1 Iyutun 11 - Baibuli I Leb Kumam 2013

Daudi Odoko Abaka me Isirael kede Yuda

¹ Jo me ikekon dedede me Isirael oko bino Keburon but Daudi, di kiko waco ne be, “Neningo, wan obedo jo acel kedi.

² I kare moro cen, di pwodi Saulo en oudo obedo abaka wa, in en kame oudo ibedo telo jo me Isirael ot i yi. Rwot bin oko waco ni be, ‘In ibino bedo ngakwat me jo na me Isirael, doko in ibino pugo gi.’ ”

³ Aso, kop nono en oko mino joadongo me Isirael oko bino Keburon but abaka; di Abaka Daudi oko timo kede gi isikan i nyim Rwot i Keburon, di gin kiko wiro Daudi pi bedo abaka me Isirael, bala kame Rwot oudo ocikere kede kibut Samuel.

⁴ Abaka Daudi bin oko yai kede jo dedede me Isirael pi ot suro Yerusalem, manono en Yebu, kakame jo Yebu oudo bedo iye, gin jo kame kicako bedo i lobo nono.

⁵ Jo kame bin bedo Yebu oko waco ne Daudi be, “Likame ibino donyo kan.” Akadi kamanono da, Daudi bin oko mano Sion kakame oudo kocelo di tek, kame nataman kolwongo be Bomba ka Daudi.

⁶ Daudi oko waco be, “Ngat kame bino cako suro jo Yebu bino doko ngadwong me isirikalen.” Di Joab wot ka Seruya en oko cako ot, di do en eko doko ngadwong me isirikalen.

⁷ Daudi bin oko donyo bedo i kabedo kame oudo kocelo di tek nono, di oko donyo lwonge be “Bomba ka Daudi”.

⁸ En bin eko gero bomba rimaro, cako ki kakame kotoro kame oudo tie tetu kide mere, di Joab oko temuno iiko kabedo apat me bomba.

⁹ Di Daudi oko meede ameda doko dano kame tek, pien Rwot Rubanga me jo yi oudo tie kede.

Isirikalen ka Daudi Atek Yi

¹⁰ Magi en nying isirikalen ka Daudi koudo ngere twatwal. Gin karacel kede jo ace me Isirael bin kikonye eko doko abaka, bala kame Rwot oudo ocikere kede, doko da kiko mino ajakanut mere ocungo di tek.

¹¹ Me agege oudo obedo Yasobeam, dano me ot ka Kakimoni, en oudo ebedo ngatel me “Jo Adek”. En bin eyi kede jo tol adek kede tong mere di eko neko gin dedede i wang yi acel.

¹² Ngat koudo lube kikom “Jo Adek” angere nogo en Eleasar wot ka Dodo, dano me ot ka Akoki.

¹³ En bin oudo etie kede Daudi i yi me Pas Damim kakame jo me Pilistia oudo ocokere kede kunono. En oudo etie i poto me mawele kakame jo me Isirael ocako kede ringo,

¹⁴ do en kede Daudi kiko cungo kiguro i dier poto nono, di kiko yi kede jo Pilistia. Rwot oko mino gi kibwono yi nono.

¹⁵ Ceng moro acel jo adek kikom jodongo me isirikalen ot adek oko ot i lela kakame Daudi oudo tie iye, i abo me Adulam, di isirikalen me Pilistia oudo osipo kimere gi i aditot me Repaim.

¹⁶ I esawa nono Daudi oudo tie i wi emukura kakame tuno iye tek; kede da ekodet me jo Pilistia mogo oudo tie Betelem.

¹⁷ Daudi oko donyo parere di ewaco be, “Okwe koto ngatamoro okelo na pii me amata ki atan atie i erute me Betelem!”

¹⁸ Di jo adek nogo oko mwomere donyo ki kimere me jo Pilistia, di kiko twomo pii ki atan kame oudo tie i erute me Betelem di kiko tero ne Daudi. Do Daudi likame oko mato pii nono, do en eko onye piny bala giamia but Rwot,

¹⁹ di eko waco be, “Rubanga likame yei be atim kamanoni. Pien man rom aroma bala mato remo me cuo koudo ojalo kuo gi nogi.” Aso en eko dagi mato pii nono. Jo yi adek nogo otimo manoni.

²⁰ Abisai omin me Joab en oudo obedo ngaloc me “Jo Ot Adek” angere. En bin eyi kede jo tol adek (300) kede tong mere di eko neko gin dedede, di en eko doko dano angere twatwal kikom “Jo Ot Adek”.

²¹ En eko doko dano angere twatwal kikom “Jo Ot Adek” di eko doko ngatel gi, do likame oudo engere kalamo “Jo Adek”.

²² Benaya wot ka Yekoyada dano me Kabusel oudo obedo ngayi kame nyinge iruo; en etimo gikame dongodongo. Eneko awobe ka Ariel me Moab are. I ceng moro da bin eoto di eko neko engu i bur i ceng kame akako ocwei kede.

²³ Doko da eneko dano me Misiri, icuo acil adikinicel di ecwe di edongo malo mita are. Icuo nono oudo tie kede twon tong i cinge, do Benaya oko mako ebela eko ot yi kede. En eko wariso tong ki cing icuo me Misiri nono di eko lokere neke kede tong mere nono.

²⁴ Magonogi en gikame Benaya wot ka Yekoyada otimo, eda ngat acel kikom “Jo Ot Adek”.

²⁵ Eda oudo engere twatwal i diere gi do likame oudo nyinge iruo bala “Jo Adek”. Daudi oko mine ebedo ngadwong me isirikalen adare.

²⁶ Magi en nying isirikalen koudo ngere twatwal: Asakel omin me Joab; Elikanan wot ka Dodo me Betelem;

²⁷ Samot me Karod; Keles me Pelet;

²⁸ Ira wot ka Ikes me Tekoa;

²⁹ Sibekai me Kusa, Ilai Ngakoki,

³⁰ Makarai me Netopa, Keled wot ka Bana me Netopa,

³¹ Itai wot ka Ribai me Gibea i lobo ka jo Benjamin, Benaya me Piraton,

³² Kurai me aditot atie i nget Gas, Abiel me Araba,

³³ Asimabet me Bakarum, Eliaba me Salabon,

³⁴ Kasem me Gison, Jonasan wot ka Sage me Karar,

³⁵ Akiam wot ka Sakar me Karar, Elipal wot ka Ur,

³⁶ Keper me Mekera, Akija me Pelon,

³⁷ Kesiro me Kamel, Naarai wot ka Esibai,

³⁸ Yoweri omin me Natan, Mibikar wot ka Kagiri,

³⁹ Selek me Amon, Nakarai me Berot, en ngat koudo mako jamini me yi ka Joab wot ka Seruya,

⁴⁰ Ira kede Gareb jo me Yatir,

⁴¹ Uria Ngakiti, Sabad wot ka Akelai,

⁴² Adina wot ka Sisaa dano me ekeko ka Ruben (en oudo etie kede ekodet me isirikalen mege amake ot adek),

⁴³ Aanan wot ka Maka, Yosapat me Mitan,

⁴⁴ Usia me Asitera, Sama kede Yeyel awobe ka Kotam me Aroer,

⁴⁵ Yediael wot ka Simiri, kede omin mere Yoka me Tis,

⁴⁶ Eliel me Makabit, Yeribai kede Yosabia awobe ka Elinam, kede Itima me Moab,

⁴⁷ Eliel, Ebed, kede Yasiel me Soba.