1 Iyutun 24 - Baibuli I Leb Kumam 2013

Tic kame Kopoko ne Josaseredoti

¹ Magonogi en ikodeta me ikwae ka Aaron. Aaron bin tie kede awobe ongwon, gin en Nadab, Abiku, Eleasar, kede Itamar.

² Nadab kede Abiku en kame bin oko to sek di pwodi papa gi kuo, abongo weko idwe. Manono en omio imiegu gi Eleasar kede Itamar oko doko josaseredoti.

³ Abaka Daudi bin oko keto ikwae ka Aaron i ikodeta di lubere kede tice kame kopoko negi. Sadoki akwar Eleasar, kede Akimelek akwar Itamar en kame bin okonye timo manoni.

⁴ Ikwae ka Eleasar bin koketo i ikodeta tomon kiwie kanyape, do ikwae ka Itamar koketo i ikodeta kanyauni; kotimo manoni pien cuo kame oudo obedo jotel me diakale tot i kom ikwae ka Eleasar kalamo me ka Itamar.

⁵ Do pien jodongo me tempulo kede jotel me tic ka Rubanga oudo tie i kom ikwae ka Eleasar kede da i kom ikwae ka Itamar, omio oko donyo poko negi tic kede uco alulu.

⁶ Semaya wot ka Netanel, kalani me Jolebi, en kame oudo wandiko nying jo. En oudo ewandiko nying jo di jo nogi tie: abaka kede jodongo me tic mere, ngasaseredoti Sadoki, Akimelek wot ka Abiata, kede jotel me diakale me josaseredoti kede me Jolebi. Ikwae ka Eleasar kede me ka Itamar oudo kwanyo alulu di kilere alea; oudo koyero ot acel kikom me ka Eleasa di oko yero ot acel da kikom me ka Itamar.

⁷ Alulu bin oko mako ikodeta me diakale ot are kiwie ongwon nogi kaman: alulu me agege omako Yekoyarib, me are omako Yedaya,

⁸ me adek omako Karim, me ongwon omako Seorim,

⁹ me kany omako Malikija, me kanyape omako Mijamin,

¹⁰ me kanyaare omako Kakos, me kanyauni omako Abija,

¹¹ me kanyangon omako Yesua, me tomon omako Sekania,

¹² me tomon kiwie acel omako Eliasib, me tomon kiwie are omako Yakim,

¹³ me tomon kiwie adek omako Kupa, me tomon kiwie ongwon omako Yesebeab,

¹⁴ me tomon kiwie kany omako Biliga, me tomon kiwie kanyape omako Imer,

¹⁵ me tomon kiwie kanyaare omako Kesir, me tomon kiwie kanyauni omako Kapises,

¹⁶ me tomon kiwie kanyangon omako Petakia, me ot are omako Yekesekel,

¹⁷ me ot are kiwie acel omako Yakin, me ot are kiwie are omako Gamul,

¹⁸ me ot are kiwie adek omako Delaya, di me ot are kiwie ongwon oko mako Masia.

¹⁹ Cuo nogi bin oko poko negi tice gi i tempulo di lubere kede cik kame bin Rwot Rubanga me Isirael omio kwaru gi Aaron.

Nying Jolebi

²⁰ Magonogi en nying jotel me diakale ace me Jolebi: Kikom ikwae ka Amuram, ngatel en oudo Subael; kikom ikwae ka Sebuel, ngatel en oudo Yekedeya.

²¹ Kibut ikwae ka Rekabia, ngatel en oudo Isia.

²² Kibut ikwae ka Isikar, ngatel en oudo Selomit; kibut ikwae ka Selomit, ngatel en oudo Yakat.

²³ Kibut ikwae ka Keburon, Yeria en oudo ngatel, di Amaria lube, di Yekasiel, kede Yekameam.

²⁴ Kibut ikwae ka Usiel, ngatel en oudo Mikaa; kibut ikwae ka Mikaa, ngatel en oudo Samir.

²⁵ Omin me Mika oudo en Isia; kibut ikwae ka Isia, ngatel oudo en Sakaria.

²⁶ Kibut ikwae ka Merari, jotel oudo gin en Makali kede Musi; kibut ikwae ka Yasia, ngatel oudo en Beno.

²⁷ Kibut ikwae ka Merari kowok kibut Yasia, jotel oudo gin en Beno, Sokam, Sakur, kede Ibiri.

²⁸ Kibut ikwae ka Makali, ngatel oudo en Eleasar, bed bala en oudo eli kede wode moro.

²⁹ Kibut ikwae ka Kis, ngatel oudo en Yeramel.

³⁰ Kibut ikwae ka Musi, jotel oudo gin en Makali, Eder, kede Yeremot. Magonogi gin en diakale me Jolebi.

³¹ Gida bin kopopoko negi tice kede uco alulu bala kame oudo kotimo kede ne ikwae ka Aaron, i nyim Abaka Daudi, Sadoki, Akimelek, kede jotel me diakale me josaseredoti kede me Jolebi, abongo apokapoka moro.