1 Jokorinti 3 - Baibuli I Leb Kumam 2013

Jotic ka Rubanga

¹ Imiegu kede amiegu na, oudo likame atwero yamo kede wu bala jo kame tie kede Tipo ka Rubanga, do bala jo kame tie iekite me kom, bala imukerun i Kirisito.

² Ango oudo apito wu kede cak, likame kede cam anwang; pien oudo likame itwerunu camo cam anwang; akadi nataman da pwodi likame itwerunu,

³ pien wun pwodi itienu iekite me kom. Pien ka nyeko kede lok tie i diere wu, mam udo pwodi itienu bedo iekite me kom, di tim wu cal bala me dano adana?

⁴ Pien ka ngat acel yamo be, “Ango dano ka Paulo,” kede ace be, “Ango dano ka Apolo,” mam udo itienu timere bala jo ajoa me piny?

⁵ Kara Apolo do en ngai? Paulo en ngai? Wan obedo jotic ka Rubanga, jo kame otelo wu yei Yesu Kirisito iekite kame Rwot opoko ne kede ngat acelacel.

⁶ Ango en kame oudo apito kodi, Apolo oko onyo pii iye, do Rubanga en oko mine edongo.

⁷ Pi mano, akadi ngat kopito, arabo ngat koonyo pii, gin dedede pirgi likame tek, do ngat kame pire tek en Rubanga, piento en kame emio kodi odongo.

⁸ Ngat kame pito kede ngat kame onyo pii, gin kirorom, ngat acelacel bino udo cul kame rom kede tic kame en etimo.

⁹ Pien wan obedo jotic karacel kede Rubanga; wun ibedunu poto ka Rubanga, doko da ibedunu gedo mere.

¹⁰ Ango atio kede giamia kame Rubanga opoko na bala ngagedo kipirana; ango agero acakini me ot, dano ace tie rope. Mito dano acelacel gwok ekite kame eropo kede gere.

¹¹ Pien likame bobo tie acakini moro ace kame ngatamoro romo cako gero apat kede kame kotieko cako, en Yesu Kirisito.

¹² Nan ka ngatamoro oropo gedo i wi acakini noni kede saabu, siliba, ingaroi me wel, yen, rido, arabo lum,

¹³ tic me ngagedo acelacel bino nyutere kakaler; Ceng ka Kirisito me ngolo kop bino nyute, pien mac bino nyute; mac bino yeko tice kame ngat acelacel otimo.

¹⁴ Ka gikame dano oropo gero i wi acakini nono likame owang, ngagedo nono bino udo giamia me pwoc.

¹⁵ Do ka tic me dano moro owang, en ebino kei giamia mere me pwoc, do en ebino bwot, bwot kame cal bala ngat kame obelo abela ki mac.

¹⁶ Mam ingeunu be wun en kame tempulo ka Rubanga, bobo da be Tipo ka Rubanga bedo i wun?

¹⁷ Ka ngatamoro oko dudubo tempulo ka Rubanga, Rubanga da bino dudubo en. Pien tempulo ka Rubanga en kabedo kacil, doko wun en kame ibedunu tempulo nono.

¹⁸ Kur ngatamoro ngalere kene. Ka ngatamoro kikom wu tamo be en eriek i piny kan, mito kong edok ngamingo tetekeny edok riek.

¹⁹ Pien rieko me piny kan obedo gi me mingo i nyim Rubanga. Pien kowandiko be, “Rubanga mako jorieko i rieko gi,”

²⁰ kede bobo be, “Rwot ngeo be tam me jorieko gimoro li.”

²¹ Pi mano, kur ngatamoro wakere pi dano, pien gi dedede obedo megu,

²² akadi Paulo arabo Apolo, amoto Kepa arabo piny kan, arabo kuo arabo to, arabo kare kanataman amoto kare me anyim, gin dedede megu,

²³ doko wuda ibedunu me ka Kirisito, kede Kirisito da obedo me ka Rubanga.