1 Samuel 13 - Baibuli I Leb Kumam 2013

Saulo Oyi kede Jo me Pilistia

² Saulo oko yero cuo tutumia adek (3,000) me Isirael; cuo tutumia are (2,000) oko dong kede en Mikimas kede i lobo kobedo mori mori me Betel, di eko cwano cuo tutumia acel (1,000) Gibea kede wode Jonasan, i adul ka Benjamin; jo apat en eko cwano odok i miere gi.

³ Jonasan oko neko ngadwong me isirikalen me Pilistia i Geba di jo me Pilistia oko winyo kop nono. Saulo oko cwano jo pi kuto agwara i lobo me Isirael dedede pi lwongo Iburanian ot yi.

⁴ Jo dedede me Isirael oko winyo be Saulo oneko ngadwong me isirikalen me Pilistia, kede da be jo me Isirael otieko doko bala gi angwece mere rac but jo me Pilistia. Jo oko yei lwongo me ot konyo Saulo i Giligal.

⁵ Jo me Pilistia oko cokere pi ot yi kede jo me Isirael; oudo kitie kede cabalan tutumia ot adek (30,000), kede jo yi kame ringo kede asigiran tutumia kanyape (6,000), kede isirikalen kame tot bala asinge me dog nam. Gin kiko ot di kiko gero kimere gi Mikimas, tetu kide me Bet Aben.

⁶ Kakame jo me Isirael oneno kede be jokwor oudo tie dino isirikalen gi, gin kiko ot pwopwono i abo, kede i buge, kede i dier kide me mori, kede i atesin kame koroko i lela, kede i bure mogo kame jo kunyo me coko pii.

⁷ Iburanian mogo oko ngolo ecilet me Yorodan ot i lobo me Gad kede Gilead. Saulo oudo pwodi tie Giligal, di jo dedede kame oudo tie kede en kom gi oko donyo miel amiela pi lworo.

⁸ Saulo oko kuro pi ceng kanyaare bala kame Samuel oudo owaco ne, do likame Samuel oko bino Giligal, di do isirikalen oko cako yai weko Saulo.

⁹ Aso, Saulo oko waco be, “Kelanu giayala awanga kede giayala me nywak.” Di en eko mino giayala awanga.

¹⁰ Cucuto di en etieko mino giayala awanga, Samuel oko tuno; en eko ot bute pi riamo kede di eko game.

¹¹ Samuel oko penye be, “Nyo kame in itimo?” Saulo oko dwoko be, “Kakame ango aneno kede be isirikalen oudo tie yai weka, do di in oudo likame iko bino i kare me ceng kanyaare kame oudo ocikere kedi iye, doko di medo i wi mano isirikalen me Pilistia oudo tie cokere Mikimas,

¹² ango do ako waco kena be, ‘Jo me Pilistia nan tie bino sura i Giligal, do di likame ango pwodi akwao winyo kibut Rwot’; manoni oko dina tetek pi mino giayala awanga.”

¹³ Samuel oko waco ne Saulo be, “In itieko timo tim me mingo; in likame ilubo cik ka Rwot Rubanga ni kame eciko ni. Rwot oudo oyaro mino ajakanut nin cungo i Isirael pi ikar kede ikar.

¹⁴ Do nataman ajakanut nin likame bino meede; Rwot bino udo dano kame cunye mito di eko mine edoko ngat kame pugo jo mege, pien likame itieko lubo gikame Rwot ociko ni pi timo.”

¹⁵ Samuel oko yai ki Giligal di eko mako yongayo mere. Jo ace apat oko lubo Saulo ot but isirikalen, yai ki Giligal tuno Gibea, en adul ka Benjamin.

¹⁶ Saulo, wode Jonasan, kede jo kame oudo tie kede gi oko bedo Geba kakobedo adul ka Benjamin; do isirikalen me Pilistia oko gero kimere gi Mikimas.

¹⁷ Isirikalen oko wokun ki kimere me jo me Pilistia i ikodeta adek pi cako yi; ekodet acel odok tetu Opura i lobo me Sual,

¹⁸ ekodet ace oko dok tetu Bet Koron, kede ekodet ocelu oko dok tetu ikor kame neeno kede aditot me Seboim kede wi tim.

¹⁹ Aso, jotet oudo likame tie i lobo me Isirael dedede, pien jo me Pilistia oudo owaco be, “Iburanian likame poore teto ipimai kede tongini pirgi”,

²⁰ manono oudo omio jo me Isirael dedede obedo ot but jo me Pilistia pi peno leb kwei gi me ecuka, adimai, lee kede pale gi me kac gi.

²¹ Wel me peno leb kwei me dok kede kwei me cing oudo tie ogap are, do wel me peno lee kede dupo ebela me kolo ecuka oudo tie ogap acel.

²² Aso, i ceng me yi likame tie sirikale moro me Isirael kame oudo tie kede epima amoto tong, kwanyo kenekene Saulo kede wode Jonasan.

²³ Ekodet me isirikalen me Pilistia oko ot paka i aditot kakame yongayo beo iye i Mikimas.