1 Iyutun 14 - Baibuli I Leb Kumam 2013

Tice kame Daudi Otimo i Yerusalem

¹ Abaka Kiram me Taya bin oko cwano jo but Daudi; en ecwao gi kitero ne yen seda kede jogedo pi ot gero ne abaka ot.

² Di do Daudi oko niang be Rwot oudo otieko kete bedo abaka me Isirael, doko da be Rwot en kame oudo omio ajakanut mere odongo twatwal pi jo mege me Isirael.

³ Daudi bin oko nyomo mon ace i Yerusalem, di eko nywalo idwe ace awobe kede anyira.

⁴ Nying idwe kame bin en enywalo di oudo etie Yerusalem ige: Samua, Sobab, Natan, Sulumani,

⁵ Ibar, Elisua, Elepelet,

⁶ Noga, Nepeg, Yapia,

⁷ Elisama, Beliada, kede Elipelet.

Kobwono Jo Pilistia

⁸ Kakame jo Pilistia oko winyo kede be oudo kowiro Daudi pi bedo abaka me Isirael dedede, isirikalen me Pilistia dedede oko ot mono Daudi pi make; do Daudi oko winyo di en eko ot yi kede gi.

⁹ Isirikalen me Pilistia oudo obino di kiko timo yak i aditot me Repaim.

¹⁰ Daudi oko penyo Rubanga be, “Benyo, aot di ako suro jo Pilistia? Ibino mino gi i cinga?” Rwot oko waco ne Daudi be, “Oti, di ango ako bino mino gi i cingi.”

¹¹ Aso, Daudi oko ot Baal Perasim, di eko bwono gi ki kuno. En ewaco be, “Rwot otieko tic keda pi nyano diere me jokwor na bala alele kame dipere.” Pi mano, oko do lwongo kabedo nono be Baal Perasim.

¹² Jo Pilistia oko ringo kiweko rubangan gi kunono, di Daudi oko mino cik di oko wango gi.

¹³ Jo Pilistia bobo oko dok yak i aditot me Repaim.

¹⁴ Daudi bobo oko penyo Rubanga di Rubanga oko waco ne be, “Kur iot suro gi i nyim gi; do manaro cen ngei gi, di iko suro gi ki kuno, tetu nget yen kame kolwongo be balsam.

¹⁵ Ka iwinyunu tien jo aoto mor di winyere i wi yen balsam, otunu do yi, pien udo ango atieko telo ne wu yongayo me bwono isirikalen me Pilistia.”

¹⁶ Daudi bin oko timo bala kame Rwot oudo ociko ne; di eko bwono isirikalen me Pilistia cako ki Gibeon tuno Geser.

¹⁷ Iruo me nying Daudi oko sarakin i lobere dedede, di Rwot oko mino atekerin dedede obedo kede lworo bute.