1 Iyutun 15 - Baibuli I Leb Kumam 2013

Iikere pi Kobo Sanduku me Isikan

¹ Daudi bin oko gero ude mege amake i Bomba ka Daudi, di eko iiko kabedo ne Sanduku me Isikan ka Rubanga, eko gero ne eema.

² Di Daudi oko mino cik be Jolebi kenekene en kame poore yeno Sanduku me Isikan ka Rubanga, pien gin en kame Rwot oudo otieko yero gi pi yene, kede pi timo ne en tic nakanaka.

³ Daudi oko coko jo me Isirael dedede Yerusalem pi tero Sanduku me Isikan ka Rwot kabedo mere kame oudo koiko ne.

⁴ Di do En eko coko karacel ikwae ka Aaron kede Jolebi.

⁵ Ki ekeko ka Kokat, Uriel otelo jo tol are kede ot are (220);

⁶ ki ekeko ka Merari, Asaya otelo jo tol are kede ot are (120);

⁷ ki ekeko ka Gereson, Yoweri otelo jo tol acel kede ot adek (130);

⁸ ki ekeko ka Elisapan, Semaya otelo jo tol are (200);

⁹ ki ekeko ka Keburon, Eliel otelo jo ot kanyauni (80);

¹⁰ kede ki ekeko ka Usiel, Aminadab oko telo jo tol acel kede tomon kiwie are (112).

¹¹ Daudi oko lwongo josaseredoti Sadoki kede Abiata, karacel kede Jolebi Uriel, Asaya, Yoweri, Semaya, Eliel, kede Aminadab.

¹² En eko waco negi be, “Wun en jotel me diakale me Jolebi; poore ilonyerenu, wun kede Jolebi wadu, tetekeny itwerunu tero Sanduku me Isikan ka Rwot Rubanga me Isirael, i kabedo kame ango atieko iiko pire.

¹³ Pien i kare me agege kame wan otamo kele kede Yerusalem, Rwot Rubanga wa bin cunye oko wang i kom wa, pien wun oudo ibedunu li pi koto tinge bala kame oudo mitere.”

¹⁴ Di do josaseredoti kede Jolebi oko lonyere tetekeny kiter Sanduku me Isikan ka Rwot Rubanga me Isirael kabedo mere.

¹⁵ Jolebi oko diedielo Sanduku me Isikan ka Rubanga kede atekai kame kiriongo i epepet, bala kame bin Rwot ociko kede kibut Musa.

¹⁶ Daudi oko ciko jotel me Jolebi pi poko ne Jolebi wad gi tic me wer kede me gono jamini apapat me agoa, tetekeny gin kigoi were mogo amit me yomcuny kede adungu, arigirigi kede suanin abatal.

^17-21 Cuo kame gin kiko yero pi gono suanin abatal gin en, Keman wot ka Yoweri, Asap wot ka Berekia, en wad gi, kede Etan wot ka Kusaya, dano me ekeko ka Merari. Kiko yero da Jolebi ace pi konyo gi, jo kame goo adungun atino, gin bin en: Sakaria, Yasiel, Semiramot, Yekiel, Uni, Eliab, Maseya, kede Benaya. Jo kame bin gin kiko yero pi gono adungun adongo gin en: Matitia, Elipeleku, Mikeneya, Asasia, kede jodar erute me tempulo Obed Edom kede Yeyel.

²² Bin oko yero Kenania pi bedo ngatel me wer me Jolebi, piento en oudo etie kede diru me wer.

²³ Berekia kede Elikana bin oko mino tic me daro erute kame donyo kabedo kame oudo koketo iye Sanduku me Isikan ka Rubanga.

²⁴ Josaseredoti Sebania, Yosapat, Netanel, Amasai, Sakaria, Benaya, kede Elieser, bin oko mino gi tic me kuto agwara i nyim Sanduku me Isikan ka Rubanga. Obed Edom kede Yekia da bin komio tic me daro erute kame donyo kabedo kame oudo koketo iye Sanduku me Isikan.

Kotero Sanduku me Isikan Yerusalem

²⁵ Aso, Daudi kede jotel me Isirael, kede jodongo me isirikalen oko ot omo Sanduku me Isikan ka Rwot ki ot ka Obed Edom di kitie kede ilel adwong.

²⁶ Rubanga oko konyo Jolebi kame bin oko yeno Sanduku me Isikan mere, pi mano, gin kiko mino giayala angola me twonin kanyaare kede romini kanyaare.

²⁷ Daudi oudo ongapo ekanso aber di epwot, doko Jolebi kame oudo tie diedielo Sanduku me Isikan da oudo ongapere kamanono, kiton jower, kede Kenania ngatel gi da. Daudi oudo ongapo da epod kame kotimo kede egoe apwot di emeny.

²⁸ Aso, jo Isirael dedede oko tero Sanduku me Isikan ka Rwot Yerusalem di kilelemo kede kilel, di kikuto esos me tung leini, agwarai, kede kigoo suanin abatal, kede adungun kede arigirigin kede dwan amalo.

²⁹ Di oudo kotie donyo kede Sanduku me isikan ka Rwot i Bomba ka Daudi, Mikal nyar ka Saulo oko ngoloro ooko ki dirisa, di eko neno Daudi tie miel di esosomo pi kilel, di en eko bedo kede acae i kome i cunye.