1 Samuel 1 - Baibuli I Leb Kumam 2013

Elikana kede Jo me Ture i Silo

¹ Bin oudo tie icuo moro anyinge Elikana, dano me ekeko ka Epuraimu. En oudo ebedo i bomba me Rama i piny kobedo mori mori me Epuraimu. Papa mere oudo nyinge Yerokam; oudo en ebedo akwar Eliku, dano me ot ka Toku, dano me ekeko ka Sup.

² Elikana oudo tie kede mon are; nying acel oudo Aana kede ocelu nyinge oudo Penina. Penina oudo tie kede idwe, do Aana oudo li kede idwe.

³ Mwaka acelacel Elikana oudo yai ki Rama di eko ot woro Rwot me jo yi kede mine giayala i Silo, kakame Kopuni kede Pinekasi, awobe ka Eli oudo tie iye bala josaseredoti ka Rwot.

⁴ Kare acelacel kame Elikana oudo mio kede giayala, en oudo emio iner acel me ringo but Penina, kede awobe kede anyira mege dedede da eko mino gi iner acelacel buli dano;

⁵ do en oudo emio Aana iner adwong kalamo jo apat, pien oudo emare, bed bala Rwot oudo otwone nywal.

⁶ Nyeke oudo maro wango cunye twatwal di ecae, pien Rwot oudo otwone nywal.

⁷ Man obedo timere mwakini kede mwakini; tek kame gin oudo kioto i ot ka Rwot, Penina oudo wango cuny Aana. Manono oudo mio Aana donyo koko di eko dagi cam.

⁸ Elikana cware oudo ko donyo pepenyo en be, “Aana, itie koko pinyo? Pinyo komio idagi cam? Pinyo komio itie kede wangcuny? Iparo be kibuti ango likame atwero kalamo awobe tomon?”

Aana kede Eli

⁹ Ceng acel di oudo kitieko cam kede mato giamata i Silo, Aana oko yai malo. Eli ngasaseredoti oudo tie bedo i nget ekeko me tempulo ka Rwot.

¹⁰ En oudo etie kede cwercuny adwong twatwal, di eko donyo koko kitek.

¹¹ En eko kwongere be, “Okwe Rwot me jo yi, koto ineno can kame ango ngatic ni atie iye, di iko yutuno ango, di likame wi ko wil kede ango ngatic ni, do iko mina atin awobi. Koto ango ako bino mine buti pi kare me kuo mere lung. En likame ebino mato bwini amoto mato gi ace amero jo, doko da likame ebino lielo wie.”

¹² Aana oko meede lego but Rwot pi esawa alac, di Eli oudo tie ngino doge.

¹³ Aana oudo tie ilega eliling; doge oudo timere nyumenyume, do likame oudo tie yamo moro awinyere; manono oko mino Eli otamo be oudo emer.

¹⁴ Aso, Eli oko waco ne be, “Iyaro meede nyuto amera ni paka awene? Mi bwini tiek ki wii.”

¹⁵ Aana oko dwoko ne be, “Adwong, ango likame amer, ango abedo dako atie kede twon peko; likame ango atieko mato bwini amoto kongo moro ace, do ango atie lego di amio peko na but Rwot.

¹⁶ Kur iter ngatic ni bala dako akony mere li. Ango abedo ilega kaman pi par kede wangcuny kame atie kede.”

¹⁷ Eli oko waco be, “Ot kede mulem; akwao Rubanga me Isirael mi gikame ikwae.”

¹⁸ Aana oko dwoko be, “Akwao ibed kede cuny me mwolo buta nakanaka.” Di do eko ot di eko cam kede amata kede cware, likame bobo eko bedo kede cwercuny.

Konywalo Samuel di oko Mine but Rubanga

¹⁹ Ceng alubo mere Elikana kede jo me ture oko yai odiko sek di kiko woro Rubanga, di kiko dok paco gi i bomba me Rama. Elikana oko buto kede dako mere Aana, di Rwot oko gamo kwac ka Aana.

²⁰ Aso, Aana oko yac di eko nywalo atin awobi. En eko cako nyinge Samuel, pien ewaco be, “Ango akwae kibut Rwot.”

²¹ Kare bobo oko tuno di Elikana kede jo me ture oko ot Silo pi mino Rwot giayala kame bin kimio buli mwaka, kede pi cobo gikame oudo ekwongere iye.

²² Do Aana likame oko ot kede gi. En ewaco ne cware be, “Cucuto kame ango atieko twono atin noni dot, ango abino tere i ot ka Rwot, di en eko bino dong kuno atwal.”

²³ Elikana oko dwoko be, “In tim gikame ineno be ber nin; kur kong paka tuno ka itieko twono atin dot. Kenekene akwao Rwot mi gikame icikere iye cobere.” Aso, Aana oko dong paco doto atin mere.

²⁴ Kakame etieko twono kede atin dot, en eko tere Silo; etere karacel kede twon me mwakini adek, kilo tomon me alos, kede bwini atie i isau kame kotimo kede lau. En etere Silo i ot ka Rubanga kede titidi mere nono.

²⁵ Gin kiko ngolo twon di kiko tero atin but Eli.

²⁶ Aana oko waco be, “Adwong, ateteni ango en dako angoce ocungo kan i nyimi di alego but Rwot.

²⁷ Ango alego pi udo atin noni, di Rwot oko mina gikame akwae.

²⁸ Nan ango amie but Rwot. En eyaro bedo me ka Rwot i kare me kuo mere lung.” Gin kiko woro Rwot ki kuno.