1 Iyutun 23 - Baibuli I Leb Kumam 2013

¹ I kare kame Daudi oudo otieko do ti kede twatwal, en eko mino wode Sulumani odoko abaka me Isirael.

Tice me Jolebi

² Abaka Daudi oko coko karacel jotel dedede me Isirael kede josaseredoti kede Jolebi.

³ En eko mino komaro wel me Jolebi acuo cako ki mwaka ot adek me dongo ot kede malo. Wel gi koko udo tie tutumia ot adek kiwie kanyauni (38,000).

⁴ Abaka oko keto Jolebi tutumia ot are kiwie ongwon (24,000) pi timo tic me tempulo, Jolebi tutumia kanyape (6,000) pi bedo jodongo me tempulo kede jongolkop,

⁵ Jolebi tutumia ongwon (4,000) pi bedo jodar irutei, kede Jolebi tutumia ongwon (4,000) pi bedo jogoc me were me pako Rwot kede jamini me wer kame abaka oudo oiko pi tic nono.

⁶ Daudi oko popoko Jolebi i ikodeta adek, di lubere kede ikekon ka joakwari gi: Gereson, Kokat, kede Merari.

⁷ Gereson bin tie kede awobe are: Ladan kede Simei.

⁸ Ladan oudo tie kede awobe adek: Yekiel, Setam, kede Yoweri.

⁹ Gin dedede oudo kibedo jotel me ikekon kowok kibut Ladan. Simei bin en konywalo Selomot, Kasiel, kede Aran.

^10-11 Simei bin tie kede awobe ongwon ace: Yakat en oudo awobi adwong, Sina di lube, di do Yeus, kede Beria. Yeus kede Beria bin li kede awobe atot, omio oko maro gi bala jo me ekeko acel.

¹² Kokat oudo tie kede awobe ongwon: Amuram, Isikar, Keburon, kede Usiel.

¹³ Amuram, wode adwong en koudo obedo papa me Aaron kede Musa. Aaron kede ikwae mege bin oko poko kikom jo icegun pi gin bedo jo kame gwoko nakanaka jamini kacil, kede pi mino giayala i nyim Rwot, timo tic mere, kede lamo ne jo winyo i nyinge.

¹⁴ Do awobe ka Musa, dano ka Rubanga, bin oko ribo i kom Jolebi.

¹⁵ Musa oudo tie kede awobe are, gin en Geresom kede Elieser.

¹⁶ Ngatel me awobe ka Geresom bin en Sebuel.

¹⁷ Elieser bin tie kede awobi acel kenekene, en Rekabia, do Rekabia bin oko nywalo awobe atot atota.

¹⁸ Wot ka Kokat me are, Isikar, bin tie kede wode kame nyinge Selomit. En oudo ebedo ngatel me ekeko gi.

¹⁹ Wot ka Kokat me adek, Keburon, bin tie kede awobe ongwon: Yeria, Amaria, Yakasiel, kede Yekameam.

²⁰ Wot ka Kokat me ongwon, Usiel, bin tie kede awobe are, gin en Mikaa kede Isia.

²¹ Merari bin tie kede awobe are, gin en Makali kede Musi. Makali da oko nywalo awobe are, gin en Eleasar kede Kis.

²² Do Eleasar bin oko to abongo nywalo atin awobi moro, do en oudo enywalo anyira kenekene. Anyira mege nogo oko bin nyomere kede joawade gi, awobe ka Kis.

²³ Wot ka Merari me are, Musi, bin oko nywalo awobe adek, gin en Makali, Eder, kede Yeremot.

²⁴ Jo nogi en kame bin obedo ikwae ka Lebi, di lubere kede ikekon gi kede diakale gi, di kowandiko ngat acelacel kede nyinge. Ikwae gi kame mwakini me dongo gi bin tie ot are kede ot malo oudo kopoko negi tic me tempulo.

²⁵ Daudi oko waco be, “Rwot Rubanga me Isirael otieko mino jo mege anapakin, doko eda kikome ebino donyo bedo Yerusalem nakanaka.

²⁶ Pi mano, likame bobo do Jolebi bino meede kede yeno Eema me riamo kede Rwot arabo jamini dedede kame kotio kede gi i eema nono.

²⁷ Di lubere kede yamo ka Daudi me ajikini, bin oko wandiko Jolebi dedede cako kibut jo me mwaka ot are ot kede malo,

²⁸ di oko mino gi konyo josaseredoti ikwae ka Aaron, timo tic me Tempulo, gwoko diakal mere kede agolai mege, kede neno be jamini kacil dedede likame komunao.

²⁹ Gin en kame oudo tic gi da mako mugati kame koyalo but Rubanga, mokalos kame komio bala giayala, mugati aperepere kame kotimo abongo arup, kede mugati kame kotedo me mino giayala, kede mokalos kame korubo kede mo me olibeti. Gin en kame da oudo tic gi me pimo giayala kame kotero i tempulo,

³⁰ kede me mino pwoc kede pak but Rwot buli odiko kede otieno.

³¹ Gin oudo da miero kimi pwoc kede pak but Rwot i kare dedede kame komio kede giayala awanga but Rwot, i ceng Sabato, i kare me Ibagai me Por Duwe, kede i kare me ibagai apat. I kare dedede Jolebi kame romo miero bed tie i wang tic i tempulo, pi timo tic ka Rwot bala kame mitere.

³² Aso, bin oko mino Jolebi tic me gwoko Eema me ariamakin kede Rwot, kede tempulo, kede konyo josaseredoti joawade gi ikwae ka Aaron timo tic amakere kede woro Rwot i tempulo.”