1 Jokorinti 10 - Baibuli I Leb Kumam 2013

Ikwenyar i kom Cal jwogi

¹ Imiegu kede amiegu na, ango amito ingeunu be bin edou en kame ogwoko joakwari wa di gin dedede kiko ngolo nam adwong,

² di oko batiso gi pi doko jo kame lubo Musa, di kitie i nam kede i edou.

³ Gin dedede bin kiko camo cam acel me cuny;

⁴ gin dedede kiko mato giamata acel me cuny. Pien gin kimato pii kowok ki lela ka Rubanga, kame bin lubo gi; lela nono en bin Kirisito.

⁵ Bed bala kamanono, Rubanga bin cunye likame obedo yom kede jo atot kikom gi, omio en di eko sasaro liele gin i tim.

⁶ Aso, gi nogi otimere pi kwenyaro wa weko paro timo gikareco bala bin gin.

⁷ Kur ibedunu jo kame woro cal jwogi bala kame bin jo mogo kikom gi otimo kede; bala kame kowandiko be, “Jo obedo piny cam kede amata, di kiko yai malo miel.”

⁸ Wan miero kur odonyunu timo caro bala kame jo mogo bin otimo kikom gi, di jo tutumia ot are kiwie adek oko to i ceng acel.

⁹ Wan miero kur otamunu Rwot, bala kite kame mogo kikom gi riki otimo, di twole oko neko gi.

¹⁰ Doko kur ibedunu kede ingungur bala kame mogo kikom gi bin otimo, di Malaika kame Neko oko neko gi.

¹¹ Aso, gigi otimere ne gi pi kwenyaro wa, do oko wandiko gi pi pwonyo wa, wan jo kame otienu i kare me ajikini.

¹² Pi mano, ngat kame tamo be en ecungo di etek i yei mere, poore egwokere tetekeny kur epoti.

¹³ Likame tie atama moro kame in ibeo iye kame jo apat likame pwodi obeo iye. Rubanga genere, doko likame ebino jali i atama kame bwono teko ni. Do i kare me atama en ebino mini teko me kanyakino di iko udo yongayo me bwot.

¹⁴ Pi mano, jo na kame amaro, wekunu woro cal jwogi.

¹⁵ Ango ayamo kede wu bala jo kame wi gi tio; tamunu i kom gikame ango ayamo wun kenu.

¹⁶ Mam udo otienu nywako remo ka Kirisito ka omatunu ki ikopo kame wan olegunu iye winyo? Doko kame otienu tuturo mugati, mam udo otienu nywako kom Kirisito?

¹⁷ Kite kame mugati tie kede acel, bed bala wada ototunu, otienu kom acel, pien wan dedede onywakunu mugati acel nono.

¹⁸ Nenunu kong jo me Isirael; mam jo kame camo gikame koyalo ne Rubanga nywako i tic me alutari?

¹⁹ Nyo kame ango atie yamo? Iparunu be ango atie yamo be ringo kame koyalo ne cal jwogi obedo gimoro, arabo be cal jwogi obedo gimoro?

²⁰ Li, ango atie yamo be, gikame jo kame kwia Rubanga yalo, gin kiyalo ne jwogi, likame ne Rubanga. Ango likame amito be ibedunu jo kame nywako kede jwogi.

²¹ Likame itwerunu mato ki ikopo ka Rwot di bobo imatunu ki ikopo me jwogi da; likame itwerunu cam ki emesa ka Rwot di bobo icamunu ki emesa ka jwogi da.

²² Mam omitunu mino Rwot dok nganyeko? Iparunu be otekunu lone?

²³ “Iswil yei ne wa timo gi dedede,” do likame gi dedede konyo. “Iswil yei ne wa timo gi dedede,” do likame gi dedede dongo yei wa.

²⁴ Kur imoi bero pirin keni, do moi bero ne jo apat.

²⁵ Camunu ringo dedede kame kocato i atale abongo bedo kede peny mogo pi ngec me cunyu.

²⁶ Pien iwandik kacil waco be, “Lobo kede jame dedede kame tie iye, gin me ka Rwot.”

²⁷ Ka ngatamoro kalikame oyei Kirisito olwongi cam di iko ot, cam gimoroni dedede kame koketo i nyimi abongo bedo kede peny moro pi ngec me cunyi.

²⁸ Do ka ngatamoro owaco ni be, “Ringo noni obedo giayala but caljwogi,” do pi paro pi ngat kokwenyaro in kede pi ngec me cuny, kur icame,

²⁹ ango ayamo ngec me cuny en, likame meri. Pien pinyo kame mio ngec me cuny dano ace gengo twero nango me timo gimoro?

³⁰ Ka ango apwoyo Rubanga pi cam kame acamo, pinyo kame mio ngatamoro bedo kede acae buta pi cam kame ango atieko mino pwoc iye.

³¹ Aso, gi dedede kame itimo, akadi icami arabo imati, tim gin dedede pi mino Rubanga deyo.

³² Kur idub cuny Iyudayan, arabo Jogurik, arabo ekodet me jo koyei Rubanga,

³³ bala kite kame ango atamakino kede yomo cuny jo dedede i gi dedede kame ango atimo, di likame amo bero pira kena, do pi jo atot, be amotoko gida kiud alako.