1 Jokorinti 9 - Baibuli I Leb Kumam 2013

Twero kede Tice me Ngaor

¹ Mam ango abedo dano kogonyere? Mam ango abedo ngaor? Mam ango aneno Yesu Rwot wa? Mam wun ibedunu adwokini me tic kame ango atimo i Rwot?

² Ka jo ace likame yei be ango ngaor, ateteni kibutun ango abedo ngaor; pien kuo wu i Rwot obedo gikame moko be ango abedo ngaor.

³ Man en gikame ango ajuro ne jo kame momoo kop i koma.

⁴ Mam wan otie kede twero me gamo cam kede giamata?

⁵ Mam wan otie kede twero me upere kede mon wa koyei Kirisito, bala kame joor icegun kede imiegu ka Rwot kede Kepa timo?

⁶ Arabo iparunu be ango kede Baranaba kenekene en kame miero otim tic pi udo epone me kuo?

⁷ Ngai kame timo tic me sirikale di eculere kene? Ngai kame puro olok di likame eko camo anyakini mere? Arabo ngai kame kwao dok di likame emato cak gi?

⁸ Iparunu be ango atie yamo man iye ekite kame dano neno kede? Mam Iswil ka Musa da waco kop acel noni?

⁹ Pien kowandiko iye Iswil ka Musa be, “Kur itwei dog twon kame itie tic kede pi canyo.” Iparunu be Rubanga tie paro pi twonin?

¹⁰ Mam etie yamo kop noni pirwa? Ateteni kop noni kowandiko pirwa, pien ngat kame kwaro kodi, kede ngakac poore bedo kede gen me udo iner gi me gikame kipuro.

¹¹ Ka wan ocuo bero me Tipo ka Rubanga i cunyu, benyo, ebedo pek ne wu ka wada oko udo bero me jamini me kom kibutu?

¹² Ka jo icegun tie kede twero me burao gi nogi kibutu, mam wan do otie kede kame kalamo mergi? Bed bala tie kamanono, wan likame otie tic kede twero noni, do wan okanyakino gi dedede tetekeny kur otim gimoro kame gengo tuco ejiri ka Kirisito.

¹³ Mam wun ingeunu be jo kame komio timo tic me tempulo udo cam gi ki tempulo, kede jo kame tio i alutari udo iner gi me gikame koyalo?

¹⁴ Kamanono da, Rwot ociko be, jo kame tuco ejiri poore udo gikame kikuo kede kiye.

¹⁵ Do ango likame atio kede twero nogi akadi acel, doko ango likame atie wandiko kop noni nan pi mito be igeunu timo na kamanoni. Tikatika ango do atoi akaka mino ngatamoro kwanyo tenge gikame ango awakere iye.

¹⁶ Ka ango atuco ejiri, mano mio likame atie kede gimoro kame awakere iye. Pien etie bala ekatala kame kotieko mina. Do can kame abino neno kalikame atuco ejiri!

¹⁷ Pien ka ango atie timo man i mit na, abino udo giamia me pwoc; do ka likame i mit na, udo atie cobo tic kame kogena kede.

¹⁸ Nan do giamia na me pwoc en nyo? Giamia na me pwoc en yomcuny kame ango audo pi tuco ejiri abongo penyo cul moro, di likame atio kede twero na i tic na me tuco ejiri.

¹⁹ Pien bed bala ango likame atie epasoit ka ngatamoro, ango atieko yei bedo epasoit me jo dedede, me wek amotoko amed loko cuny jo atot but Kirisito.

²⁰ Kame ango atie kede Iyudayan, ango abedo bala Ngayudaya, me wek alok gi but Kirisito. Kame atie kede jo kame Iswil mako, ango adoko bala ngat kame Iswil mako, akadi bed bala ango likame Iswil maka, tetekeny amoto atwer loko jo kame Iswil mako but Kirisito.

²¹ Kame atie kede jo kalikame Iswil mako, ango abedo bala ngat kalikame Iswil mako, tetekeny amoto alok cuny jo kalikame Iswil mako but Kirisito. Man likame dwong mere be ango likame alubo Iswil ka Rubanga; do i ateteni ango alubo Iswil ka Kirisito.

²² Kame ango atie kede jo kame yei gi goro, ango da adoko goro ineno bala ango da abedo ngat acel kikom gi, tetekeny alok cuny gi but Kirisito. Ango atieko doko gimoroni kenekene but jo dedede, tetekeny amoto ami mogo kikom gi ud alako i yore moro dedede kame twerere.

²³ Ango atimo magi dedede pi ejiri, tetekeny ada anywak winyo kame tie iye.

²⁴ Mam wun ingeunu be i piem me ringo, jo kame ringo dedede piemo, do ngat acel kenekene en kame udo giamia me pwoc? Pi mano, ringi tetekeny i ud giamia me pwoc.

²⁵ Ngaringo acelacel me piem lubo iswilia me ringo. Gin kitimo kamano pi udo ocoro me angosibib kame dubere mere, do wan otimo tic wa pi udo kalikame dubere mere.

²⁶ En komio ango likame aringo atatai; doko likame ango adongo gum bala ngat kame tie dodongo wi yamo.

²⁷ Do ango atojo koma pi mine bedo tek di ako kete i loc na, me wek ingei ango tuco ejiri ne jo apat, kur Rubanga wota tenge ki piem.