1 Jokorinti 15 - Baibuli I Leb Kumam 2013

Iyarun ka Kirisito

¹ Imiegu kede amiegu na, nan ango amito yutuno ne wu ejiri kame ngoce atuco ne wu, kame ikounu gamo, doko en kame yei wu cungo iye.

² Ejiri nono en kame kelo ne wu alako ka imokunu iye kitek, kwanyo ka yei wu tie me nono.

³ Pien ango ako mino wu kop kame bin komio ada, bala gikame pire tek kalamo, en ine be; Kirisito oto pi dub wa di lubere kede iwandik kacil,

⁴ di oko yike, di oko yaruno en i ceng me adek di lubere kede iwandik kacil;

⁵ kede be, en eko nyutere but Kepa, kede i cen mere ne joor tomon kiwie are.

⁶ I kare ace en bobo eko nyutere but imiegu kede amiegu kame kalamo tol kany, jo atot kikom gi pwodi tie kuo, bed bala mogo otieko to.

⁷ Di do en eko nyutere but Yakobo, kede do ne joor dedede.

⁸ Me ajikini mere, en eko nyutere but ada, akadi di ango acal bala atin abwogini.

⁹ Pien kikom joor, ango en kalikame pira tek, oudo likame poore lwonga be ngaor, pien ango bin atidilo ekodet me jo koyei Rubanga.

¹⁰ Do pi kisa ka Rubanga, ango atie iekite kame nan atie iye noni, doko kisa mere buta likame oko bedo me nono. Pien ango atio kitek kalamo joor icegun dedede, bed bala likame ango en kame oudo atimo, do kisa ka Rubanga kame tie keda en kame oudo timo.

¹¹ Aso, akadi di ango arabo gin, man en kop kame wan dedede opwonyo, doko en kop kame wun iyeunu.

Iyarun me Jo Oto

¹² Aso, ka kotatamo be koyaruno Kirisito kikom jo oto, benyo benyo kame doko mogo kikom wu waco kede be iyarun me jo oto bino bedo li?

¹³ Ka iyarun me jo oto bino bedo li, dwong mere be likame koyaruno Kirisito da.

¹⁴ Aso, kalikame koyaruno Kirisito, dwong mere be kop kame wan opwonyo kony mere li, doko yei wu da kony mere li.

¹⁵ Doko da, mano nyuto be wan otie waco kop me abe i kom Rubanga, pien wan ojurao be Rubanga oyaruno Kirisito ngat kalikame en eyaruno, ka di ateteni likame kobino yaruno jo oto.

¹⁶ Pien ka yaruno jo oto likame tie, dwong mere be likame koyaruno Kirisito da.

¹⁷ Ka likame koyaruno Kirisito, dwong mere be yei wu kony mere li, doko pwodi itienu i dub wu.

¹⁸ Enyuto da be jo oto di kiyei Kirisito otieko rwenyo atwal.

¹⁹ Ka gen wa i kom Kirisito tie pi kuo me i kare ni kenekene, udo wan en kame do jo poore bedo kede kisa i kom wa twatwal kalamo jo apat.

²⁰ Do ateteni koyaruno Kirisito kikom jo oto, en ebedo bala anyakini me agege me jo oto.

²¹ Pien bala kame to obino kede di beo kibut dano, kamanono da iyarun me jo oto obino di beo kibut dano.

²² Pien bala kame jo dedede to kede pi Adamu, kamanono da kobino mino jo dedede bedo kuo pi Kirisito.

²³ Do ngat acelacel kobino yaruno en i kare mere kopoore: me agege Kirisito ngat kame tie bala anyakini me agege, di do oko bino yaruno jo kame obedo mege i kare me dwogo mere.

²⁴ Di do ajikini ko bino tuno, kame Kirisito bino mino kede Ajakanut i cing Rubanga Papa, ingei en bwono apugan kede akarunikin kede twer dedede.

²⁵ Pien miero epug tuno en nyono jokwor mege dedede i tiene.

²⁶ Ngakwor me ajikini kame en epoore tieko en to.

²⁷ Pien kowandiko be, “Rubanga oketo gi dedede i loc mere.” Do kop kame waco be, “koketo gi dedede i loc mere,” neeno kakaler be mane likame ribo kiton ngat kame keto gi dedede i loc mere.

²⁸ Kame kotieko keto gi dedede i loc ka Kirisito, di do Wod da ko bino bedo i loc ka Rubanga, ngat kame oketo gi dedede i loc mere, tetekeny Rubanga bed ngat kame tie gi dedede ne jo dedede.

²⁹ Aso, dwong kop nyo kame mio jo udo batisimu akaka jo oto? Ka likame kobino yaruno jo oto, pinyo kame mio kobatiso jo akaka gin?

³⁰ Pinyo kame mio wan ojalo kom wa i peko esawa dedede?

³¹ Imiegu kede amiegu na, pi ewaka kame ango atie kede piru i Kirisito Yesu Rwot wa, ango atuco be ango ariamo kede to ceng dedede.

³² Ka ango bin ayi kede leini ager i Epeso pi mit me dano adana, nyo aber kame audo kiye? Ka likame jo oto yaruno, otimunu bala kame jo waco kede be, “Wek ocamunu kede omatunu pien diki obinunu to.”

³³ Kur ngalu: “Jo aupa kame reco dubo ikiteso kame beco.”

³⁴ Miunu wi wu cei di ikounu jiko dubo, pien jo mogo kikom wu likame tie kede ngec i kom Rubanga. Lewic poore mako wu kame awaco kamanoni.

Kom kame Jo bino Yaruno kede

³⁵ Do ngatamoro bino penyo be, “Epone mene kame koyaruno kede jo oto? Kibino wok kede kom kame cal nadi?”

³⁶ Ngamingo ni! Kodi kame in ipito likame tui eko kuo kwanyo di ber egeo to.

³⁷ Doko gikame in ipito likame obedo kom giapita kame dongo, do ebedo nyige kenekene, cengemogo nyige me engano arabo kodi moro ace.

³⁸ Do Rubanga mie kome kame eyero ne; en emio kodi acelacel kome kame make.

³⁹ Pien likame ringokom dedede cacal, do jo tie kede ringokom me epone acel, leini da tie kede ace, winy da tie kede ace, kede deknam da tie kede me epone ace.

⁴⁰ Jame me malo tie kede kom kame mako gi, kede jame me lobo da tie kede kom kame mako gi; deyo me kom jame me malo pat kede deyo me kom jame me wi lobo.

⁴¹ Ceng tie kede deyo mere kene, duwe da tie kede deyo mere kene, kede acer da tie kede deyo gi ken gi; doko akadi acer ken gi da deyo gi papat.

⁴² Etie kamanono da kede iyarun me jo oto. Gikame koyiko top, do gikame koyaruno likame top.

⁴³ Koyike di erarac, do koyaruno en di etie kede deyo. Koyike di etie kede goro, do koyaruno en di etie kede twer.

⁴⁴ Koyike di etie ringokom, koyaruno en di etie tipo. Ka kom kame tie kede ringo tie, udo kom kame tie tipo da tie.

⁴⁵ En komio kowandiko be, “Adamu, dano me agege, odoko gikame kuo”; do Adamu me ajikini oko doko Tipo kame mio kuo.

⁴⁶ Do likame kom me tipo en kame geo, do kom kame tie kede ringo, di do kom me tipo ko lubo.

⁴⁷ Dano me agege owok ki lobo, otime kede apua; dano me are owok ki malo.

⁴⁸ Jo me lobo cal kede ngat kame kotimo kede apua; jo me i malo cal kede ngat kame owok ki malo.

⁴⁹ Bala kame wan ongapo kede cal me dano kame otimo kede apua, obinunu da ngapo cal me dano kowok ki malo.

⁵⁰ Imiegu kede amiegu na, gikame ango atie yamo ne wu en ine be, ringo kede remo likame karuno nywako Ajakanut ka Rubanga, doko da gikame top likame karuno doko gi kalikame top.

⁵¹ Winyunu gi me ateni komungere kame amito yamo ne wu. Wan likame obinunu to dedede, do kobino loko wa.

⁵² Kame agwara okok, kobino loko wa oyotoyot bala kame wang dano timo kede rwakak. Pien agwara bino kok, di oko bino yaruno jo oto kede kom kalikame top, di oko bino loko wanunu dedede.

⁵³ Pien kom kame top ni miero ngap kom kalikame top, kede kom kame to ni miero ngap kom kalikame to.

⁵⁴ Kame kom kame top noni ongapo kom kalikame top, kede kom kame to noni ongapo kom kalikame to, di do kop ko bino cobere kakare kame kowandiko be, “Kotieko lono to atwal.”

⁵⁵ “In to, loc ni tie tuai? In to, kwir ni tie tuai?”

⁵⁶ Kwir me to en dub, kede twer me dub en Iswil.

⁵⁷ Do opwounu Rubanga, ngat kame mio wa otwero lono pi Rwot wa Yesu Kirisito.

⁵⁸ Pi mano, imiegu kede amiegu na kame amaro, cungunu kitek abongo yangere, di imeedenu ameda nakanaka timo tic ka Rwot, bala kame ingeunu kede be, likame tie tic moro kame wun itimunu ne Rwot, kame kony mere li.