1 Jokorinti 1 - Baibuli I Leb Kumam 2013

Amot

¹ Baluwa kowok kibut Paulo, ngat kame bin Rubanga olwongo i mit mere pi bedo ngaor ka Kirisito Yesu, kede kibut omin wa Sosetene.

² But jo koyei Rubanga i Korinti, jo kame kolonyo i Kirisito Yesu, gin jo kame Rubanga olwongo pi bedo jo mege kacil, karacel kede jo dedede i kabedo dedede kame lwongo nying Rwot Yesu Kirisito, en Rwot gi kede merwa da.

³ Kisa kede mulem kame yai kibut Rubanga Papa wa kede Rwot wa Yesu Kirisito bed kede wu.

Winyo kame tie i Kirisito

⁴ Ceng dedede ango apwoyo Rubanga piru, pi winyo kame en emio wu i Kirisito Yesu.

⁵ Pien i ribere wu kede Kirisito, omio wun do itiekunu baro i yore dedede, i yamo wu dedede, kede i ngec wu da dedede.

⁶ Pien kop i kom Kirisito do otieko donyo i diere wu di tek adikinicel.

⁷ Manoni omio likame tie giamia moro kame Tipo Kacil mio, kame nan wun ikeunu di pwodi ikurunu kare kame Rubanga bino nyuto kede Rwot wa Yesu Kirisito.

⁸ Yesu bino mino wu icungunu di itekunu i yei wu tuno i ajikini, tetekeny ibedunu abongo raco moro i ceng me dwogo mere.

⁹ Rubanga genere, en kame elwongo wu pi bedo i nywak kede Wode Yesu Kirisito, en Rwot wa.

Apokapoka i dier Ekodet me Jokirisito

¹⁰ Imiegu kede amiegu na, ango abako doga butu i nying Rwot wa Yesu Kirisito be, wun dedede bedunu kede winyere i kope wu, kede kur apokapoka bed i diere wu. Do riberenu i cuny acel kede i tam acel.

¹¹ Pien jo ka Koloe mogo otieko nianga be lok tie i diere wun imiegu kede amiegu na.

¹² Gikame ango atie yamo en ine be, ngat acelacel kibutu yamo be, “Ango dano ka Paulo,” mogo be, “Ango gira dano ka Apolo,” ace bobo be, “Ango dano ka Kepa,” kede apat be, “Ango dano ka Kirisito.”

¹³ Mam kotieko popoko Kirisito? Benyo, Paulo en kame bin koguro i kom musalaba piru? Arabo oudo kobatiso wu i nying Paulo?

¹⁴ Ango apwoyo Rubanga pien likame ango abatiso ngatamoro kikom wu, kwanyo Kirisipo kede Gayo.

¹⁵ Omio likame tie ngatamoro kame twero yamo be kobatiso en i nyinga.

¹⁶ (Ee, abatiso da bobo jo me ot ka Sitepana, do likame atwero yutuno ka bobo ako batiso ngatamoro ace.)

¹⁷ Pien Kirisito likame oora pi batiso jo, do pi tuco ejiri, do likame kede leb amit me rieko ka dano, tetekeny kur kop me to ka Kirisito i kom musalaba bed abongo twer mere.

Kirisito en Twer kede Rieko ka Rubanga

¹⁸ Pien kop me to ka Kirisito i kom musalaba tie gi me mingo but jo kame tie rwenyo, do ne wan jo kame kotie lako wa, etie twer ka Rubanga.

¹⁹ Pien Kowandiko be, “Abino dudubo rieko me jorieko, di ako totolo ngec me jo kame ngeo piny.”

²⁰ Nan do ngarieko tie tuai? Ani do kara ngapwony me Iswil? Ani ngat kame piemo kitek me kare noni? Mam Rubanga otieko mino rieko me piny odoko mingo?

²¹ Pien Rubanga i rieko mere, emio jo likame otwero ngene i rieko gi ken gi, do en eko lunyo lako jo kame yei en pi kop kame jo tero be me mingo, kame wan opwonyo.

²² Iyudayan mito gianena, kede Jogurik mo rieko.

²³ Do wan girwa opwonyo kop i kom Kirisito kame koguro, kop kame winyo rac ne Iyudayan, kede ne jo kalikame Iyudayan etie gi me mingo,

²⁴ do ne jo kame Rubanga olwongo, Iyudayan kede jo kalikame Iyudayan, kop noni en Kirisito, kame obedo twer kede rieko ka Rubanga.

²⁵ Pien gikame neeno bala mingo ka Rubanga en rieko kame kalamo me ka dano, doko gikame neeno bala goro ka Rubanga en teko kame kalamo me ka dano.

²⁶ Imiegu kede amiegu na, yutununu kong lwongo wu; iekite kame jo neno kede, jo atot kibutu oudo likame riek, doko jo atot kibutu oudo likame obedo wegi twer, doko jo atot oudo da likame yai ki miere kame koworo.

²⁷ Do Rubanga oko yero gikame jo neno bala gi me mingo i piny pi mino lewic mako jorieko, bobo eyero gikame jo neno bala gikame goro pi mino lewic mako jo kame tek.

²⁸ Rubanga oyero gikame jo cao, gikame kony gi li, pi dudubo gikame jo tero bala pirgi tek,

²⁹ tetekeny ngatamoro kur wakere i nyim Rubanga.

³⁰ Rubanga en kame mio wu kuo i Kirisito Yesu, ngat kame en emio odoko ne wa rieko kame wok kibut Rubanga. En kame emio wa odoko jo kopoore, kolonyere, kede kame kotieko lako.

³¹ Pi mano, kowandiko be, “Ngat kame wakere, wek ewakere pi Rwot.”