1 Iyutun 20 - Baibuli I Leb Kumam 2013

Daudi Omao Raba

¹ Ingei kare me ngico, en kare kame abakai maro ot kede i yi, Joab bin oko telo isirikalen di kiko ot suro piny me Amon. Do Abaka Daudi oudo odong Yerusalem. Gin kiko luko bomba me Raba, kiko sure, di kiko mane.

² Daudi oko kwanyo ocoro me ajakanut kame kotimo kede saabu ki wi Milikom, en rubanga me jo Amon; peko me ocoro nono oudo romo kilo ot adek kiwie ongwon, doko oudo kide me wel tie iye; en eko kwanyo kide me wel nogo di eko keto i ocoro mere me ajakanut. Daudi bobo da oko tero jamini atot twatwal kame koyako ki bomba nono.

³ Eko tero jo me bomba nono di eko mino gi tic kede musumeno, isululun kede lee, doko da kiko donyo timo tic me timo matapalin. En bin eko timo kamanono ne bomban dedede me jo Amon. Di do Daudi kede jo dedede oko dok Yerusalem.

Yi kede Itucio me Pilistia

⁴ I cen mere yi bobo oko poto i dierediere me jo me Pilistia kede jo me Isirael i Geser. Manoni bin otimere kakame Sibekai dano me Kusa oneko kede Sapai akwar me itucio me jo, di oko bwono jo Pilistia.

⁵ Yi ace bobo oko poto kede jo me Pilistia, di Elikanan wot ka Yair oko neko Lakami omin me Goliat dano me Gat. Tir me tong mere oudo dwong bala yat kame jo kudo me kuno ausin me egoe.

⁶ Yi ace bobo oko poto Gat, kame oudo tie iye dano adwong dwong me aura, kame cinge acelacel oudo tie kede anyira lwete kanyape, kede tiene acelacel da oudo tie kede anyira lwete me tiene kanyape; eda oudo ebedo akwar me itucio.

⁷ Lonono oko donyo nywaro jo me Isirael, di Jonasan, wot ka omin me Daudi kame nyinge Simea, oko neke.

⁸ Jo adek nogi oudo obedo anywali me itucio me jo me Gat; Daudi kede jo mege oko neneko gin dedede.