1 Iyutun 29 - Baibuli I Leb Kumam 2013

Giamia me Gero Tempulo

¹ Abaka Daudi oko waco ne ekodet lung kocokere be, “Woda Sulumani ngat kame Rubanga otieko yero, pwodi titidi doko pwodi likame engeo jamini atot. Aso di tic kame miero en etim dwong twatwal; pien tempulo noni en likame ebino gero pi jo do pi Rwot Rubanga.

² Ango atieko timo teko di ako iiko jamini me gero ot ka Rubanga na. Atieko iiko saabu, siliba, buronsi, ayon, ibaon, kide me wel, kide ace atitino me amwona i kom saabu, kede kide ace me wel me erangi apapat kede kidi mabol atot adikinicel.

³ Medo i kom jamini nogo kame ango atieko coko me gedo, ango atieko mino da siliba kede saabu na amaka. Ango atimo manoni pi kite kame cunya tie kede i kom ot ka Rubanga.

⁴ Ango atieko mino saabu kame kojililo kiber kame kalamo kilo tutumia tol acel (100,000), kede siliba kame kojililo kiber kame buco romo kilo tutumia tol are kede ot ongwon (240,000), pi tubuso kede apama me tempulo

⁵ kede me timo jamini dedede kame jo katie kede diru i tic me cing bino timo. Aso, ngai da kame ceng atin mito mino giamia but Rwot, di emio kede cunye lung?”

⁶ Di do jotel me diakale, jotel me ikekon, jotel me isirikalen, kede jotel me tic ka abaka oko mino jamini bala kame cuny gi owinyo.

⁷ Gin kimio jamini kame lubo nogi pi gero ot ka Rubanga: saabu kame kalamo kilo tutumia tol acel kede ot kanyaare (170,000), siliba kame kalamo kilo tutumia tol adek kede ot ongwon (340,000), nyonyo buronsi kame romo kilo tutumia tol kanyape kede ot are (620,000), kede nyonyo ayon kame kalamo kilo milion adek kede tutumia tol ongwon (3,400,000).

⁸ Jo kame bin tie kede kide me wel oko mino gi but kabedo kame bin kokano iye lim me ot ka Rwot, i cing Yekiel akwar Gereson.

⁹ Jo oko kilel pien gin oudo kimio jamini gi abongo adiadia moro; oudo kimio jamini gi but Rwot bala kame cuny gi owinyo, doko kede cuny gi lung. Abaka Daudi da oko lelo twatwal.

Daudi Opako Rubanga

¹⁰ Di do Daudi oko pako Rwot i nyim ekodet lung kame oudo ocokere. En ewaco be, “Pak bed buti nakanaka, Okwe Rwot, Rubanga ka kwaru wa Isirael.

¹¹ Dwongo, twer, deyo, bwono yi, kede wor obedo meri; pien jamini dedede kame tie i malo kede i wi lobo obedo megi, doko in en abaka kame i lo jamini dedede.

¹² Abar kede wor wok ki buti, doko in ipugo jamini dedede. Twer kede teko tie i cingi, doko in en imio dwongo kede teko but jo dedede.

¹³ Aso, Rubanga wa, nataman wan omi pwoc di opako nyingi me deyo.

¹⁴ “Do ango en ngai, doko jo na da obedo alu kibuti, en komio wan otwero mini giamia nogi bala kame cuny wa mito? Pien jamini dedede wok kibuti, doko wan omi jamini kame obedo megi cuto.

¹⁵ Okwe Rwot in ingeo be i nyimi, wan ocal bala jokumbor kede jo kame beo abea i kuo noni, bala bin joakwari wa dedede; kare me kuo wa i wi lobo cal bala tipo kame rwenyo oyotoyot, gen me bedo nakanaka likame tie.

¹⁶ Okwe Rwot Rubanga wa, twon jamini magi dedede kame wan okelo me gero ni ot me woro nyingi kacil owok ki buti, doko gin dedede megi.

¹⁷ Ango angeo, Okwe Rubanga na, be in ingeo cuny jo dedede, doko in cunyi yom pi jo kame ekite gi opoore. Ango pi mit me cunya atieko mini jamini nogi dedede kede cuny me ateni, doko nataman atieko neno di jo ni kame tie kan, mio jamini gi buti kede kilel abongo gung moro.

¹⁸ Okwe Rwot, Rubanga ka joakwari wa Aburaam, Isaka, kede Yakobo, mi jo ni bed kede akodi cuny kede tam noni nakanaka, doko mi cuny gi bed buti.

¹⁹ Mi woda Sulumani bed kede mit me lubo cik kede iswilia ni kede cunye lung, kede eko gero tempulo noni kame ango atieko timo iik mere.”

²⁰ Di do Daudi oko waco ne ekodet lung kocokere be, “Pakunu Rwot Rubanga wu!” Di ekodet lung kocokere oko donyo pako Rwot Rubanga ka joakwari gi, di kiko riebere piny i nyim Rwot kede i nyim abaka da.

²¹ I ceng alubo mere gin kiko mino giayala angola kede giayala awanga but Rwot. Gin kimio but Rwot giayala me twonin tutumia acel (1,000), imerekekin tutumia acel (1,000), idwe romini tutumia acel (1,000), kede giayala amata kame upere kede gi, kede giayala apat atot atota pir jo Isirael.

²² Cenge nono gin kiko cam kede amata i nyim Rwot kede ilel adwong. Gin kiko keto Sulumani wot ka Daudi tien me are pi bedo abaka. Gin kiwire bala ngapug gi i nying Rwot di kiko wiro Sadoki bala ngasaseredoti.

²³ Aso, Sulumani oko bedo i kom me ajakanut kame Rwot oudo ocibo, di eko lunyo wang papa mere Daudi bala abaka. En eko timo tic kiber di jo Isirael dedede oko donyo lubo kop mere.

²⁴ Jotel dedede kede jo atek i yi, karacel kede awobe ka Abaka Daudi dedede, oko cikere pi mino wor but Abaka Sulumani.

²⁵ Rwot oko mino Sulumani dwongo i nyim jo Isirael dedede, di eko mine dwongo me ajakanut kame kalamo me abakai lung kogeo pugo Isirael.

Wie Wie me Apugan ka Daudi

²⁶ Daudi wot ka Yese bin opugo Isirael lung

²⁷ pi mwakini ot ongwon. En epugo ki bomba me Keburon pi mwakini kanyaare kede ki Yerusalem pi mwakini ot adek kiwie adek.

²⁸ Daudi oudo obaro doko jo oudo mie wor twatwal. En bin eko to di etieko ti kiber, di wode Sulumani en oko lunyo wange bala abaka.

²⁹ Jamini kame Abaka Daudi bin otimo, cako ki me agege tuno kede i me ajikini, tie i kop kame inabin, Samuel, Nasan, kede Gad owandiko.

³⁰ Kope kame kowandiko nogo nyuto kite kame en bin epugo kede, teko mere, kede gi dedede kame bin oko timere i kome, i kom jo Isirael kede ajakanuto kame bin oluko gi.