1 Jokorinti 16 - Baibuli I Leb Kumam 2013

Giamia me Konyo Jokacil

¹ Aso, i kom kop kame mako coko giamia me konyo jokacil, ipoorenu lubo gikame awaco ne ikodeta me jokirisito i Galatia.

² Buli Ceng Sabiti, poore ngat acelacel kibutu pok gimoro di eko kano, di lubere kede ud mere, tetekeny kame ango abino kur doko icokunu gimoro.

³ Kame ango atuno, abino cwano jo kame wun iyerunu Yerusalem kede baluwa, pi tero giamia wu.

⁴ Ka eneeno gikaber ne ango da pi ot kuno, gin kibino upere keda.

Gikame Paulo Oiko pi Timo

⁵ Abino welao wu ingei beno Makedonia, pien ango atie kede tam me beo ki Makedonia.

⁶ Abino bedo kede wu pi kare moro, cengemogo abino tieko kare me ngico me piny kede wu, tetekeny wun ikonyanu pi meede kede ot na kakame abino ot iye.

⁷ Pien ango likame amito beo neno wu malomalo; ageno be abino bedo kede wu pi kare moro, ka Rwot oyei.

⁸ Do ango abino bedo Epeso tuno i ceng me Pentekoti,

⁹ pien ekeko alac otieko yabere na me timo tic kitek, bed bala jo kame genge tie tot.

¹⁰ Ka Temeseo obino, nenunu be ebedo kede wu abongo lworo moro, pien eda etie timo tic ka Rwot bala ango da.

¹¹ Aso, kur ngatamoro cae. Konyenu emeede kede ot mere i mulem, tetekeny ekaruno dwogo buta; pien ango atie kure karacel kede imiegu kede amiegu.

¹² Aso, i kom kop kame mako omin wa Apolo, ango abedo ngangao en twatwal pi bino welao wu kede imiegu ace, do en oudo eli kede mit me bino nan. En ebino bino kame eudo winyo me bino.

Kope me Ajikini

¹³ Kiunu piny, cungunu kitek i yei wu, bedunu kede nwangcuny, bedunu kede yei atek.

¹⁴ Timunu gi dedede kede amara.

¹⁵ Imiegu kede amiegu na, wun ingeunu be jo me ot ka Sitepana en kame bin obedo jo me agege me lokere doko jokirisito i Akaya, doko kitieko keto cuny gi timo tic ne jokacil;

¹⁶ ango akwao wu pi winyo akodi jo nogo, kede ngatamoro ace da kame timo tic karacel kede gi.

¹⁷ Ango cunya yom pi bino ka Sitepana kede Potunata kede Akaiku, pien gin kicungo akaka wun;

¹⁸ pien gin kidwoko cunya karacel kede meru da. Pwounu akodi jo nogo.

¹⁹ Ikodeta me jokirisito i piny me Esia omoto wu. Akwila kede Purisika, karacel kede ekodet me jokirisito kame cokere i ot gi, moto wu twatwal i Rwot.

²⁰ Imiegu kede amiegu dedede omoto wu. Moterenu kede amot kacil me notere.

²¹ Ango, Paulo, awandiko butu amot noni kede cinga kikoma.

²² Ka ngatamoro likame maro Rwot, wek ilam make. Rwot wa, bia!

²³ Kisa ka Rwot Yesu bed kede wu.

²⁴ Amara na bed kede wun dedede i Kirisito Yesu. Amen.