1 Iyutun 5 - Baibuli I Leb Kumam 2013

Ikwae ka Ruben

¹ Magi en nying ikwae ka Ruben, awobi kao ka Yakobo. (Pi kite kame bin en ebuto kede dako acel kikom mon kame papa mere oudo bedo kede gi abongo nyomo, en bin eko kei twero mere me atin awobi kao, di bin oko mino twero nono but Yosepu,

² bed bala jo me ekeko ka Yuda en oko doko tek kalamo, doko da ngatel me jo me ikekon dedede oko wok kibut gin.)

³ Ruben awobi kao ka Yakobo bin tie kede awobe ongwon: Kanok, Palu, Keseroni, kede Karami.

⁴ Ikwae ka Yoweri bin gin en: Semaya, Gog, Simei,

⁵ Mikaa, Reaya, Baal,

⁶ kede Beera, ngat kame Tigilat Pileser abaka me Asiria bin omako di eko tere obukui bala mabus; en oudo ebedo ngatel me jo me ekeko nono.

⁷ Magi en oudo obedo jotel me ude me jo me ekeko ka Ruben: Yeyel, Sakaria,

⁸ Bela wot ka Asas, wot ka Sema, wot ka Yoweri. Jo nogi bin bedo Aroer dok i bad tetu malo tuno Nebo kede Baal Meon.

⁹ Oudo kitie kede doke atot i lobo me Gilead, omio kiko donyo bedo i lobo adok i bad tetu kide tuno i wi tim kopetere paka i ecilet me Eupurate.

¹⁰ I kare ka Abaka Saulo, jo me ekeko ka Ruben bin oko yi kede jo Kagiri, gin kiko neko gi di kiko donyo bedo i lobo gi i bad tetu kide me Gilead.

Ikwae ka Gad

¹¹ Jo me ekeko ka Gad bin oko bedo i bad tetu malo me kakame jo ka Ruben oudo tie iye, i lobo me Basan ape paka tuno Saleka.

¹² Yoweri en kame oudo obedo adwong kame telo ot kame bin lo ude dedede i Basan, di Sapam en koudo telo ot kame bin lubo, di Yanai kede Sapat.

¹³ Jo ace me ekeko nono oudo obedo jo me ude ka jogi: Emikairi, Mesulam, Seba, Yorai, Yakan, Sia, kede Eber.

¹⁴ Gin oudo kibedo ikwae ka Abikail wot ka Kuri, wot ka Yaroa, wot ka Gilead, wot ka Emikairi, wot ka Yesisai, wot ka Yado, wot ka Bus.

¹⁵ Aki wot ka Abidiel, akwar Guni en koudo telo jo me ude nogi.

¹⁶ Gin oudo kibedo i adulion me Basan kede Gilead, i bomban kame tie kugonogo, kede i ebar dedede me kwat atie Saron.

¹⁷ (Wapere me nying joakwari nogi oudo kowandiko i kare ka Abaka Yotam me Yuda kede Abaka Yeroboam me are me Isirael.)

Isirikalen me Jo me Ikekon atie I bad tetu Kide

¹⁸ Jo me ikekon ka Ruben, Gad, kede jo me ekeko ka Manase atie i bad tetu kide oudo tie kede isirikalen atek yi tutumia ot ongwon kiwie ongwon kede tol kanyaare ki ot kanyape (44,760), oudo kopwonyo gi kiber i yi me ibukui, ipimai kede imalia.

¹⁹ Gin bin kiko ot yi kede jo Kagerim me ikekon ka Yetur, Napis, kede Nodab.

²⁰ Gin kiko keto gen gi i kom Rubanga di kiko lego bute pi konyo gi, di Rubanga oko dwoko ilega gi di eko mino gi kibwono jo Kagerim kede jo akonyo gi.

²¹ Kiko mano kibut jokwor aguraguran tutumia ot kany (50,000), romini tutumia tol are kede ot kany (250,000), pundan tutumia are (2,000), kede kiko mako isirikalen tutumia tol acel (100,000) kitero bala mabus me yi.

²² Kineko jokwor atot pien yi nono oudo obedo me ka Rubanga. Gin kiko dong bedo i adul nono tuno i kare kame komako gi kede oko tero gi obukui bala mabus.

Jo me Ekeko ka Manase atie i bad tetu Kide

²³ Jo me ekeko ka Manase me bad tetu kide bin oko donyo bedo i adul me Basan dok i bad tetu malo paka tuno Baal Kerimon, Senir, kede i moru me Kerimon; gin bin kiko nyai twatwal.

²⁴ Jotel me ude gi bin gin ige: Eper, Isi, Eliel, Asiriel, Yeremia, Kodabia, kede Yadiel. Gin dedede oudo kibedo jo atek yi kede jotel angere me ude gi.

Komako Jo me Ikekon atie tetu Kide oko Tero gi Obukui

²⁵ Do jo likame oko bedo jo agenere but Rubanga ka joakwari gi, di do gin kiko donyo woro rubangan me atekerin kame Rubanga oudo oriamo ki lobo nono.

²⁶ Aso, Rubanga oko mino Abaka Pul me Asiria (kolwonge da be Tigilat Pileser) osuro lobo gi. En eko mamako di eko tero jo me ikekon ka Ruben, Gad, kede dul me jo me ekeko ka Manase atie tetu kide, di eko tero gi bedo Kala, Kabor, Kara, kede i dog ecilet me Gosan tuno tin.