1 Iyutun 13 - Baibuli I Leb Kumam 2013

Kokwanyo Sanduku me Isikan ki Kiriat Yearim

¹ Abaka Daudi bin oko penyo tam kibut jodongo me isirikalen mege dedede, jodongo kame telo isirikalen tutumia acel tutumia acel kede kame telo isirikalen tol acel tol acel.

² Di eko waco ne jo dedede me Isirael kame oudo ocokere be, “Ka wun iyeunu, kede ka manoni obedo mit ka Rwot Rubanga wa, wek ocwaunu jo but jo wa apat dedede kame odong i lobo me Isirael, kiton josaseredoti kede Jolebi i bomban gi kame tie kede kakwat, tetekeny wac ne gida kibin but wa kan.

³ Di do wan okounu ot kelo Sanduku me Isikan ka Rubanga wa but wa kan, gikame wan oudo likame oparunu pire i kare me apugan ka Saulo.”

⁴ Jo dedede oko yei kede tam mere nono, pien tam nono oudo yomo cuny gi.

⁵ Aso, Daudi oko coko jo dedede me Isirael cako ki ikor me Misiri i bad tetu piny ape tuno Lebo Kamat i bad tetu malo. En ecoko gin dedede karacel pi omo Sanduku me Isikan ka Rubanga ki Kiriat Yearim di kiko tere Yerusalem.

⁶ Di Daudi kede jo dedede me Isirael oko ot i bomba me Baala, manono en Kiriat Yearim, kame tie i adul me Yuda, pi omo Sanduku me Isikan ka Rubanga, sanduku kame kolwongo kede nying Rwot kame bedo malo i wi cerubim.

⁷ Gin kiko kwanyo Sanduku me Isikan ka Rubanga ki ot ka Abinadab di kiko cibe i gadigadi anyen. Usa kede Akio en kame oudo kolo twonin kame wao gadigadi nono.

⁸ Daudi kede jo dedede me Isirael oudo tie miel kede teko gi lung pi mino wor but Rubanga, di kiwero kede kigoo arigirigin, adungun, bule, suanin abatal, kede di kikuto agwarai.

⁹ Kakame gin kituno kede i laru me canyo ka Kidon, twonin oko gete, di Usa oko cwano cinge pi mako Sanduku me Isikan kur epoti.

¹⁰ Manono oko mino cuny Rwot owang i kom Usa di eko neke pi kite kame ecwao kede cinge di eko mulo Sanduku me Isikan. Usa oko to kanono i nyim Rubanga.

¹¹ Cuny Daudi oko wang pien Rwot oudo oko neko Usa di elilo. Manono oko mino oko donyo lwongo kabedo nono be Peres Usa tuno tin.

¹² Cenge nono Daudi oko bedo kede lworo atek but Rubanga di eko waco be, “Benyo benyo kame ango akaruno doko kede ngat kame gwoko Sanduku me Isikan ka Rubanga?”

¹³ Aso, Daudi likame oko yei tero Sanduku me Isikan ka Rwot i bomba mere, pi en koto gwoke i kuno; do en eko lokere tere i ot ka Obed Edom dano me bomba me Gat.

¹⁴ Sanduku nono oko bedo kunono pi dwete adek; di Rwot oko mino jo me ot ka Obed Edom winyo karacel kede jamini mege dedede.