1 Iyutun 10 - Baibuli I Leb Kumam 2013

To ka Abaka Saulo

¹ I kare nono jo me Pilistia oudo oko yi kede jo me Isirael i wi moru me Gilboa; di jo me Isirael oko dipo ringo i nyim jo Pilistia, di oko neko atot kikom gi.

² Jo me Pilistia oko riamere kede Saulo kede awobe mege di kiko mako gi i yongayo; di jo me Pilistia oko neko awobe ka Saulo, Jonasan, Abinadab kede Malikisua.

³ Yi bin oko bedo pek i kakame Saulo oudo tie iye; jo ayi kede emal bin oko ude, di kiko mine awanon arac twatwal.

⁴ Di do Saulo oko waco ne awobi kame bin mako ne jamini me yi be, “Wot epima ni di iko coba kede pelepel, tetekeny jo kalikame kokepo nogi kur bin di kiko mina adok gi me tuko gi, di kiko neka.” Do awobi nono lworo oudo omako, omio likame eko yei. Aso, Saulo di oko kwanyo epima mere en won kikome di eko poto iye.

⁵ Kakame awobi nono oko neno kede be Saulo oudo oto, eda eko poto i epima mere di eko to karacel kede Saulo.

⁶ Aso, Saulo kede awobe mege adek, gin dedede jo me ot acel bin kiko to i ceng acel.

⁷ Kakame jo me Isirael kame oudo tie tetuca me aditot me Jeserel oko ngeno kede be jo me Isirael oudo oringo ki yi, kede da be oudo koneko Saulo kede awobe mege, gin kiko ringo tenge kiweko bomban gi; di jo me Pilistia oko bino di kiko donyo bedo i yi gi.

⁸ I ceng kame lubo mere di do yi oudo otiek, jo me Pilistia oko ot pi yako jamini ki kom jo kame oudo kineko, di gin kiko udo liele ka Saulo kede me awobe mege adek tie buto i wi moru me Gilboa.

⁹ Gin kiko tongo wie tenge, di kiko yako jamini mege me yi, di kiko cwano jo i lobo me Pilistia lung pi gin ot tatamo rwonge aber nono but rubangan gi kede but joe gi.

¹⁰ Gin bin kiko keto jamini ka Saulo me yi i tempulo ka rubangan gi, do kiko tweno wie i tempulo ka rubanga gi anyinge Dagon.

¹¹ Do kakame jo me bomba me Jabes kame bin tie i adul me Gilead oko winyo kede gikame jo Pilistia oudo otimo ne Saulo,

¹² cuo dedede kame bin tek yi oko yai di kiko ot kwanyo kom Saulo kede kom awobe mege di kiko tero gi Jabes. Di do kiko yiko cogere gi i dud yat kame kolwongo be oak i Jabes kunono, di kiko kanyo kec pi ceng kanyaare.

¹³ Aso, Saulo bin oto pien likame oudo ebedo dano agenere but Rwot; en bin edagi lubo cik ka Rwot, doko da en eko lokere penyo tipere pi mine tam

¹⁴ akaka penyo tam kibut Rwot. Pi manono, Rwot oko neke di eko mino ajakanut i cing Daudi wot ka Yese.