1 Iyutun 27 - Baibuli I Leb Kumam 2013

Isirikalen kede Jopiny

¹ Buli duwe acelacel ekodet me jo tutumia ot are kiwie ongwon (24,000) oudo bedo i wang tic bala Isirikalen me Isirael. Jo nogi oudo ribo jotel me diakale, jotel me isirikalen kede jotic ka abaka.

^2-15 Magi en nying jo kame oudo telo gi duwe acelacel: Duwe me agege: Yasobeam wot ka Sabidiel, dano me ot ka Peresi Duwe me are: Dodai akwar Akoki; Mikilot en kame bin lubo tiene Duwe me adek: Benaya wot ka Yekoyada ngasaseredoti; en kame bin ebedo ngatel me “Jo Ot Adek” (wode Amisabad en kame bin oko lunyo wange bala ngatel me isirikalen me ekodet noni) Duwe me ongwon: Asakel omin me Joab (wode Sebadia en kame bin oko lunyo wange) Duwe me kany: Samukut, akwar Isikar Duwe me kanyape: Ira wot ka Ikes dano me Tekoa Duwe me kanyaare: Keles dano me ekeko ka Epuraimu, en bin eyai ki adul me Pelon Duwe me kanyauni: Sibekai dano me Kusa (en oudo ebedo dano me ekeko ka Seera, me ateker ka Yuda) Duwe me kanyangon: Abieser dano me Anatot kame tie i adul me jo me ekeko ka Benjamin Duwe me tomon: Makarai dano me Netopa (en oudo ebedo dano me ekeko ka Sera) Duwe me tomon kiwie acel: Benaya dano me Piraton kame tie i adul me jo me ekeko ka Epuraimu Duwe me tomon kiwie are: Keledai dano me Netopa (en oudo akwar Otiniel).

Pugo Jo me Ikekon me Isirael

^16-22 Magi en nying jopug me ikekon me Isirael: Ki ekeko ka Ruben: Elieser wot ka Sikiri Ki ekeko ka Simeon: Sepatia wot ka Maka Ki ekeko ka Lebi: Kasabia wot ka Kemuel Ki ekeko ka Aaron: Sadoki Ki ekeko ka Yuda: Eliku, ngat acel kikom imiegu ka Abaka Daudi Ki ekeko ka Isakar: Omiri wot ka Emikairi Ki ekeko ka Sebulun: Isamaya wot ka Obadia Ki ekeko ka Naputali: Yeremot wot ka Asiriel Ki ekeko ka Epuraimu: Kosea wot ka Asasia Ki ekeko ka Manase me bad tetu tim: Yoweri wot ka Pedaya Ki ekeko ka Manase me bad tetu kide: Ido wot ka Sakaria Ki ekeko ka Benjamin: Yasiel wot ka Abuneri Ki ekeko ka Dan: Asarel wot ka Yerokam.

²³ Abaka Daudi bin likame oko maro wel me jo kame mwakini gi me dongo oudo tie piny me mwaka ot are, pien Rwot oudo ocikere pi mino jo Isirael nyai di kiko doko tot bala acerin kame tie malo i edou.

²⁴ Joab wot ka Seruya bin oko cako maro wel me jo, do likame eko tieko, pien Rubanga oko mino jo Isirael alola pi maro wel me jo noni. Manono bin omio likame oko wandiko wel me jo kame oudo komaro i itabu me itatam kamako Abaka Daudi.

Jo kame Lo Kop amako Jamini ka Abaka

²⁵ Magi en nying jo kame bin lo jamini ka abaka: Asimabet wot ka Adiel en kame bin lo agolai kame kokano iye lim ka abaka. Jonasan wot ka Usia en kame bin lo agolai apat me ka abaka, kame bin kokano iye lim i bomban dedede, i calere kede i kabedere kame kocelo kede apama atek i Isirael.

²⁶ Esiri wot ka Kelub en kame bin lo jopur ka abaka.

²⁷ Simei dano me Rama en kame bin lo poti me olok ka abaka. Sabadi dano me Sepam en kame bin lo kop amako olok me timo bwini.

²⁸ Baal Anan dano me Geder en kame bin lo kop amako yen me olibeti kede cukamori kame bin tie i dud mori. Yowasi en kame bin lo agolai me kano mo.

²⁹ Sitarai dano me Saron en kame bin lo kop amako doke kame kokwao i ebar me Saron. Sapat wot ka Adelai en kame bin lo kop amako doke kame kokwao i aditot.

³⁰ Obil dano ka Isimael en kame bin lo kop amako aguraguran. Yekedeya dano me Meronot en kame bin lo kop amako pundan. Yasisi dano Ngakagar en kame oudo lo kop amako romini kede diegi.

³¹ Jo nogi dedede en kame bin gwoko jamini ka Abaka Daudi.

Jo kame Mio Daudi Tam

³² Jonasan, neru me Daudi, oudo obedo ngat kame tie kede diru i mino tam, doko oudo esomo twatwal. En kede Yekiel wot ka Kakimoni en kame bin kilo kop amako isoma me awobe ka abaka.

³³ Akitopel en bin ngamino tam but abaka, kede Kusai Ngaraki en oudo obedo adieru me abaka.

³⁴ Ingei to ka Akitopel, Abiata kede Yekoyada wot ka Benaya en oko doko jo mi tam. Joab en kame bin obedo ngatel me isirikalen ka abaka.