1 Petero 5 - Baibuli I Leb Kumam 2013

Romini ka Rubanga

¹ Ango abako doga but joadongo kame tie i diere wu, bala adwong wad gi kame obedo mujura me can kame Kirisito oneno, doko da bala ngat kame nywako deyo kame kobino nyuto.

² Kwaunu romini ka Rubanga kame tie i cingu abongo adiadia moro, do kede mit wu kenu; likame pi mito ud moro, do pi mit me cunyu.

³ Kur ipugunu kirac jo kame koketo i cingu, do bedunu anyut aber me aluba but romini,

⁴ mio kame Ngakwat Adwong obino, ibinunu udo ocoro kalikame dubere me deyo.

⁵ Kamanono da, wun jo atino, iwinyunu joadongo. Wun dedede bedunu jo kame mwolere, ngat acelacel but ngawote, pien kowandiko be, “Rubanga dagi jo kame wakere, do emio jo kame mwolere winyo.”

⁶ Pi mano, mwolerenu i twer ka Rubanga, me wek eting wu malo kame kare oromo.

⁷ Ketunu par wu dedede i kome, piento en eparo piru.

⁸ Bedunu di wi wu riek kede di ikiunu piny. Ngakwor wu Sitani tie wire bala engu kame dorano, di emo ngatamoro ecamaro.

⁹ Wun cerededunu ne, di icungunu kitek i yei wu, doko di ingeunu be imiegu kede amiegu wu i piny lung tie beo iepone me can nogo.

¹⁰ Do ingei wun neno can pi kare moro acecek, Rubanga won kisa lung, ngat kolwongo wu i deyo mere kame bedo nakanaka i Kirisito, en kikome ebino dwoko kuo wu kakare, ebino konyo wu, ebino mino wu teko di eko sipakino wu.

¹¹ Twer bed bute ikar kede ikar. Amen.

Amot me Ajikini

¹² Ango awandiko ne wu baluwa acecek noni kede kony kame Sila omia, en ngat kame ango atero be omin wa kame genere i Kirisito. Ango adio cunyu doko di amio wu ijura be, man en kisa ka Rubanga me ateni; cungunu iye kitek.

¹³ Jokirisito jowot wu kame tie Babilon, kame Rubanga oyero karacel kede wu omoto wu. Marako woda omoto wu da.

¹⁴ Moterenu kenu kenu kede amot me amara. Mulem bed butu dedede, wun jo kame itienu i Kirisito.