1 Iyutun 28 - Baibuli I Leb Kumam 2013

Cik kame Daudi Omio pi Tempulo

¹ Daudi bin oko mino cik but jotic dedede me Isirael pi gin cokere Yerusalem. Aso, jotic me ikekon dedede, jodongo me ikodeta dedede kame bin timo tic ka abaka, jotel me isirikalen tutumia tutumia, jotel me isirikalen toli toli, jogwok jamini kede doke ka abaka kede awobe mege, karacel kede jotic me paco ka abaka, jo yi atek mege, kede jo yi dedede, oko cokere Yerusalem.

² Abaka Daudi bin oko yai malo, eko cungo di eko waco be, “Winyunu, wun imiegu na kede jo na. Ango oudo abedo kede tam me gero ne Sanduku me Isikan ka Rwot kabedo kame Rwot Rubanga wa teno tiene iye. Ango oudo atieko timo iik me gero ot nono.

³ Do Rubanga oko waco na be, ‘In likame ibino gero nango ot, pien in ibedo ngayi doko itieko onyo remo me jo atot.’

⁴ Aso di Rwot Rubanga me Isirael otieko yera kikom jo me ot ka kwaru na pi bedo abaka me Isirael nakanaka. En eyero ekeko ka Yuda pi bedo ekeko kame jotel yai kiye, di ki ekeko ka Yuda, en eko yero ot ka papa na. Kikom awobe ka papa na, en cunye oko bedo yom pi keta bedo abaka me Isirael lung.

⁵ En emia awobe atot, di kikom gi en eko yero Sulumani pi bedo i kom me ajakanut mere me Isirael, pi pugo jo Isirael.

⁶ “Rwot owaco na be, ‘Wodi Sulumani en kame bino gero oda kede diakal mere, pien ango atieko yere pi bedo bala woda, di ango ako bino bedo papa mere.

⁷ Ango abino mino ajakanut mere bedo nakanaka ka en emeede keto cunye gwoko iswilia kede cik na bala kame nataman etie timo.’

⁸ “Pi mano, wun jo na, ango nataman aciko wu i nyim Rubanga wa kede i nyim ekodet me jo Isirael kocokere lung, gin jo ka Rubanga, pi keto cuny wu lubo gi dedede kame Rwot Rubanga wa ociko ne wa, tetekeny imeedenu bedo wegi lobo aber noni di ikounu weke ne idwe wu kame bino lunyo cen ngei wu, pi bedo mergi nakanaka.”

⁹ “Aso in woda Sulumani, poore in ingei Rubanga ka papa ni, di iko timo ne tic kede cunyi lung kede tam aber. Pien Rwot ngeo tam me jo dedede doko engeo iik gi kede par gi dedede. Ka in imoe, ibino ude; do ka in ilokere tenge ki bute, en ebino jali atwal.

¹⁰ In poore ingei be Rwot otieko yeri pi gero tempulo mere kacil. Poore in ibed tek di iko timo tic nono.”

¹¹ Di do Daudi oko mino Sulumani iik dedede kame oudo kotieko timo amako gedo me tempulo, kiton agolai me kano jamini kede agolai me malo, kede Kabedo Kacil Kalamo kame kom me kisa tie iye.

¹² En eko da mino Sulumani iik dedede kame en oudo etie kede i tam mere pi diakal ka Rwot kede agolai koluke, kede pi agolai me kano lim me tempulo kede jamini kame komio but Rwot.

¹³ Daudi bin oko mine da iik amako epone me poko tic ne josaseredoti kede Jolebi, en emie kite kame gin miero kitim kede tic me tempulo, kede kite me gwoko jamini kame kitio kede i tempulo.

¹⁴ En enyuto ne rom me siliba kede saabu kame miero kocwei kede jamini dedede me tic i tempulo;

¹⁵ enyuto ne rom me saabu me timo etala acelacel kede gicibe,

¹⁶ enyuto ne rom me siliba me timo imesai, kede rom me saabu me timo emesa acelacel me cibo mugati kame koyalo but Rwot.

¹⁷ En enyuto ne da rom me saabu kame kojililo kiber kame miero koti kede me timo ilumai, kalayan, kede ikopon, kede rom me siliba kede saabu kame miero kotim kede bakuli acelacel;

¹⁸ kede rom me saabu kame kojililo kiber kame miero kotim kede alutari me wango odok angwe kur, kede me timo cabala ne cerubim koyararo bwom gi i wi Sanduku me Isikan ka Rwot.

¹⁹ Abaka Daudi oko waco be, “Magonogi dedede tie i iik kame kowandiko di lubere kede cik ka Rwot kame en emia pi timo.”

²⁰ Abaka Daudi oko waco ne wode Sulumani be, “Bed tek, doko bed kede nwangcuny di iko timo tic. Kur ibed kede lworo, doko kur cunyi poti; pien Rwot Rubanga na tie kedi. En likame ebino jali arabo weki, do ebino bedo kedi tuno in tieko tice dedede me tempulo mere.

²¹ Kotieko popoko ne josaseredoti kede Jolebi tice dedede kame gin kibino timo i ot ka Rwot. Jo kame tie kede diru me timo tice me epone dedede bino mire gin ken gi pi konyi; bobo da jotel karacel kede jo dedede bino timo gikame in iwaco negi.”