1 Jotesalonika 3 - Baibuli I Leb Kumam 2013

¹ Pi mano, kakame wan oneno kede be, likame bobo wan oromo meede kanyakino, wan oko do yei dong Asene kenwa,

² di oko cwano ne wu Temeseo, ngat kame obedo omin wa kede ngatic ka Rubanga i tuco ejiri ka Kirisito, pi mino wu teko kede nwangcuny i yei wu,

³ tetekeny ngatamoro kur yei mere dok cen pi itidil nogi. Wuda kikomu ingeunu be wan miero obeunu iye itidil nogi.

⁴ Pien i kare kame bin otie kede wu, wan oudo owaco ne wu sek be kobino tidilo wa, manoni oko timere da bala kame wuda ingeunu kede.

⁵ Pi mano, kakame aneno kede be likame doko oudo aromo kanyakino, ako cwano dano butu tetekeny aud niang i kom yei wu, pien oudo atie kede lworo be cengemogo Sitani otamo wu di eko mino tic wa obedo me nono.

⁶ Do Temeseo nan otieko dwogo but wan kan, en ekelo ne wa kop amit kame mako yei kede amara wu. Doko en eko niango wa be wun nakanaka iyutununu wa kede yomcuny, di itienu kede imue me neno wa, bala kame wada otie kede imue me neno wu.

⁷ Imiegu kede amiegu na, man en komio i peko kede i can dedede kame wan obeo iye, otie kede kweicuny pi yei wu;

⁸ pien nan wan okuo ka wun imeedenu cungo di itekunu i Rwot.

⁹ Pwoc nyo kame wan nan okaruno mino Rubanga piru, pi kilel dedede kame wan otie kede i nyim Rubanga piru?

¹⁰ Iwor kede iceng wan olego kede cuny wa dedede be amoto onen wu wang i wang di oko mino wu gikame orem i yei wu.

¹¹ Akwao Rubanga Papa wa en i kome, kede Rwot wa Yesu, pi iiko ne wa epone me bino butu.

¹² Doko akwao Rwot mi amara wu meede i diere wu kenu kenu, kede but jo dedede, bala kame wan omaro wu kede.

¹³ Doko akwao da be, emi wu tekcuny i kom kop kame mako bedo jokacil, di ikounu bedo abongo raco moro i nyim Rubanga Papa wa i kare me dwogo ka Rwot wa Yesu kede jokacil mege dedede.