1 Samuel 12 - Baibuli I Leb Kumam 2013

Kop kame Samuel Owaco ne Jo

¹ Samuel oko waco ne jo dedede me Isirael be, “Ango atieko yei kope dedede kame iwacunu na, di nan ako keto ne wu abaka kame pugo wu.

² Nenunu, abaka en kame nan do telo wu; ango atieko ti, doko lwar omako wia; do awobe na tie kede wu. Ango abedo telo wu cako di pwodi ango atin awobi tuno tin.

³ Ango nan ine kan; wacanu i nyim Rwot kede i nyim abaka mere kame en eyero, gimoro arac kame ango atimo. Ngai kame ango atieko tero twon mere? Ngai kame ango atieko tero punda mere? Arabo ngai kame ango atieko kwalo, arabo kame atieko tero kirac? Arabo ngai kame ango atieko gamo cemusana kibute pi umo wanga? Ka ango atieko timo gi nogi, tucanu di ango ako bino culo wu.”

⁴ Jo oko dwoko be, “In likame ikwalo wa amoto tero wa kirac, akadi tero gimoro kibut ngatamoro.”

⁵ Samuel oko waco be, “Rwot karacel kede abaka kame en eyero tie ijurak na be, i ceng atin likame tie gimoro arac kame iudunu buta.” Jo oko dwoko be, “Ebo, Rwot en mujura wa.”

⁶ Samuel oko meede kede yamo be, “Rwot en mujura wa, en ngat kame bin eyero Musa kede Aaron di eko woto joakwari wu ki lobo me Misiri.

⁷ Pi mano, nan do cungunu ikounu winyo, di ango apido wu i nyim Rwot; di atuco ne wu tice dedede me alako kame Rwot otimo ne wu kede ne joakwari wu.

⁸ Di bin Yakobo kede jo me ture ooto Misiri di jo me Misiri oko donyo tero gi kirac, joakwari wu bin oko kok but Rwot di Rwot oko cwano negi Musa kede Aaron, jo kame oko woto joakwari wu ki Misiri di kiko kelo gi di kiko mino gi bedo i lobo noni.

⁹ Do wi jo oko wil kede Rwot Rubanga gi, di en eko jalo gi i cing Sisera, en ngadwong me isirikalen ka Abaka Jabin me Asor, kede i cing jo me Pilistia, kede i cing abaka me Moab; jo nogi oko yi kede joakwari wu paka bwono gi.

¹⁰ Joakwari wu oko kok but Rwot di kiwaco be, ‘Wan otieko dubo, pien wan oweki Rwot di oko donyo woro rubangan Baal kede Asitate; do nan lak wa ki cing jokwor wa di wan oko donyo bino wori!’

¹¹ Di Rwot oko cwano Jerubal, Barak, Yeputa kede ango, di wan oko lako wu ki cing jokwor wu, di ikounu bedo kede mulem.

¹² Do kakame inenunu kede be Abaka Nakas me Amon oudo mito suro wu, wun ikounu waco na be, ‘Li ba, wan omito abaka kame bino pugo wa,’ bed bala Rwot Rubanga wu en oudo obedo abaka wu.

¹³ “Nenunu, abaka kame wun iyerunu ine; wun en ipenyunu be mi wu, nan Rwot otieko keto ne wu abaka noni pi pugo wu.

¹⁴ Gi dedede bino bedo ne wu kiber ka ibinunu lworo Rwot di ikounu tic ne en, kede ka iwinyunu dwane di likame ikounu weko lubo cik mege, ka wun dedede karacel kede abaka kame pugo wu olubo kop mere.

¹⁵ Do ka wun ibinunu dagi winyo dwan Rwot, di ikounu bino dagi lubo cik mege, Rwot bino tojo wu, wun karacel kede abaka wu.

¹⁶ Pi mano, nan do cungunu kanoni di ikounu neno gi adwong kame Rwot oyaro timo i nyimu.

¹⁷ Mam kare me oro ine kame jo nyaro iye engano? Aso, ango ayaro lwongo Rwot di en eko cwano kot acwei di emwomwocun; manono bino mino ingeunu raco wu adwong kame itimunu i nyim Rwot, en raco me penyo be mi wu abaka kame pugo wu.”

¹⁸ Aso, Samuel oko lego but Rwot, di Rwot oko cwano kot kame cwei di emwomwocun i ceng nono.

¹⁹ Jo dedede oko waco ne Samuel be, “Leg but Rwot Rubanga ni pi jotic ni, tetekeny kur otoi; pien wan otieko medo i kom dub wa raco me penyo be mi wa abaka kame pugo wa.”

²⁰ Samuel oko dwoko be, “Kur ibedunu kede lworo; wun itiekunu timo raco noni, do kur iwekunu lubo Rwot, do tiunu ne kede cunyu lung.

²¹ Kur ilokerenu lubo caljwogi, gimogo kame kony gi li, gi kalikame kelo ne wu bero moro arabo lako wu, pien kony gi li.

²² Pien Rwot likame bino uco jo mege, likame ebino timo manoni pi gwoko nyinge adwong, pien etieko yomo cuny Rwot pi mino wun doko jo mege.

²³ Do kitetu buta, likame ango amito timo dub but Rwot i yore me jiko lego ne wun, do ango abino pwonyo wu gikame ber kede kopoore kame ipoorenu timo.

²⁴ Kenekene lworunu Rwot, di ikounu timo ne tic kede genere kede cunyu lung; kong yutununu gi adongodongo kame en etimo ne wu.

²⁵ Do ka imeedenu kede dub, kobino wearo wun dedede karacel kede abaka wu.”