1 Samuel 14 - Baibuli I Leb Kumam 2013

Jonasan Osuro Jo me Pilistia

¹ Ceng moro acel Jonasan wot ka Saulo oko waco ne awobi kame oudo mako jame mege me yi be, “Bia ongol aditot ooti i kimere me jo Pilistia loka tetuca.” Do likame eko waco ne papa mere Saulo.

² Saulo oudo osipo kima mere i dud yat kame kolwongo be pomagurunet kame oudo tie Migiron, i nget Gibea. En oudo etie kede isirikalen aromo bala tol kanyape (600),

³ karacel kede Akija wot ka Akitub, omin me Ikabod, wot ka Pinekasi, wot ka Eli, ngat koudo obedo ngasaseredoti ka Rwot i Silo. Akija oudo mako epod. Jo oudo likame ngeo be Jonasan oyai ooto.

⁴ I aditot kame yongayo ading oudo beo iye, yongayo kame Jonasan oudo obeo kiye pi ngolo tuno i kimere me jo Pilistia, moru oudo ocego nget yongayo tetuni kede nget yongayo tetuca. Nying moru acel oudo Boses kede ocelu nyinge oudo Sene.

⁵ Acel oudo tie tetu malo me yongayo nono kame neeno kede Mikimas, kede ocelu oudo tie tetu piny me yongayo nono kame neeno kede Geba.

⁶ Jonasan oko waco ne awobi kame oudo mako jame mege me yi be, “Bia ongol loka ooti i kimere me jo kalikame kokepo ka; cengemogo Rwot bino konyo wa. Pien likame tie gikame twero gengo Rwot kelo alako di etio kede jo atot amoto kede jo anonok.”

⁷ Awobi nono oko dwoko be, “In tim gi dedede kame tie i tam ni. Ango atie kedi; tam nango oyaro bedo acel kede meri.”

⁸ Jonasan oko dwoko be, “Mano ber, nan wan obino ngolo aditot tuca but cuo go di wan oko yei negi neno wa.

⁹ Ka gin kiko waco ne wa pi daro gi bino but wa, wan obino cungo abongo yangere di likame oko ot but gi.

¹⁰ Do ka gin kiwaco be ooti but gi, wan obino ot, pien manono nyuto ne wa be, udo Rwot otieko mino gi i cing wa.”

¹¹ Aso, gin kiko nyuto kom gi ne isirikalen me Pilistia di isirikalen nogo oko waco be, “Nenunu, Iburanian tie wok ki bure kame oudo kipwono iye.”

¹² Di kiko lwongo Jonasan kede awobi kame oudo mako jame mege me yi be, “Bianu kan, omito nyuto ne wu gimoro!” Jonasan oko waco ne awobi amako jame mege me yi be, “Luba ooti; pien Rwot otieko mino gi i cing jo me Isirael.”

¹³ Jonasan oko kwekweda kede conge kede cinge eko yito malo me aditot, di awobi kame mako jame mege me yi lube. Jonasan oko rereto isirikalen me Pilistia piny, di awobi kame mako jame mege me yi, kame oudo tie lube ki cen oko neneko gi.

¹⁴ I nek me agege nono, Jonasan kede awobi kame oudo upere kede oko neko jo aromo bala ot are i adul moro atitidi atie bala dul eka.

¹⁵ Manono oko kelo lworo i kimere me jo me Pilistia, i calere gi, kede but jo dedede, kede paka but isirikalen gi kede joyak da; piny oko yangere; manono oudo obedo lworo adwong adikinicel.

Kobwono Jo me Pilistia

¹⁶ Jo ka Saulo kame oudo kio piny i Gibea, en kabedo kame tie i adul ka Benjamin, oko neno di jo tie ringo atatai i kimere me jo me Pilistia.

¹⁷ Saulo oko waco ne isirikalen kame oudo tie kede be, “Marunu jo di ikounu neno ngat kame li kibut wa.” Kakame gin kitieko maro kede jo, kiko udo be Jonasan kede ngat kame mako jame mege me yi oudo li.

¹⁸ Saulo oko waco ne Akija be, “Kel Sanduku me Isikan ka Rubanga kan.” Pien i kare nono jo me Isirael oudo upere kede Sanduku me Isikan ka Rubanga.

¹⁹ Kakame Saulo oudo pwodi tie yamo kede ngasaseredoti, atotolun oko meede ameda i kimere me isirikalen me Pilistia, di Saulo oko waco ne ngasaseredoti be, “Kare me timo mano do li!”

²⁰ Di do Saulo kede jo dedede kame oudo tie kede oko sirito ot yi kede jo me Pilistia. Esawa nono isirikalen me Pilistia oudo obedo kede atotolun kiko donyo yi ken gi ken gi.

²¹ Di do Iburanian kame oudo oupere kede jo me Pilistia ot i kimere gi oko lokere cako konyo jo me Isirael kame oudo tie kede Saulo kede Jonasan.

²² Jo ace me Isirael da kame oudo ooto pwono i piny kobedo mori mori me Epuraimu oko winyo be jo me Pilistia oudo tie ringo, gida kiko donyo riamere kede gi,

²³ di kiko yi paka kalamo Bet Aben. Cenge nono Rwot oko mino jo me Isirael obwono yi. Yi oko nyai paka tuno i piny kobedo mori mori me Epuraimu. Isirikalen kame Saulo oudo tie kede oudo romo bala tutumia tomon (10,000).

Gikame Otimere ingei Yi

²⁴ Aso, i ceng nono Saulo oudo otimo ikwong me awakawaka but isirikalen di ewaco be, “Ilam mak ngat kame bino camo cam di pwodi likame piny oyuto, di pwodi likame ango atieko culo kwor i kom jokwor na.” Manono oko mino likame sirikale moro oko bilo cam i ceng nono.

²⁵ Isirikalen oko ngole i abum kame mokic tie iye.

²⁶ Kakame gin kiudo kede kic i abum, mokic oudo tie totonun piny, do likame ngatamoro oko camo pien oudo kitie lworo ikwong kame kotimo.

²⁷ Do Jonasan oudo likame owinyo di papa mere waco be ilam mak ngat koudo oyaro camo gimoro i ceng nono; aso en eko rwako ebela kame oudo tie i cinge i akuru me kic di eko camo mokic, di do eko udo teko.

²⁸ Sirikale acel oko waco ne be, “Papa ni oudo ociko wa di ekwongere be, ‘Ilam mak ngat koyaro camo cam tin.’ Aso, isirikalen dedede nan kec obwono.”

²⁹ Di Jonasan oko waco be, “Papa na omio jo peko. Neningo ango nan atieko udo teko pien abilo mokic moro atitidi.

³⁰ Oudo koto ebedo ber kalamo ka isirikalen oudo ocamo gikame kimao kibut jo me Pilistia, pien oudo koto kitwero neko isirikalen me Pilistia akalamo.”

³¹ Ingei jo me Isirael bedo neko jo me Pilistia i ceng nono cako ki Mikimas tuno Aijalon, isirikalen oko nure pi kec;

³² manono oko mino gi kibwangere i kom gikame kimao kibut jokwor, di kiko mamako romini, twonin kede roce di kiko ngongolo gi, di kiko camo gi di pwodi remo tie i kom gi.

³³ Di oko waco ne Saulo be, “Neningo, isirikalen tie timo dub i nyim Rwot, pien kitie camo ringo kame remo tie iye.” Saulo oko dwoko be, “Wun iturunu cik; nan lorunu kidi adwong i nyima kan.”

³⁴ Saulo oko mino cik ace be, “Otunu but jo di ikounu waco negi be, ‘Poore jo dedede kel doke kede romini gi, di kiko ngongolo gi kan di kiko camo gi; do kur kitim dub but Rwot me camo ringo kame remo tie iye.’ ” Aso, iwor nono isirikalen dedede oko kelo twonin gi di kiko ngongolo gi kanono.

³⁵ Saulo oko gero alutari ne Rwot; manono oudo obedo alutari me agege kame Saulo ogero ne Rwot.

³⁶ Di Saulo oko waco ne jo mege be, “Ootunu piny okounu suro jo me Pilistia iwor di okounu yako gi paka piny ru; kur owekunu ngatamoro kibut gi di ekuo.” Jo oko dwoko be, “In tim gikame in ineno be ber.” Do ngasaseredoti oko waco be, “Ber kong openyunu tam ka Rubanga ki kan.”

³⁷ Aso, Saulo oko penyo Rubanga be, “Aoti asur jo me Pilistia? Benyo, ibino mino gi i cing jo me Isirael?” Do likame Rubanga oko dwoko peny mere i ceng nono.

³⁸ Saulo oko waco ne jo kame oudo telo jo be, “Bianu kan omounu dub kame kotimo tin noni.

³⁹ Pien ango alairo i nying Rwot kakuo, ngat kame lako Isirael be, kobino neko ngat kotimo gi nono, akadi bed bala en ebedo woda Jonasan.” Do likame ngatamoro oko dwoko ne kop moro.

⁴⁰ Di Saulo oko waco negi be, “Wun ibinunu bedo i bad tetucel, di ango kede woda Jonasan wada oko bedo i bad tetucel.” Jo oko waco ne Saulo be, “In tim gikame ineno be ber.”

⁴¹ Di Saulo oko waco be, “Okwe Rwot Rubanga me Isirael, pinyo komio tin likame idwoko dog ngatic ni? Ka dub noni tie but ango kede woda Jonasan, Okwe Rwot Rubanga me Isirael, nyut kede Urim; do ka raco noni tie but jo me Isirael nyut kede Tumim.” Di alulu oko nyuto Jonasan kede Saulo papa mere, do jo apat oko bwot.

⁴² Di Saulo oko waco be, “Ucunu alulu i dierediere nango kede Jonasan.” Alulu oko nyuto Jonasan.

⁴³ Saulo oko penyo Jonasan be, “Nyo kame in itimo?” Jonasan oko dwoko be, “Ango awado kic moro atitidi kede wi ebela kame oudo tie i cinga di ako camo; ango ine, ayei to.”

⁴⁴ Saulo oko waco be, “Poore Rubanga neka ka likame koneki; Jonasan, ateteni in iyaro to.”

⁴⁵ Di jo oko waco ne Saulo be, “Benyo, kom ateteni koyaro neko Jonasan ngat kobwono yi adwong i Isirael? Likame twerere! Wan olairo i nying Rwot kakuo be, likame akadi yer wie acel bino poto piny; pien i ceng atin tic kame en etimo oudo etimo kede kony kame wok kibut Rubanga.” Aso jo oko lako kuo ka Jonasan likame oko neke.

⁴⁶ Ingei manono Saulo oko do jiko wapo jo me Pilistia, di jo me Pilistia oko dok i lobo gi.

Apugan ka Saulo

⁴⁷ Kakame bin Saulo odoko kede abaka me Isirael, en eko yi kede jokwor mege i bad dedede; eyi kede jo me Moab, Amon, kede Edom, abakai me Soba, kede jo me Pilistia; en ebwono gi i yi dedede.

⁴⁸ En eyi kede teko di eko bwono jo Amalek di eko lako jo me Isirael kibut jo kame bin oyako gi.

⁴⁹ Awobe ka Saulo gin oudo Jonasan, Isibi kede Malikisua; en oudo etie kede anyira are, nyako adwong nyinge oudo Merab, kede nyako atidi nyinge oudo Mikal.

⁵⁰ Dako ka Saulo nyinge oudo Akinoam nyar ka Akimas. Nying ngadwong me isirikalen mege oudo Abuneri wot ka Ner, kame oudo obedo omin me papa me Saulo.

⁵¹ Kis papa me Saulo kede Ner papa me Abuneri oudo obedo awobe ka Abiel.

⁵² I kare me pug ka Saulo lung en ebedo kede yi atek i kom jo me Pilistia; doko ka en oudo eneno awobi moro ikukurana i yi, en oudo erwake i kom isirikalen mege.