1 Samuel 10 - Baibuli I Leb Kumam 2013

¹ Di Samuel oko kwanyo opoko me mo me olibeti di eko onyo i wi Saulo eko note, di eko waco ne be, “Rwot otieko wiri idoko ngapug me jo mege me Isirael. In ibino pugo jo mege di iko gwoko gi kibut jokwor gi dedede. Gikame nyuto be Rwot otieko yeri pi bedo ngapug me jo mege ine:

² kame in tin itieko yai kibuta, ibino riamo kede jo are i nget ates ka Lakeri kame tie Selesa i adul ka Benjamin. Gin kibino waco ni be pundan kame in oudo itie mono otieko udere, nan do papa ni likame tie paro gi do elokere do paro wun di ewaco be, ‘Abino timo nadi pi woda?’

³ Di in iko bino meede ot paka tuno i yat oak me Tabor. Cuo adek kame tie ot Betel woro Rubanga bino riamo kedi kuno, acel peo idwe diegi adek, ace mako mugati adek, kede ocelu mako isau me lau kame bwini tie iye.

⁴ Gin kibino moti di kiko mini mugati are, kame poore in igami.

⁵ Ingei manono in iko bino ot i Moru ka Rubanga kame tie Gibea, kakame isirikalen me Pilistia ogero iye kimere gi. Di do ka itie donyo i bomba, ibino riamo kede ekodet me inabin di kitie lor wok ki abila kame tie i wi moru, di kotie gono adungu, ayekeyeke, arigirigi kede di kokuto bilo i nyim gi; ibino riamo kede gi di kitapaun yamo kop ka Rubanga kede twon yomcuny.

⁶ Di do tipo ka Rwot ko bino donyo i komi di ida iko atapaun cako tuco kop ka Rubanga kede twon yomcuny karacel kede gin, di iko lokere idoko dano apat.

⁷ Kame gianena nogi otimere ni, tim gi dedede kame ibino neno poore ni me atima, pien Rubanga bino bedo tie kedi.

⁸ In ibino cako ot nango Giligal di ango ako bino udi kuno pi mino giayala awanga kede pi mino giayala me nywak. In ibino kura pi ceng kanyaare paka ango tuno di ako waco ni gi kame ipoore timo.”

⁹ Kakame Saulo oloko kede ngee yai, Rubanga oko mino Saulo cuny anyen, di gi dedede kame Samuel owaco ne cenge nono oko cobere.

¹⁰ Kakame gin kiyai kede ki kuno di kitie ot Gibea, en eko riamo kede ekodet me inabin, di tipo ka Rubanga oko donyo i kome; di eda eko tapaun cako tuco kop ka Rubanga kede yomcuny karacel kede gin.

¹¹ Kakame jo dedede koudo ngee sek oneno kede kite kame eyamo kede kop ka Rubanga bala enabi karacel kede inabin ace apat, jo oko donyo penyere ken gi ken gi be, “Nyo kotieko timere ne wot ka Kis? Benyo, Saulo da otieko doko enabi?”

¹² Icuo moro kame oudo bedo kanono oko dwoko be, “Do ngatel me inabin go obedo ngai?” Manoni en oko nywalo yamo kame waco be, “Benyo, Saulo da otieko doko enabi?”

¹³ Kakame Saulo otieko atapaun yamo kede kop ka Rubanga di emielo kede yomcuny, en eko dok paco.

¹⁴ Omin me papa me Saulo oko penye karacel kede awobi ngatic kame oudo eupere kede be, “Oudo wun iotunu tuai?” Saulo oko dwoko be, “Wan oudo ooto mono pundan, do kakame likame oko twero udo gi kede, wan oko ot but Samuel.”

¹⁵ Omin me papa me Saulo oko waco ne be, “Wacanu gikame Samuel owaco ne wu.”

¹⁶ Saulo oko dwoko ne be, “En ewaco ne wa be kotieko udo pundan nogo.” Do Saulo likame oko waco ne kop kame Samuel oudo owaco ne amakere kede en doko abaka.

Koyero Saulo pi doko Abaka

¹⁷ Samuel oko lwongo jo pi cokere Misipa pi riamo kede Rwot

¹⁸ di eko waco negi be, “Rwot Rubanga me Isirael owaco be, ‘Ango awoto wun jo me Isirael ki Misiri, di ako lako wu ki cing jo me Misiri kede ki cing ajakanuto dedede kame oudo tie tero wu kirac.’

¹⁹ Do wun tin itiekunu dagi Rubanga wu, ngat kalako wu ki peko kede ki can dedede, di ikounu waco be, ‘Li! Do ket ne wan abaka apugo wa.’ Nan do cungunu i nyim Rubanga di lubere kede atekerin kede ikekon wu.”

²⁰ Di Samuel oko mino ateker acelacel me Isirael onyikino anyim, di alulu oko nyuto ateker ka Benjamin.

²¹ Di en eko mino jo me ikekon dedede me ateker ka Benjamin onyikino anyim di alulu oko nyuto ekeko ka Maturi. Me ajikini en eko mino jo me ekeko ka Maturi obino anyim acelacel, di alulu oko nyuto Saulo wot ka Kis. Gin kiko donyo mone do likame kiko ude.

²² Di do gin kiko bobo penyo Rwot be, “Icuo nono da oudo obino kan?” Rwot oko dwoko be, “Saulo ica tie pwono i dier jame.”

²³ Gin kiko ringo ot ome ki kuno. Kakame ecungo kede i dier jo, wie kede epepet mege oudo bor kalamo me jo dedede.

²⁴ Di Samuel oko waco ne jo dedede be, “Man en dano kame Rwot oyero! Likame tie ngatamoro ace bobo kame cal bala en.” Di jo dedede oko lelemo be, “Abaka bed kuo pi kare kalac!”

²⁵ Samuel oko tatamo ne jo twero kede tice me abaka; eko wandiko gi i itabu di eko cibo itabu nono i nyim Rwot. Di do Samuel oko peruno jo dedede odok i miere gi.

²⁶ Saulo da oko dok paco mere Gibea. Cuo mogo atek yi kame Rubanga oudo odonyo i cuny gi da oko upere kede en.

²⁷ Do jo mogo akony gi li oko penyere be, “Kom ateteni icuo ni twero lako wan?” Gin kicae di kiko dagi mine giamia. Do en eko gire kweno kome.