1 Iyutun 22 - Baibuli I Leb Kumam 2013

¹ Di Daudi oko waco be, “Tempulo ka Rwot bino bedo kanoni, doko alutari noni en kame jo Isirael bino mino iye giayala awanga.”

Iikere me Gero Tempulo

² Abaka Daudi oko mino cik me coko karacel jokumbor dedede kame oudo tie bedo i lobo me Isirael, di en eko mino gi tic. Jo ace kikom gi en emio gi tic me pano kide me gero tempulo.

³ Daudi oko da mino nyonyo ayon atot me timo sumalin kede ipatai me ikekon me irutei, kede eko mino twon nyonyo buronsi kalikame kokaruno pimo peko mere.

⁴ En eko mino da jo me Taya kede Sidon okelo ne ibaon me yen seda kame tot twatwal.

⁵ Pien Daudi oudo obedo kede tam kame waco be, “Woda Sulumani pwodi titidi doko pwodi likame engeo jamini atot, do di ot kame kobino gero ne Rwot miero bed ibus twatwal, di nyinge iruo i wi lobo lung. Pi mano, ango poore atim iik kame make.” Aso, Daudi oko iiko jamini atot twatwal kame mako gedo me ot nono, di pwodi likame eto.

⁶ En eko lwongo wode Sulumani di eko cike pi gero tempulo ne Rwot, Rubanga me Isirael.

⁷ Daudi owaco ne wode be, “Woda, ango oudo abedo kede iik me gero ot kame koworo iye Rwot Rubanga na.

⁸ Do Rwot oko waco na be ango oudo atieko neko jo atot doko abedo i yi atot twatwal. Pi mano, en likame eromo yei nango gero ne ot kame kobino wore iye, pien ango atieko onyo remo me jo atot i nyime.

⁹ En eko cikere buta be, ‘Neningo, in ibino nywalo atin awobi kame bino pug kede mulem, pien ango abino mine eudo anapakin kede jokwor mege dedede. Nyinge bino bedo Sulumani, pien i kare me apugan mere ango abino mino jo Isirael mulem kede anapakin.

¹⁰ En ebino gero nango tempulo, doko ebino bedo bala woda, di ada ako bino bedo bala papa mere. Jo me ode bino pugo Isirael nakanaka.’ ”

¹¹ Daudi oko meede di ewaco be, “Pi mano, in woda, ango akwao Rwot Rubanga ni ebed kedi, tetekeny in ikaruno gero ot ka Rubanga ni, bala kame en etieko waco.

¹² Doko akwae emii niang atut kede rieko, tetekeny in ipug Isirael di ilubo Iswil ka Rwot Rubanga ni.

¹³ Ka in ilubo iswilia dedede kame Rwot bin omio Musa pi mino jo Isirael, gi dedede bino bedo ni kiber. Bed di itek, doko bed kede nwangcuny. Kur ibed kede lworo moro arabo potocuny.

¹⁴ Ango atieko cane di ako coko jamini me gero ot ka Rwot. Atieko iiko saabu kame kalamo kilo milion adek kede tutumia tol ongwon (3,400,000), kede siliba kame kalamo kilo milion ot adek kiwie ongwon (34,000,000). Medo i kom magonogo, atieko iiko nyonyo buronsi kede ayon kalikame kokaruno pimo peko gi. Ibaon kede kide da tie cuto, do poore imed mogo.

¹⁵ In itie kede jotic atot twatwal. Itie kede jo apao kide, jo agero apama, jo kame timo tic me ibaon, kede jo atot atota kame timo tice me cing me epone apapat, jo kame tie kede diru me tic

¹⁶ kede saabu, siliba, buronsi, kede ayon. Aso, nataman cak do timo tic. Ango akwao Rwot ebed kedi.”

¹⁷ Daudi oko ciko jotel dedede me Isirael pi konyo Sulumani.

¹⁸ En ewaco be, “Rwot Rubanga wu obedo tie kede wu di eko mino wu anapakin i bad tetu dedede. Piento en emia abwono jo dedede kame oudo tie bedo i lobo noni. Gin nataman kitieko doko jo kame tie i apugan wun kede i apugan ka Rwot.

¹⁹ Aso, nataman ketunu tam wu kede cunyu i timo tic ka Rwot Rubanga wu. Cakunu gero kabedo mere kacil tetekeny kel iye Sanduku me Isikan mere kede jamini mege kacil kame kotio kede me wore.”