1 Jokorinti 12 - Baibuli I Leb Kumam 2013

Giamia me Tipo Kacil

¹ Imiegu kede amiegu na, ango nan amito be ingeunu kop kame mako giamia me Tipo Kacil.

² Wun ingeunu be, di bin itienu jo kalikame woro Rubanga, oudo kobitao wu di oko rwenyo wu i woro cal jwogi, gi kalikame yamo.

³ Pi mano, ango amito iniangunu be likame tie ngatamoro kame Tipo ka Rubanga telo di eko waco be, “Ilam mak Yesu!” Doko likame tie ngatamoro kame twero waco be “Yesu en Rwot” kwanyo di Tipo Kacil en kame otele.

⁴ Aso, giamia tie me epone apapat, do Tipo acel nono en kame mio gi;

⁵ doko da tice tie me epone apapat, do Rwot acel nono en kame kotio ne;

⁶ kede gikame jo timo tie papat, do Rubanga acel nono en kame mio teko but ngat acelacel me timo gi.

⁷ Rubanga nyuto tie me Tipo but dano acelacel pi bero me jo dedede.

⁸ Tipo acel nono mio ngat acel yamo kop me rieko, kede dano ace emio yamo kop me ngec.

⁹ Tipo nono mio but dano acel yei, kede but dano ace emio giamia me cango jo,

¹⁰ but dano ace emio twer me timo giaura, but dano ace emio giamia me imurai, but dano ace emio twer me popoko tipere, but dano ace emio twer me yamo i leb anyen, kede but dano ace emio twer me gonyo leb anyen.

¹¹ Magi dedede Tipo acel nono en kame timo, en kame epoko gi but ngat acelacel bala kame emito.

Kom Dano tie Acel do Adulion mege Tot

¹² Kirisito cal bala kom dano, en etie acel do adulion mege tot; gin dedede kitie kom acel bed bala kitot.

¹³ Pien i Tipo acel, wanunu dedede kobatiso wa okounu doko kom acel, Iyudayan arabo Jogurik, ipasoi arabo jo kogonyere, wanunu dedede Rubanga otieko keto Tipo acel nono i cuny wa.

¹⁴ Pien kom dano likame tie kede adul acel kenekene, do etie kede adulion atot.

¹⁵ Ka koto tien di oko waco be, “Pien ango likame atie cing, likame ango atie adul me kom,” mano likame genge bedo adul me kom.

¹⁶ Doko ka koto yit oko waco be, “Pien ango likame atie wang, omio likame ango atie adul me kom,” mano likame genge bedo adul me kom.

¹⁷ Ka koto kom dano lung oudo obedo wang, koto ewinyo kop kede nyo? Ka koto kom dano lung oudo obedo yit, koto engweo kede nyo?

¹⁸ Do bala kite kame etie kede, Rubanga oketo adulion apapat i kom dano, acelacel kikom gi bala kame eyero.

¹⁹ Ka koto gin dedede oudo kibedo adul acel kenekene, koto kom dano tie tuai?

²⁰ Bala kame etie kede, adulion tie tot, do kom acel.

²¹ Pi mano, wang likame twero waco ne cing be, “Ango likame amiti,” bobo wic da likame twero waco ne tien be, “ango likame amiti.”

²² Akaka manono, wan likame otwerunu bedo abongo adulion me kom kame neeno bala goro,

²³ doko adulion me kom kame wan oparo be likame poore awora, en kame wan oworo twatwal. Kede adulion kalikame beco me anena en kame wan ogwoko i yore amalo,

²⁴ gikame adulion me kom wa kame beco me anena likame mito. Do Rubanga otieko cweno kom dano iepone kame mio wor adwong but adulion kalikame pirgi tek.

²⁵ En etimo kaman tetekeny kur apokapoka bed i kom, do me wek adul acelacel gwok adulion icegun iepone kame rom aroma.

²⁶ Ka adul acel tie i can, adulion apat dedede neno can karacel kede en; ka komio adul acel wor, adulion apat dedede lelo kede en karacel.

²⁷ Aso, wun itienu kom Kirisito, doko ngat acelacel tie adul me kome.

²⁸ Rubanga otieko keto i ekodet me jokirisito, me agege joor, me are inabin, me adek jopwony; di do jo kame timo giaura, di do jo kame cango jotuwo, jo kame konyo jo, jotel tice, kede jo kame yamo i leb anyen.

²⁹ Benyo, iparunu be gin dedede kibedo joor, arabo inabin, arabo jopwony amoto jo kame timo tice me twer?

³⁰ Benyo, iparunu be gin dedede kitie kede giamia me cango jotuwo, arabo gin dedede kiyamo i leb anyen amoto kitie kede giamia me gonyo leb anyen?

³¹ Ketunu cunyu pi udo giamia kame pirgi tek. Nan ango amito nyuto ne wu yongayo kame ber kalamo.