1 Iyutun 19 - Baibuli I Leb Kumam 2013

Daudi Obwono Jo Amon kede Jo Siria

¹ Kikano di do oudo kare okakato, Abaka Nakas me jo Amon oko to, di wode Kanun oko lunyo wange bala abaka.

² Abaka Daudi oko waco be, “Abino bedo kede genere but Kanun wot ka Nakas, bala kame bin papa mere ogena kede.” Aso, Daudi bin oko ooro jo bute pi kweno cunye pi to ka papa mere. Kakame jo kame bin Daudi ooro oko tuno kede i lobo me jo Amon di kiko donyo but Abaka Kanun,

³ jotel me jo Amon oko waco ne Kanun be, “Ateteni in iparo be Daudi tie mino papa ni wor be piento en etieko oro jo pi kelo ni kope me kweicuny? Daudi otieko oro jo buti pi gin bino ngingico lobo tetekeny en ebin emai.”

⁴ Manono oko mino Kanun oko mako jo kame oudo Daudi ooro, di eko lielo yer me tik ngat acelacel, eko ngongolo pier igoen kame oudo kingapo di eko riamo gi tenge;

⁵ di gin kiko yai kioto. Kakame Daudi oko winyo kede kop noni, en eko cwano negi kop, pien cuo nogo oudo lewic omako twatwal. Abaka owaco negi be, “Kong dongunu Jeriko tuno di yer me tiku otieko dongo, en amio ikounu do dwogo.”

⁶ Kakame jo Amon oko neno kede be oudo kitieko doko jokwor ka Daudi, gin kiko kwanyo kilo tutumia ot adek kiwie ongwon (34,000) me siliba di kiko cwano Mesopotamia, kede i adul me Maka kede Soba, pi pango cabalan kede jo kame ringo kede gi.

⁷ Gin kiko pango cabalan tutumia ot adek kiwie are (32,000), di abaka me Maka oko bino kede isirikalen mege di kiko gero kimere gi Medeba. Jo Amon da oko wok ki bomban gi di kiko bino pi yi.

⁸ Kakame Daudi oko winyo kede kop noni, en eko cwano Joab kede isirikalen dedede pi ot yi kede gi.

⁹ Jo Amon di oko donyo oko me bomba di kiko teere i erute me bomba pi yi, di abakai kame oudo obino pi konyo yi tie ken gi kiteere i ebar.

¹⁰ Kakame Joab oneno kede be jokwor oudo tie i nyime kede i ngee, en eko yero isirikalen mogo atek yi kikom isirikalen me Isirael, di eko keto gi kiteere pi yi kede jo me Siria;

¹¹ isirikalen odong mege en eko mino omin mere Abisai telo gi, di Abisai oko mino gi kiteere pi yi kede jo Amon.

¹² En ewaco ne be, “Ka ineno be jo Siria tie bwona, bia ikonya; do ka jo Amon teko gi tie mito bwoni, ango abino ringini konyi.

¹³ Bed tek, doko mito obed kede nwangcuny pir jo wa, kede pir bomban ka Rubanga wa. Ango akwao Rwot pi timo gikame en eneno be ber ne.”

¹⁴ Di Joab kede jo mege oko ot pi cako yi kede jo me Siria, di jo me Siria oko ringo tenge.

¹⁵ Kakame jo Amon oneno kede be jo Siria oringo, gida kiko ringo ki nyim Abisai di kiko dok i bomba. Di do Joab oko dok cen Yerusalem.

¹⁶ Do kakame jo Siria oko neno kede be jo me Isirael oudo obwono gi, gin kiko cwano jo oko ot omo isirikalen gi kame oudo tie loka tetuca me ecilet me Eupurate. Gin kiko bino di Sopak ngatel me Isirikalen ka Kadadese en kame telo gi.

¹⁷ Kakame Daudi oko winyo kede kop nono, en eko coko isirikalen dedede me Isirael karacel, di kiko ngolo ecilet me Yorodan, di eko teero gi nyim gi oneno jo me Siria. Jo me Siria oko yi kede gi.

¹⁸ Jo me Siria oko ringo tenge ki nyim jo me Isirael. Di Daudi oko neko jo Siria tutumia kanyaare (7,000) kame bin ringo kede cabalan, kede jo tutumia ot ongwon (40,000) kame bin oto kede tien, doko kiko neko Sobak ngat koudo obedo ngatel me isirikalen me Siria.

¹⁹ Kakame abakai kame bin tio ne Kadadese oko do neno kede be jo me Isirael oudo otieko bwono gi, gin do kiko kwano Daudi pi weko gin kibed kede mulem; di do gin kiko doko jo kame en epugo. Di do jo me Siria oko dagi konyo jo Amon atwal.