, do mam in ibedo ngat kame telo jo me ikekon dedede me Isirael? Rwot owiri pi bedo abaka me Isirael,

¹⁸ di en eko cwani i tic di ewaco ni be, ‘Oti iko neko jodubo me Amalek dedede; yi kede gi tuno in neko gin dedede.’

¹⁹ Pinyo do komio in iko dagi winyo dwan Rwot? Pinyo komio iko mwomere i kom jame kame iyakunu di do iko timo gikarac i nyim Rwot?”

²⁰ Saulo oko dwoko ne Samuel be, “Ango gira atieko lubo gikame Rwot owaco na, aoto ako timo tic kame Rwot oora timo, akelo Agag abaka me jo Amalek di ako neko jo Amalek apat dedede bala kame oudo mitere.

²¹ Do jo na oko yero romini kede doke abeco kiweko akaka neko gi, di kiko kelo gi Giligal pi yalo kede Rwot Rubanga ni.”

²² Samuel oko waco be, “Mene kame yomo cuny Rwot, mino giamia awanga kede giayala arabo lubo kop mere? Ateteni lubo kop mere ber kalamo giayala; lubo kop mere ber kalamo kakamio me imerekekin.

²³ Pien jemo ne Rwot rac rom aroma bala tim me jwok, doko da tim me epali rac rom aroma bala woro caljwogi. Pi kite kame in itieko dagi kede kop ka Rwot, eda etieko dagi pi bedo abaka.”

²⁴ Saulo oko dwoko be, “Ango adubo; pien likame ango alubo cik ka Rwot karacel kede kope ni da, pien ango oudo abedo kede lworo but jo di ako lubo gikame gin kiwaco.

²⁵ Pi mano, nan do ango atie kwani isasiro ango di iko dok keda, me wek aoti awor Rwot.”

²⁶ Samuel oko dwoko be, “Ango likame abino dok kedi; pien in itieko dagi lubo kop ka Rwot, omio Rwot da otieko dagi pi bedo abaka me Isirael.”

²⁷ Kakame Samuel oudo tie lokere kede pi yai, Saulo oko mako lak ekanso mere, di eko nyil.

²⁸ Samuel oko waco ne be, “I ceng atin Rwot otieko kwanyo ajakanut me Isirael kibuti, di eko mine but ngat apat kame ber kalamo in.

²⁹ Doko Rubanga adwong me Isirael likame bino loko tam mere; likame en eloko tam mere pien likame en ebedo dano.”

³⁰ Saulo oko waco be, “Ango atieko dubo, do mia wor i nyim joadongo kame telo jo na kede i nyim jo me Isirael dedede. Dok keda tetekeny aoti awor Rwot Rubanga ni.”

³¹ Aso, Samuel oko upere odok kede Saulo di Saulo oko woro Rwot.

³² Samuel oko waco be, “Kel Abaka Agag me jo Amalek buta kan.” Agag oko bino bute di kome miel amiela, di ewaco be, “To tin lit benyo!”

³³ Do Samuel oko waco be, “Bala kame epima nin omio kede mon odong abongo idwe, nan toto ni da bino dong abongo atin.” En eko tongotongo Agag i adulion atitino i nyim alutari kame tie Giligal.

³⁴ Samuel oko ot Rama, di Abaka Saulo oko ot paco mere Gibea.

³⁵ Samuel likame bobo oko neno abaka atwal tuno en to; do en eko parere twatwal pi Saulo. Rwot oudo likame cunye yom pi mino Saulo doko abaka.