1 Jotesalonika 5 - Baibuli I Leb Kumam 2013

Iikerenu pi Dwogo ka Rwot

¹ Imiegu kede amiegu na, kony likame tie me wandiko ne wu kop kame mako ceng kede kare kame gigi bino timere iye,

² pien wuda ingeunu kiber be ceng me dwogo ka Rwot oyaro ngoole bala ngakuwo kame bino iwor.

³ I kare kame jo waco kede be, “Mulem tie, piny okwei,” en kame peko ngoole ne gi kede bala aramo me nywal, di likame tie dano kame ko bino bwot kiye.

⁴ Imiegu kede amiegu na, wun likame itienu i colo, me wek ceng nono bin ngoole ne wu angola bala ngakuwo.

⁵ Pien wun dedede ibedunu idwe me lero kede idwe me iceng; wan likame idwe me iwor amoto me colo.

⁶ Pi mano, wan kur oninunu bala kame jo apat timo, do obedunu di oneenunu, kede di wi wa riek.

⁷ Pien jo kame nino, gin kinino iwor, kede jo kame mer da, gida kimer iwor.

⁸ Do bala kame wan otienu idwe me iceng, poore obedunu di wi wa riek, di okounu ngapo yei kede amara pi bedo bala ebuku kame gwoko kor wa, kede okounu ngapo gen me alako pi bedo bala ocoro atek kame gwoko wi wa.

⁹ Do likame Rubanga oiko be lilo mere poti i kom wan, do eiko pi wan udo alako pi Rwot wa Yesu Kirisito,

¹⁰ en ngat kame oto pirwa, tetekeny akadi di oneenunu amoto oninunu, wek obedunu karacel kede en.

¹¹ Pi mano, diunu cuny ngat acelacel, doko gerunu kuo me cunyu kenu kenu bala kame nan itienu timo.

Acora kede Amot me Ajikini

¹² Wan obako dog wa butu, imiegu kede amiegu, pi bedo kede wor but jo kame tie timo tic i diere wu, di kitelo wu i Rwot kede di kicoro wu.

¹³ Miunu gi wor amalo twatwal kede amara pi tic kame gin kitie timo. Bedunu kede mulem i diere wu.

¹⁴ Doko wan okwao wu, imiegu kede amiegu, corakinunu jo kame bedo abeda, dwokunu cuny jo kame cuny gi odoko nyap, konyunu jo agoro, bedunu kede dire i kom gin dedede.

¹⁵ Nenunu be likame ngatamoro kibutu oculo raco kede raco, do tamakinunu timo bero i kare lung, ngat acelacel ne ngawote kede ne jo dedede.

¹⁶ Lelunu nakanaka.

¹⁷ Legunu i kare dedede,

¹⁸ pwounu Rubanga i gi dedede, pien manoni en gikame Rubanga mito ne wu i Kirisito Yesu.

¹⁹ Kur igengunu tice me Tipo Kacil.

²⁰ Kur icaunu kope me inabin,

²¹ do pimunu kope nogo dedede; mokunu i kom gikaber,

²² wekunu epone dedede me gikareco.

²³ Ango akwao Rubanga won mulem, en kikome elony wu atwal atwala; egwok tipo wu kede cunyu kede komu kiber, di ikounu bino bedo abongo kop moro kame kobunano wu iye i ceng me dwogo ka Rwot wa Yesu Kirisito.

²⁴ Ngat kolwongo wu bino timo manoni, piento en egenere.

²⁵ Imiegu kede amiegu na, legunu pirwa.

²⁶ Motunu imiegu kede amiegu dedede kede amot me notere kacil.

²⁷ Ango aciko wu kitek i nying Rwot be, somunu baluwa noni ne imiegu kede amiegu dedede.

²⁸ Kisa ka Rwot wa Yesu Kirisito bed butu.