1 Samuel 11 - Baibuli I Leb Kumam 2013

Saulo Obwono Jo Amon

¹ Di kare okato bala duwe acel, Abaka Nakas me Amon oko telo isirikalen mege ot yi di kiko lukaro bomba me Jabes kame tie Gilead. Cuo dedede me Jabes oko waco ne Nakas be, “Tim kede wa isikan, di wan oko donyo tic nin.”

² Do Nakas dano me Amon oko waco negi be, “Abino yei timo kede wu isikan kwanyo kenekene ka iyeunu be agol wang ngat acelacel me tetu cam, manono ko bino mino lewic mako jo dedede me Isirael.”

³ Jotel me Jabes oko waco ne be, “Wek wa ber kong pi ceng kanyaare, me wek kong ocwai jo kabedere dedede me Isirael. Ka ngatamoro asobolo konyo wa likame oko udere, di do wan oko bino jalere i twer nin.”

⁴ Kakame jo kame kocwao otuno kede Gibea kakame Saulo bedo iye, gin kiko waco kop nono di jo dedede tie winyo; jo dedede oko koko kede dwan amalo.

⁵ Esawa nono Saulo oudo tie dwogo kede twonin ki poto, di en eko penyere be, “Nyo arac? Pinyo komio jo dedede tie koko?” Gin kiko waco ne kop kame jo me Jabes ocwao.

⁶ Kakame Saulo owinyo kede manoni, tipo ka Rubanga oko donyo i kuo mere, di eko doko ger.

⁷ En eko kwanyo twonin are di eko ngongolo gi i adulion atitino di eko cwano jo oyeo adulion nogo rimaro kede gi kabedere dedede me Isirael, kede ikwenyar kame waco be, “Ngat odagi lubo Saulo kede Samuel ot i yi, kobino timo ne twonin mege da kamanoni!” Jo me Isirael oko bedo kede lworo pi gikame Rwot oudo twero timo, di do jo dedede oko cokere kede cuny acel abongo ngatamoro dong.

⁸ Saulo oko coko gin dedede Besek; jo kowok ki Isirael oudo tie tutumia tol adek (300,000), kede jo kowok ki Yuda oudo tie tutumia ot adek (30,000).

⁹ Gin kiko waco ne jo kame kocwao ki Jabes be, “Otunu iwacunu ne jo me Jabes be, tuno esawa me i dier iceng diki udo kotieko lako wu.” Kakame jo kame oudo kocwao obino di kiko waco ne kede jo me Jabes kop nono, gin kiko lelo.

¹⁰ Di do jo me Jabes oko waco ne Nakas be, “Diki wan obino jalere i cingi di do in iko timo ne wa gikame cunyi mito.”

¹¹ Iwor nono Saulo oko popoko jo mege i ikodeta adek. Obai gin kiko ot i kimere me isirikalen me jo Amon di kiko suro gi, di kiko donyo ngolongolo ngut gi paka tuno esawa kanyape. Jo kobwot oko ringo ngat acelacel yore kene.

¹² Jo oko waco ne Samuel be, “Alu oudo en kowaco be Saulo likame twero pugo wan? Kelunu gi but wa tetekeny onek gi!”

¹³ Do Saulo oko dwoko be, “Likame tie ngatamoro kame kobino neko tin, pien tin en ceng kame Rwot olako kede jo me Isirael.”

¹⁴ Samuel oko waco ne jo be, “Bianu ootunu Giligal pi medo moko abaka wa odocon.”

¹⁵ Aso, jo dedede oko ot Giligal di kiko moko Saulo i nyim Rwot pi bedo abaka. Gin kiko mino giayala me nywak i nyim Rwot ki kuno, di Saulo kede jo dedede me Isirael oko kilel twatwal.