1 Jokorinti 5 - Baibuli I Leb Kumam 2013

Caro i Ekodet me Jokirisito

¹ Ateteni kop owinyere be tim me caro tie i diere wu, epone me caro kame jo kalikame ngeo Rubanga da likame timo. Pien tie icuo kame odonyo buto kede dako ka papa mere.

² Do di pwodi wun iwakerenu. Akaka manono, mam oudo ipoorenu bedo kede iturur? Riamunu tenge ki diere wu ngat kotimo gi noni.

³ Pien akadi bed bala koma li kibutu, do ango atie kede wu i cuny; aso di cal bala atie kede wu, ango atieko ngolo kop

⁴ i nying Rwot Yesu ne ngat kame otimo akodi gi noni. Kame icokerenu, di ango atie kede wu i cuny kede i twer ka Rwot Yesu,

⁵ wun miero imiunu icuo noni i cing Sitani, me wek nek kome, tetekeny tipo mere amoto ud alako i ceng me dwogo ka Rwot.

⁶ Ewaka wu nono likame ber. Mam ingeunu be arup atitidi mio engano lung kame konyongo buuno?

⁷ Kwanyunu tenge arup acon me dub di ikounu doko bala engano kame konyongo anyen, bala kame ateteni itienu kede abongo arup. Pien kotieko neko bala giayala, Atin Romo wa me Ebaga me Kalamo, en Kirisito.

⁸ Pi mano, wek ocamunu ebaga abongo cuny acol kede tim areco, kame tie bala mugati me arup acon, do ocamenu kede tam koriere kede ateni, kame tie bala mugati kame arup li kiye.

⁹ Ango oudo awandiko ne wu i baluwa na be, kur inywakunu kede jocaro.

¹⁰ Ango likame atie yamo jocaro me piny kan, arabo joeranga kede joyak, amoto jo kame woro cal jwogi, pien mano do mito in iyai tenge ki piny kan atwal atwala.

¹¹ Gikame oudo awandiko en ine be, kur inywakunu kede dano kame lwongere be en omin wa arabo amin wa i Kirisito, do di ecar, arabo en ngaeranga, arabo eworo cal jwogi, arabo en ngadub nying jo, arabo ngamera, amoto en ngayak. Kur inywakunu akadi cam kede akodi dano nono.

¹² Pien likame tic nango obedo me ngolo kop ne jo kalikame lubo Kirisito. Mam jo kame tie i ekodet me jokirisito en kame ipoorenu ngolo ne gi kop?

¹³ Rubanga en kame bino ngolo kop ne jo kalikame oyei Kirisito. Pien kowandiko be, “Riamunu tenge ki diere wu dano kame tie kede tim areco.”