1 Iyutun 21 - Baibuli I Leb Kumam 2013

Daudi Omaro Wel me Jo

¹ Sitani bin oko mito kelo can i kom jo Isirael, di en eko supo Daudi be emar wel me jo Isirael.

² Aso, Daudi oko waco ne Joab kede jodongo apat me isirikalen kame oudo tie kede be, “Otunu imarunu wel me jo dedede me Isirael, cako ki Beereseba tuno Dan, di ikounu dwoko na kop, tetekeny ango abin angei wel me jo atie.”

³ Do Joab oko waco be, “Ango akwao Rwot emi wel me jo mege me Isirael meede tien tol acel kalamo rom gi nan. Adwong, gin dedede kibedo jotic ni. Pinyo komio in itie mito maro jo di iko mino ateker lung bedo kede raco me dub?”

⁴ Do abaka oko dino Joab timo gikame en emito. Aso Joab oko yai di eko ot maro wel me jo me Isirael dedede, di eko dok Yerusalem.

⁵ Joab oko ot waco ne Daudi wel me jo kame en emaro. I lobo me Isirael oudo tie iye cuo milion acel kede tutumia tol acel (1,100,000) kame twero yi, do i Yuda oudo tie iye cuo tutumia tol ongwon kede ot kanyaare (470,000) kame twero yi.

⁶ Do Joab bin likame oko maro wel me Jolebi kede jo me ekeko ka Benjamin, pien cunye oudo dagi cik kame abaka omie nono.

⁷ Do gikame oudo otimo nono likame oko yomo cuny Rubanga, omio en eko mino jo Isirael alola.

⁸ Daudi oko waco ne Rubanga be, “Ango atieko timo dub adwong twatwal pi timo gi noni! Do nan ango akwai, sasiro ango, pien atimo tim me mingo.”

⁹ Rwot oko waco ne Gad, en enabi ka Daudi be,

¹⁰ “Oti iwace Daudi be ango atie mine kope adek me ayera. En eyer kop acel di ango ako bino timo ne gi nono.”

¹¹ Gad oko ot but Daudi di oko waco ne gikame Rwot owaco; Gad oko waco ne be, “Yer kop acel kikom magi:

¹² Mwakini adek me kec, arabo dwete adek me ringo tenge kibut jokwor ni, amoto ceng adek me Rwot suri kede epima mere i yore me kelo aumpuli i lobo kame in ipugo, di etio kede malaika mere pi kelo to i lobo me Isirael. Nan in kong par kope go di iko mina kop kame abino dwoko ne ngat koora.”

¹³ Daudi oko waco ne Gad be, “Ango nan atie i lieto! Do likame amito be dano en kame mia alola, do poore Rwot en kame mia alola, piento en etie kede cuny me kisa.”

¹⁴ Aso Rwot oko cwano aumpuli i lobo me Isirael, di jo tutumia ot kanyaare (70,000) oko to.

¹⁵ Di Rubanga oko cwano malaika pi ot muducaro Yerusalem, do kakame malaika oudo mito cako timo kede nek i Yerusalem, Rwot oko loko tam mere i kom can kame oudo emito timo, di eko waco ne malaika me nek nono be, “Mano do romo; wek do.” Malaika oudo do tie cungo i nget laru me canyo ka Arauna Ngajebus.

¹⁶ Daudi oko ngoloro malo di eko neno malaika ka Rwot tie cungo malo i yamo, di emako epima i cinge, etieko iikere me timo nek Yerusalem. Di do Daudi kede jotel me jo, gin dedede di kingapo ipukoi, oko riebere piny.

¹⁷ Daudi oko lego be, “Okwe Rubanga, ango en kame adubo, pien ango en kame amio cik me maro jo; do jogo kame cal bala romini na kame ango akwao, nyo kame gin kitimo? Ango akwao in Rwot Rubanga na, be ango en kame ipoore mina alola kede jo me oda, do wek jo ni kur iket can i kom gi.”

¹⁸ Malaika ka Rwot oko ciko Gad pi waco ne Daudi be poore eot di eko gero ne Rwot alutari i diakal me canyo ka Arauna Ngajebus.

¹⁹ Daudi oko yei winyo dwan Rwot di eko ot timo bala kame Gad oudo owaco ne kede.

²⁰ Esawa nono Arauna kede awobe mege ongwon oudo tie canyo engano. Kakame gin kiko neno kede malaika, awobe oko ringo di kiko pwono, do Arauna oko gire meede kede canyo engano.

²¹ Kakame Arauna oneno kede Abaka Daudi di etie ot bute, en eko yai ki laru me canyo di eko ot riebere piny i nyime.

²² Daudi oko waco ne Arauna be, “Cat na laru ni me canyo, tetekeny ager iye alutari ne Rwot, tetekeny aumpuli jiki. Ango abino culi wel kame in ingolo dedede.”

²³ Arauna oko waco ne Daudi be, “Adwong na, in tere di iko timo gikame cunyi mito. Twonin da ige me giayala awanga, doko ikongio me canyo da ige me moko mac, kede engano me giayala me alos. Ango amio gin dedede buti.”

²⁴ Do abaka oko waco ne Arauna be, “Likame kamano, do ango abino wilo gi kibuti awila i wel kame in ingolo; ango likame abino mino but Rwot gikame obedo meri, akadi mino giayala awanga kalikame aculo iye gimoro.”

²⁵ Aso Daudi oko culo Arauna sente akaya tol kanyape (600) me saabu pi laru me canyo nono.

²⁶ Daudi oko gero ne Rwot alutari kuno, di eko mino giayala awanga kede giayala me nywak. En eko lego di Rwot oko gamo kwac mere di eko cwano mac wango giayala kame oudo tie i wi alutari.

²⁷ Rwot oko ciko malaika pi dwoko epima mere i ekularu mere, di malaika oko timo kamanono.

²⁸ Manoni oko mino Daudi ongeo be Rwot ogamo ilega mere, di en eko mino giayala angola i wi alutari atie i laru me canyo ka Arauna.

²⁹ Eema me ariamakin kede Rwot kame Musa bin otimo i wi tim, kede alutari kame oudo owango giayala angola i wie, i kare nono oudo pwodi tie Gibeon;

³⁰ do Daudi oudo likame karuno ot woro Rubanga kunono, pien oudo elworo epima ka malaika ka Rwot.